الثلاثاء، ٢٦ فبراير ٢٠٠٨

ما هو سر الصورة ؟؟؟

دخلت النهاردة هيئة حكومية فشفت خير الله أما أجعله خير صورة مكبرة للريس وهو يمنحنا ابتسامة أبوية حنونة

تنحت شوية للصورة وجه في بالي خاطر

طبعا المشهد اللي أنا قلت عليه بيتكرر كتير وفي الواقع أي حد بيدخل أي هيئة حكومية ولا قسم بوليس بيشوف نفس المنظر والموضوع بيتكرر في المسلسلات و الأفلام

ودي مش عادة مستحدثة في العهد السعيد اللي احنا عايشين فيه ده .. الحكاية دي من زمان من أيام الرؤساء جمال عبد الناصر والسادات وقبلهم الملك فاروق ووالده فؤاد

ولقيتني بتسائل في سخرية .. كانوا بيعملوا ايه قبل ما يخترعوا التصوير الفوتوغرافي .. كان بيرسموا مئات الصور بايديهم علشان يحطوها في الدواوين الملكية

ولقيتني برضه بقول في عقل بالي هو فيه حكمة أو هدف معين يعني للحكاية دي

وهل ده بيحصل في كل حتة يعني ولا في بلدنا بس لأني بصراحة عمري ما شفت في فيلم ولا مسلسل أمريكاني صورة لجورج بوش أو بيل كلينتون متعلقة في أي حتة

وبيتهيألي برضه إن أي دولة أجنبية مش بتعمل كده وغالبا ده تقليد عربي مصري خالص ولنا كعرب حق احتكاره


وسألت نفسي برضه ايه سر الابتسامة الهادية المطمئنة المرسومة على وجه الريس

هل لأنه حاسس أنه أدّى واجبه كما ينبغي تجاه شعبه

وأنه خلاص مفيش بطالة ولا ارتفاع في الأسعار والدخل يغطي المصروفات وزيادة .. الشقق الفاضية بالكوم وسعرها رخيص واللي عايز يتجوز بيتجوز

المستشفيات بتقدم خدمة عالية المستوى للمواطنين .. الدواء متوفر بأسعار متاحة للجميع ومحدش بيموت لمجرد أنه مش قادر على تمن الدوا

هل ياترى مشاكل 75 مليون -اللي ربنا هيسأله عليهم - اتحلت والشعب سعيد ومبسوط

فبالتالي بقى من حق الريس يشعر بالسعادة والراحة ويبتسم الابتسامة المطمئنة دي

هناك ٤٩ تعليقًا:

  1. زمااااااااان ايام فرعون كانوا بينحتوا الصور على صخور ويحطوا الصوره ويعلقوا الموظف
    عشان تعرفى اننا دلوقتى فى نعمه
    انما نعمل ايه شعب مش بيطمر فيه حاجه
    وبعدين بتبصى للريس فى ابتسامته
    لا هو مبتسم عشان الصوره تطلع حلوه زى احمد زكى ما قال مش عشان المشاكل اتحلت شفتى ظلمتيه تانى ازاى

    بصى انا اتخنقت مش هكمل التعليق دا انتوا شعب رخم
    هههههههههههههههههههههههههه

    ردحذف
  2. يا هبه شكرا لزيارتك الدائمه امدونتى وده فى حد ذاته شرف كبير
    وبمناسبه الصوره والابتسامه ممكن نقول ان عنده زهيمر ومش قادر يتحكم فى اعصابه لانه لو اتحكم هتلاقيه بيتف على الشعب ولا ايه ؟

