الحيـاة مواســم

-1-

أيام الأمم الأفريقية الأخيرة وبالتحديد يوم ماتش النهائي .. كانت كل المحلات حاطة علم مصر وكل العربيات حاطة علم مصر و الناس ماشية ماسكة أعلام في ايديها وفيه كل خطوتين واحد واقف يبيع أعلام

تاني يوم بعد الفوز مباشرة وأنا ماشية في نفس الطريق اللي كنت ماشية فيه لقيت المحلات شالت الأعلام ماعدا محل واحد ومحدش ماسك في ايده علم وكل الناس اللي كانت بتبيع أعلام أختفوا

-2-

نهار رمضان الناس كلها صايمة طبعا وفي المواصلات تلاقي كل واحد ماسك في ايده مصحف ومنهمك في القراءة

بعد الفطار تلاقي الناس كلها نازلة تجري علشان تلحق التراويح وتروح المسجد تلاقي مفيش مكان توقف الكل بيصلي الفجر حاضر وفي المسجد

خلص رمضان تلاقي الرجل خفت على المسجد والناس بقت تكسل ساعات تقوم للفجر واللي بيقروا قرآن في المواصلات انقرضوا

-3-

في موسم الامتحانات تلاقي كل الطلبة اللي راكبين معاك ماسكين ورق ولا مذكرة وعمالين يقروا ويحاولوا يجمّعوا أي حاجة علشان يحطوها في ورقة الإجابة ودمتم

مع إنهم طول السنة بيقضوها لعب وبعد الامتحانات بيكملوا اللعب


***

حد خد باله أنا أقصد ايه بكلامي

أنا أقصد أننا حولنا حياتنا لمجموعة مواسم

مصر داخلة بطولة يبقى كلنا نشجع ونشتري أعلام وكوفيات على شكل علم مصر ونرسم العلم على وشوشنا

ويصل مؤشر الوطنية لأقصى درجاته وبعدين هوب تخلص الحكاية وينفض المولد وينشغل كل واحد بحاله ويموت الاحساس
وينخفض مؤشر الوطنية لما يقارب الصفر

نفس الحال أيام رمضان

كل الناس بتبقى واخداها الحماسة أوي وعايزين يختموا القرآن أكتر من مرة وتلاقي الناس بتقرا في المواصلات والمساجد وقبل الفطار وعند الفجر كأننا في سباق

وتلاقي حد يقولك بفخر أنا ختمت القرآن 4 مرات مثلا لكن تعالى بقى اتفرج بعد انتهاء الشهر الفضيل هتلاقي محدش في المواصلات ماسك مصحف خالص وعمو اللي ختم في رمضان أربع مرات ده هتلاقيه من ساعتها ما جاش جنب المصحف

وكأننا مثلا في امتحان ولازم كل واحد يعمل كل جهده علشان يلم درجات أو ده وقت أعمال السنة فلازم تبقى ملتزم وماشي تمام

أو كأن استغفر الله ربنا مش بيشوفنا بنعمل ايه غير في رمضان بس

أنا على فكرة مش بستثنى نفسي من الكلام ده .. أنا نفسي بقالي مدة ما مسكتش المصحف وقريت زي ما بيحصل أيام رمضان

بجد دلوقتي لما بصادف حد في المواصلات ماسك مصحف ببقى عايزة أحييه

بالقياس على كل كلامي .. هتلاقي أننا بنعيش حالات معينة في أوقات محددة وكأننا قسمنا كل حياتنا لمواسم

وبقى لكل حاجة موسم حتى الدين دخل في التقسيمة وبقى له موسم

منطق غريب مش كده بس صحيح وبيحصل