ما هو سر الصورة ؟؟؟

دخلت النهاردة هيئة حكومية فشفت خير الله أما أجعله خير صورة مكبرة للريس وهو يمنحنا ابتسامة أبوية حنونة

تنحت شوية للصورة وجه في بالي خاطر

طبعا المشهد اللي أنا قلت عليه بيتكرر كتير وفي الواقع أي حد بيدخل أي هيئة حكومية ولا قسم بوليس بيشوف نفس المنظر والموضوع بيتكرر في المسلسلات و الأفلام

ودي مش عادة مستحدثة في العهد السعيد اللي احنا عايشين فيه ده .. الحكاية دي من زمان من أيام الرؤساء جمال عبد الناصر والسادات وقبلهم الملك فاروق ووالده فؤاد

ولقيتني بتسائل في سخرية .. كانوا بيعملوا ايه قبل ما يخترعوا التصوير الفوتوغرافي .. كان بيرسموا مئات الصور بايديهم علشان يحطوها في الدواوين الملكية

ولقيتني برضه بقول في عقل بالي هو فيه حكمة أو هدف معين يعني للحكاية دي

وهل ده بيحصل في كل حتة يعني ولا في بلدنا بس لأني بصراحة عمري ما شفت في فيلم ولا مسلسل أمريكاني صورة لجورج بوش أو بيل كلينتون متعلقة في أي حتة

وبيتهيألي برضه إن أي دولة أجنبية مش بتعمل كده وغالبا ده تقليد عربي مصري خالص ولنا كعرب حق احتكاره

وسألت نفسي برضه ايه سر الابتسامة الهادية المطمئنة المرسومة على وجه الريس

هل لأنه حاسس أنه أدّى واجبه كما ينبغي تجاه شعبه

وأنه خلاص مفيش بطالة ولا ارتفاع في الأسعار والدخل يغطي المصروفات وزيادة .. الشقق الفاضية بالكوم وسعرها رخيص واللي عايز يتجوز بيتجوز

المستشفيات بتقدم خدمة عالية المستوى للمواطنين .. الدواء متوفر بأسعار متاحة للجميع ومحدش بيموت لمجرد أنه مش قادر على تمن الدوا

هل ياترى مشاكل 75 مليون -اللي ربنا هيسأله عليهم - اتحلت والشعب سعيد ومبسوط

فبالتالي بقى من حق الريس يشعر بالسعادة والراحة ويبتسم الابتسامة المطمئنة دي