    ردحذف
  3. محمود

    حذفت التعليق ليه بس هو حد لاقي

    المهم

    زمان أيام الفراعنة كان بينحتوا صور الملك في المعابد و المقابر اللي بيدفن فيها

    مكنش كل واحد بينحته في الليفينج بتاع بيته

    وبعدين أنا مقصدتش أحسد الريس .. ده أنا لا عشت و لا كنت

    أنا بس كنت عايزة أعرف سببها يعني مش أكتر

    ردحذف
  4. محمد

    الشرف لينا يا فندم

    نورت المدونة

    لو زي ما بتقول يبقى خليه فاقد الذاكرة أحسن

    ردحذف
  5. عزيزتى
    ايه الموضوعات الجريئه دى

    شوفى انا تسائلت زيك لما كنت بشوف الافلام الامريكيه ولا الاوروبيه وملقيش صورة اى رئيس دولة على الحيطه متعلقه

    وفهمت ان الدولة الديكتاتورية من علامات ديكتاتوريتها تعليق صور الزعماء بتوعها مش الرؤساء

    لاكن الدول الديمقراطيه الرئيس موظف بياخد مرتب ومفيش موظف حكومه بيحط صورته فى شكله هو مش قطاع خاص

    وطبعا السادة الملوك دول مش حاكمين وبس دول ملكين بلادهم هما وعائلتهم

    بس سيبك احمدى ربنا انهم مش حطينها على الفلوس علشان تحبى صورته لحاجة ليها

    اما الابتسامة دى لانه راضى عن نفسه وعن حياته وعن دنيته

    بس اكيد مفيش حاكم حتى لو كان عادل يقدر يكون سعيد لان العدل والحق بقوا شئ صعب يحصل فى البلاد الديمقراطية

    يبقا هيحصل فى بلادنا ذات الحكم الشمولى

    مش فيه اخره ونار وحساب

    يبقا خلاص يضحكون الان ويبكون فى دنيا الخلود

    تحياتى يا افندم
    سلام

    ردحذف
  6. عزيزتى اول زيارة و بجد ابدى اعجابى بها بشدة
    اما موضوع صورة الرئيس اعتقد اننى مرتين شاهدت صورة بوش على الحائط يزين خلفيته علم امريكافى احد الافلام و ليس جميعها
    :))

    تحياتى

    ردحذف
  7. هبه

    بعني حضرتك مش عاجبك ايه بالضبط؟
    مش عاجبك الصورة ؟
    ولا مش عاجبك انه بيبتسم؟

    طيب الراجل يعمل ايه ؟؟
    يكشر في وشنا نقول ايه الكبه ده ؟
    ولا يبتسم ونسميه البقرة الضاحكة
    اكيد يبتسم احسن

    وبعدين الصورة ديه محطوطة في المصالح الحكومية حماية ليها من الشياطين
    طبعا مفيش ولا شيطان هيقرب من مكان الزعيم
    يعني الرجل بيشتغل احسن من الحجاب اهوا
    بطلوا افتراء وبطر بقي

    لا حقيقي ملاحظاتك في الصميم
    تقبلي مروري الاول يا عزيزتي

    ردحذف
  8. السلام عليكم

    ازيك ياهبه

    منورا سجن النساء

    هههههههههه

    متخافيش العيش والحلاوه مش هينقطعو عنك

    بتتكلمى فى الساسه العليا ليه

    الراجل بدل ماينزل ويشوف الناس

    قال يبعت شىء من ريحته

    اهو يونسكم

    مش بدل ما يقطع نفسه

    اهم اخترعو ليه اختراع احسن ما يقطع نفسه

    ياهبه زى ماقلتى دا اختراع

    عربى مصرى خالص

    انا بيتهيأ دى بقة عاده

    ولو محدش عملها تقريبا محدش هيحاسبه


    تحياتى ليكى يا بيبو

    تقبلى مرورى

    احمد سكر

    ردحذف
  9. شفتي وانا بكتبلك الرد دلوقتي النور قطع فيجعل كلامنا خفيف عليهم

    ايه يا هبة مش عجبك صورته ولا ايه دا حتي صورته هي سبب البركة اللي مليا المصالح الحكومية وانا بانصحك تحطي صورته عندك في البيت عشان البركة تحل عنك قصدي عندك

