الثلاثاء، ١٢ يوليو ٢٠١١

إسكندريلا صفحة جديدة

صفحة جديدة

أشعار: أحمد حداد
ألحان: حازم شاهين
أداء: فرقة اسكندريللا
...
هات لي يا بكره صفحة جديدة
حط لي مصر في جملة مفيدة
مصر بتصحى وتسقى الورد
وتصبح على شعب عنيد
تديه شمس في عز البرد
ويغني لها تقول له عيد
وتبوسه وتقول له تسلم
يا مرجع لي شبابي احلم
ببيوت ساكنه في دنيا سعيدة

هات لي يا بكره صفحة جديدة
حط لي مصر في جملة مفيدة
مصر جنينة كل الشعرا
ابنها شهم ودمه خفيف
توّجها محبوبة الفقرا
شجرة بتطرح شعب شريف
هي كل قصايد الحب
هي ضحكة وفيها صبح
صبحها مغنى وليلها قصيدة

هات لي يا بكره صفحة جديدة
حط لي مصر في جملة مفيدة
مصر شوارعها بتنادي
على دبة رجلين مصرية
تمشي تغني بلادي بلادي
وتصحّي الكورة الأرضية
الله أكبر تحيا الثورة
ما احلى طعم النصر يا سمرة
ما بقتش الحرية بعيدة
هات لي يا بكره صفحة جديدة