    بصي انا معرفش هي دول العالم التانية ازاي بتتعامل مع صورة الرئيس .. هي المشكلة في منطقتنا العربية مش انهم يحطوا صورة الرئيس ولا لا ..يحطوها زي ما هم عاوزين بس يكون مثلا تتحط شوية وتشال تاني بعد ما يحدث تداول للسلطة ويجي رئيس جديد مش يقعد سيادته كابس علي نفس الشعب عشرين تلاتين سنة لغاية لما يطلع منه اخر نفس ويكون الشعب روحه طلعت معاه

    وبمناسبة الازدهار اللي احنا عايشينه كان في نكتة سياسية قرتها في الكتب بتلخص حال مصر في عهد عبد الناصر والسادات وحسني مبارك

    اللي متحبس في عهد عبد الناصر عمره ما يتحبس ابدا , واللي ما اغتناش في عهد السادات عمره ما يتغني ابدا , واللي مشحتش في عهد مبارك عمره ما يشحت ابدا !!!!

    سلام يا هبة وبلاش كلام في السياسة بقي

    ردحذف
  10. اقوللك هما بيحطوا صور الرؤساء لية ع يفكروك بحاجة مهمة جد الا وهى
    الريس جابلكم المرض
    الريس هيعالجكم
    الريس بيعالجكم فعلا
    الريس بيدعى ان ربنا ياخدكم

    ادعوا للريس اللى صورتة متعلقة

    ردحذف
  11. لازم تبقى صورته موجوده طبعا يعني هو ينفع يتعطل شغلنا ونتخنق في اي مصلحة حكومية وجرائم في اقسام البوليس وبطالة وفساد من غير ما نعرف مين صاحب المصائب دي كلها؟؟؟
    الاجابة دايما بتكون ان المسئول عن المصيبة دي صاحب الصورة المبتسم
    تحياتي

    ردحذف
  12. احساس لسه حي

    بيحط صورته في كل حتة على أساس إن البيت بته والبلد بلده والشعب شعبه

    أنت عندك حق فعلا صعب جدا يصل للعدل الكامل بس على الأقل يكون بيحاول

    عجبتني أوي عبارة يضحكون الأن ويبكون في دنيا الخلود

    معبرة فعلا

    تحياتي وياريت متكونش أخر زيارة

    ردحذف
  13. رانيا

    أهلا بيكي

    مش عارفة بيتهيألي هما بيحطوا صور الروساء في البيت الأبيض بس

    يعني لما بيجيبوا قسم شرطة من بتوعهم مش بيبقى فيه أي صور

    والله أعلم

    شكرا على مرورك

    نورتيني

    ردحذف
  14. ساعد نسرين الأيمن

    أهلا بيك

    فعلا الشياطين نفسها متقدرش تقرب

    وإلا كانت قربت من زمان

    أنا مش معترضة على الصورة ولا على الابتسامة وأنا أقدر برضه ربنا يحفظ لنا سيادته يعني علشان يكمل رسالته معانا

    شكرا على مرورك

    ردحذف
  15. أحمد سكر

    بس لا أنت ولا حد من اللي دخلوا ردوا هيعرف يجيبلي حاجة

    علشان كلنا هنتشحن في بوكس واحد سيادتك

    شكرا على مرورك ومتابعتك

    ردحذف
  16. الفارس الملثم

    بقى النور اتقطع مرتين .. كويس إن محصلتش خساير اكتر من كده

    تلاقي الكهربا كانت خايفة ليعتبروها متواطئة معانا

    عجبتني النكتة اللي قلتها معبرة فعلا

    مهو لو كان سنتين تلاتة مكنش بقى فيه مشكلة

    لكن ده أنا من ساعة اما فتحت عنيا على الدنيا وهو موجود

    ياله كفاية كلام في السياسة على رأيك

    ردحذف
  17. kafrawy

    وهو احنا محتاجين صورة تفكرنا

    ده في القلب والوجدان وفي الجيب

    ردحذف
  18. أنا حر

    أهلا بيك

    فعلا الصورة للذكرى

    مع أننا مش ناسيين

    شكرا على مرورك وياريت متكونش أخر زيارة

    ردحذف
  19. اتش


    هو بيضحك علينا ... ربنا ينتقم منه
    .........

    ايه دا انت مش خايف ياقمر ولا ايه

    علي العموم انتي ليكي في الحلاوة ولا هتقضيها باي حاجه

    وزة

    ردحذف
  20. وزة العسل

    أنا مش بخاف .. أنا بترعب بس

    يا ستي ما فيه 70 مليون غيري بيقولوا نفس الكلام

    قولي يا باسط

    أنا مبحبش الحلاوة أوي بصراحة بس اهو اللي هالاقيه هاكله

    الزمن بتاعنا ده مش بتاع احب ولا محبش

    ده زمن الموجود يسد

    ردحذف
  21. يا هبة فكرتينى بنكتة قديمة عن عريس راح يقضى شهر العسل فى فندق خمس نجوم ، وبعدين وهو على وشك إنه (...) بص فوق السرير فجأة قام لقى صورة مبارك .. قام قاله : "يييه .. هو إنت دايماً كدة؟ كل حاجة حاضر افتتاحها؟!!ّ"
    وحبايبى الحلوين .. طبعاً إنتوا عارفين إن كووووولنا لازم نعلق الـ"صورة" دى من "صور" النفاق النقى الخالص لوجه ممالئة الحاكم وإبداء الولاء التام وإلا فالموت الزؤام.. فكل واحد يا ولاد يعلق واحدة فى كل مكان بيدخل فيه على مدار الـ24 ساعة .. عشان يضمن يكون فى حضرة معالى أفندينا الخديوى طمام أفنظيم .. فى كل وقت وكل ساعة .. خلوا بالكو يا ولاد.. باقول تعلقوها فى "كل" مكان .. مش لازم أوضح أكتر من كدة . وأقولكو إيه ؟ اللى هييجى بكرة هيسمع الغنوة ويتسلى بالحدوتة .. حدوتة اعتقالى أنا وهبة بموجب قانون الطوارئ سابقاً الإرهاب حالياً .. ويجعله عامررررررررر بـ"صورة" لا يمكن لحد "تصورها" إلا إذا كان يتسم بالـ"جمال"!!!!
    وغنوة أبلة فضيلة النهاردة:
    صورة صورة صورة
    كلنا علقنا الصورة
    ................

    ردحذف
  22. مها

    حلوة النكتة أول مرة اسمعها

    خير كويس أني هلاقي حد يتقبض عليه معايا

    كل واحد يعلق الصورة

    بس أنا بقى مش محتاجة الصورة

    أنا زي ما كان محمد صبحي بيقول في مسرحية تخاريف

    أنت في قلبي

    ردحذف
  23. سهلة ..

    عشان الناس تحس دايما إن موجود معاها وباصص عليها ، يقوموا يخافوا !

    متوقعة لو حاطة صورته في المدونة عندك ، كنتي كتبتي موضوع زي ده ؟!!!!

    ---

    يحيا الزعيم القائد الـ....

    آآآآآآآآآآي

    ZZZZZZZ

    انقطع الإرسال !

    ردحذف
  24. هههههههههههه
    و دا كان مبسوط اوى كدا ليه..بيضحك على ايه يعنى..تصدقى انا كنت فاكرة ان ممكن يكون عدا ايام كويسة مع اخينا دا زمان قبل سنة 90 قبل ما اتولد يعنى..قلت يا بت معلش قدمى حسن النية..امبارح بقى بقرأ مقالات كتبها نجيب محفوظ فى 86 و فى 87 اتارى الوضع كان انيل من دلوقتى بمراااااااااحل

    بس احب اطمنك فى اختراع الصور دا..دا اختراع عربى اصلىىىىىىىىى..دا حتى فى ماتشات الكورة الناس بتطلع صور اللى بيحكموهم كأنهم اتبرمجوا خلاص...

    احلى نكتة بقى ايام كأس الامم لما كانوا بيسألوا الناس العادية تهدى الفوز لمين..يقولك للريس و عاوز اقوله انى بحبه طحن و حاجات كدا...الناس و هى فرحانة بتحب اى حد بأى طريقة..حله انه يبسط الناس و هما حيحبوه الى الابد و تفضل صورته عالية خفاقة

    ردحذف
  25. مهو المشكلة اننا كلنا بنبص للمواضيع بزاوية واحدة
    متيجي نفكر يمكن يكون الموضوع ده للقضاء علي البطالة حديثا و قديما
    شوفي كام مصلحة حكومية علي مستوي الدولة
    وكمان محدش يقدر يقول تبذير في المال العام
    لأن الريس من دول بيقعدلة بالتلاتين سنة كل الموضوع خرقة وتتنضف كل سنة
    وليه متكنش وسيلة علشان يخلوك تخلص مصلحتك بسرعة والي بعدك كمان يخلص مصلحته
    و مفيش حت يتلكع في المصلحة
    طبعا انتم عارفين حتلحو علي نفسكم تخلعو من المصلحة بسرعة ليه؟
    مش لازم نظلم الناس معانا
    شاكيرا يا شاكيرا

    ردحذف
  26. ههههههههههههههههههه
    انا كنت ف السجل المدنى من كام يوم

    و صحيح مش معلقين صور و لا حاجة
    لانه أصلا مفيش حتى مكان عشان الناس تمشى فيه !!!
    تخيلى لما هيئة حكومية بيتوافد عليها الناس من كل مكان عشان يقضوا مصالحهم مش عشان يتفسحوا
    و تقعدهم - سورى توقفهم - 8 ساعات ف طابور عشان يعملبوا شهادة بالكمبيوتر او يعملوا بطاقة
    على فكرة دى مش مبالغة .. انا فعلا وقفت 8 ساعات لحد لما رجلى اشتكت و قالتلى كفاية حرام عليكى !!! قلتلها و انا مالى هو ده ذنبى يعنى ؟؟؟!!! :)))

    المصالح الحكومية كلها عايزة الحرق
    الله أعلم بالحال ف البلاد التانية

    اما موضوع الصورة فأنا زيك مش عارفة ان كان ليها دلالة او حكمة معينة
    يمكن على سبيل التفاؤل بالصورة و لا حاجة !!!
    او يمكن عشان يخضوا اى واحد عنده مشكلة مع الحزب الوطنى !!! ههههههههه

    تحياتى على البوست
    دى اول زيارة و ان شاء الله يدوم التواصل
    و يارب تعجبك مدونتى و بوستاتى

    ردحذف
  27. لله يا هوبا
    الراجل مبسوط
    المدام مريحه وهو فرحان قوى
    سيبيه
    نعمل ايه

    الله بسعدوا ويركب المترو
    قولى يارب

    ردحذف
  28. و انا صغيرة كنت بحس ان صورته جزء من اى ديكور

    و بعد كده لما كبرت شوية هو بيضحك على

    الديمقراطية الوهمية اللى هو معيشنا فيها

    لكن دلوقتى و شوف الضحكة بانها واجة لاى

    حاجة غلط بتحصل فى البلد

    و الله اعلم برده سر الضحكة

    ردحذف
  29. خبيب

    خبيب

    رد عليا

    يبدو أنهم قبضوا على خبيب

    بالتأكيد لو كانت الصورة منورة المدونة مكنتش هكتب حرف واحد من أساسه

    شكرا على مرورك

    ردحذف
  30. dina

    منوراني

    أنتي زي حالاتي من الناس اللي اتولدت ونمت وترعرت في ظل حكم مبارك

    فعلا الاختراع ده عربي خالص

    محدش في حتة تانية بيعمل كده

    زي ما قال البعض دي من واصفات النظام الدكتاتوري

    شكرا على مرورك يا قمر

    ردحذف
  31. anwer

    على رأيك

    كده هنوفر بدل ما نضطر نغير الصورة كل شوية

    شكرا على مرورك

    ردحذف
  32. Eman Eltaher

    أهلا بيكي في مدونتي المتواضعة

    يارب تعجبني بوستاتك ايه بس

    ده أنتي مدوناتك جميلة ومتميزة جدا

    ويارب يكون فيه بينا تواصل دايما

    كان الله في العون على الوقفة اللي وقفتيها

    ده كويس أنك عرفتي توصلي في الأخر وما قالولكيش معاد الانصراف جه وفوتي علينا بكره

    تخليص الورق من المصالح الحكومية ده عملية انتحارية تكون مستغنية فيها عن نفسك ووقتك

    أما بالنسبة للصورة فده من باب الحب اللي زايد عن حده فانقلب لضده

    شكرا على مرورك الجميل

    ردحذف
  33. سيكو

    فينك من زمان يا قمر

    الواحد كان ابتدى يقلق عليكي

    ومفيش بوستات جديدة عندك من ساعة العريس اياه

    بالنسبة لدعوتك

    فربنا يسمع منك

    بس لو اتوبيس نقل عام يبقى احسن

    منوراني دايما يا قمر

    ردحذف
  34. Selfmeaning

    أهلا بيكي

    هو ممكن يكون فعلا بيضحك على الديمقراطية المزعومة

    ويمكن برضه الضحكة الحنونة دي تكميل لباقي الصورة

    الله أعلم

    شكرا على مرورك الجميل

    ردحذف
  35. هبه احمدي ربنا يا بنتي انها جات بس على اد الهيئات الحكومية والريس بتاعنا حبيب قلبنا ونور عنينا ما نشفشي دماغه ووزع صورة لكل مواطن وعين لها وزير مخصوص واصر ان صورته تكون متعلقه في كل بيت وفي كل غرفه من غرف البيت

    تصوري كدا وانتي داخله بيتكم تلاقيه في وشك تقولي له وحشتني يا ريس

    تدخلي تنامي تقولي له بكل رقه تصبح على خير يا ريس ..

    وانت بتطبخي .. تقوله تحب اطبخ لك ايه يا ريس على الغدا


    بلاش بئه نتكلم عن بيت الراحه

    خلي الطابق مستور

    انا بجد يا هبه كنت بتسائل من زمان عن سر الصورة دي وسر الابتسامة البريئه لأم ليزا .. قصدي للريس
    ؟؟ لو وصلت لك الاجابه امانه عليكي يا هبه لتقولي لي ينوبك ثواب

    تحياتي وحبي وتقديري

    ردحذف
  36. في البدايه أحيي شجاعتك .. تاني حاجه يمكن يكون السر ورا الابتسامه دي أن سيادته مثلاً خلص أقساط شقة جمال اللي في العبور أو ربنا كرمه وشغل علاء في مصنع من الجداد أهو برضه صاحب أولاد يجيله منها قرش أحسن ما يشارك دا و دا و الكلام يكتر .... ولكن بعد طول تفكير لقيت أنه بيضحك علينا.
    شكراًعلى زيارتك لمدونتي وتعليقك الجميل و شكراًلأنك ضيفتيني عندك .. وربنا يديم المعروف.
    دمت جريئه

    ردحذف
  37. قبلة الحياة

    منوراني

    السر مجهول بس على رأيك كويس أنها جت لحد كده

    والصورة ما انتشرتش أكتر من كده

    دمتي بخير

    ردحذف
  38. أحمد عصام

    و لا شجاعة ولا حاجة

    دي فكرة جت في بالي وكلمتين على سبيل الفضفضة

    لا شكر على واجب يا فندم مدونتك متميزة فعلا برغم أنك مقل للغاية

    تحياتي ليك وشكرا على مرورك

    ردحذف
  39. هو ده الكلام
    احييكى على هذا البوست الجرئ
    لاننا فعلا لازم نتكلم ونقول اللى جوانا مهما كان من غير لحظة خوف
    اما عنت موضوع الصوره انا حاسس ان الحزب الوطنى هيوزع علينا صور اربعه فى سته للرئيس
    تحياتى اليكى

    ردحذف
  40. صالح سعيد

    ادينا بنفضفض

    بالنسبة للصورة هما بدل ما يوزعوها ممكن يطبعوها على الفلوس وبكده الناس هتحبه موت

    شكرا على مرورك

    ردحذف
  41. السلام عليكم

    انا والله موضوع الصور ده مجنني من زمان خصوصافي الافلام والمسلسلات بتلاقي الممثل بيتكلم ويقوم المخرج واخد كده لقطة للصورة اياها ..
    لا وسيبك من الصورة دي مقدور عليها لكن بقى لما يبقى في كل ماتش ولا بطولة بتغاظ انا اوي , كانه هو اللي كان بيلعب !!

    على فكرة عجبني اوي شكل البلوج وتصميمها

    yasmeen

    ردحذف
  42. تعرفى انى فعلالا حكايه الصوره دى فعلا عمرى مشفتها فى فيلم اجنبى سيبك من الصوره وخلينا فى الابتسامه واضح فعلا ان كل مشاكل مص اتحلت علشان نشوف الابتسامه دى سلام
    اه على فكره دى اول زياره والبوست رائع جدا

    ردحذف
  43. زمان كنت لما ادخل شغل والدتي والاقي الصورة فوق راسها
    واشوووف الهدوء الكبييييييير اللي هي قاعدة فيه
    كنت بحسبه حاطين الصورة دي بتجسس
    ههههههههههه
    ولما كبرت وعقلت فهمت
    انها مش بتجسس ... لا دي بتجسس وتنكد عليك حياتك
    #####@@@@ ملحوظة اخيرة@@@@###
    بسم الله مشاء الله مدونتك بقت ايه مية مية وذات شعبية جارفة
    عيني عليكي باردة يا منطلقة بسرعة الصاروخ

    ردحذف
  44. ياسمين

    أهلا بيكي وسعيدة بمرورك

    شكرا على كلامك الرقيق

    موضوع الصورة ده طلع مستفز ناس كتير

    ياله بقى هنعمل ايه

    ردحذف
  45. rommantic

    أهلا بيك

    وشمرا على كلامك

    فعلا الأفلام الأجنبي مفيهاش حاجة تدل على اتباع التقليد ده عندهم

    والصورة زي ما قلت تدل على راحة ضمير جامدة

    تحياتي وشكرا لمرورك

    ردحذف
  46. عابد الرحمن

    أهلا بيك

    يارب تكون فعلا المدونة زي ما بتقول

    هو فعلا في مجموعة أصدقاء بيتابعوني علطول زيك

    وفيه ناس بترد مرة واحدة ومش بتكرر الزيارة

    بيبقى على حسب البوست .. فيه ناس بتشدها فكرة بوست وتبقى عايزة تعلق وناس لاء

    عموما ربنا يسمع منك

    سعيدة بمرورك عندي بجد

    وكنت هبقى أسعد لو لقيت بوست جديد في مدونتك

    عابد الرحمن

    أنا مستنية جديدك

    وياريت يكون البوست الجديد ده قريب

    ردحذف
  47. بلااااااش تواضع
    انا بدأت أغير منك
    يعني فايزة عليا ففي المدونة والاخلاق الكريمة كمان ؟!!!
    ربنا يجازيكي الجنة يا رب

    ردحذف
  48. نصار

    مش عارفة الكلام من تأليفك ولا ايه

    بس عموما الناس معذورة

    كل بيدور على أكل عيشه والناس كلها عايشين في دوامة

    وبعدين صدقني الناس بقت دلوقتي بتتكلم بصوت عالي من غلبها

    شكرا على مرورك

    ردحذف

اتكلم براحتك أنت في مدونة ديموقراطية جدا واخد لي بالك