الجمعة، ٢٢ فبراير ٢٠٠٨

الحيـاة مواســم

-1-

أيام الأمم الأفريقية الأخيرة وبالتحديد يوم ماتش النهائي .. كانت كل المحلات حاطة علم مصر وكل العربيات حاطة علم مصر و الناس ماشية ماسكة أعلام في ايديها وفيه كل خطوتين واحد واقف يبيع أعلام

تاني يوم بعد الفوز مباشرة وأنا ماشية في نفس الطريق اللي كنت ماشية فيه لقيت المحلات شالت الأعلام ماعدا محل واحد ومحدش ماسك في ايده علم وكل الناس اللي كانت بتبيع أعلام أختفوا

-2-

نهار رمضان الناس كلها صايمة طبعا وفي المواصلات تلاقي كل واحد ماسك في ايده مصحف ومنهمك في القراءة

بعد الفطار تلاقي الناس كلها نازلة تجري علشان تلحق التراويح وتروح المسجد تلاقي مفيش مكان توقف الكل بيصلي الفجر حاضر وفي المسجد

خلص رمضان تلاقي الرجل خفت على المسجد والناس بقت تكسل ساعات تقوم للفجر واللي بيقروا قرآن في المواصلات انقرضوا

-3-

في موسم الامتحانات تلاقي كل الطلبة اللي راكبين معاك ماسكين ورق ولا مذكرة وعمالين يقروا ويحاولوا يجمّعوا أي حاجة علشان يحطوها في ورقة الإجابة ودمتم

مع إنهم طول السنة بيقضوها لعب وبعد الامتحانات بيكملوا اللعب


***

حد خد باله أنا أقصد ايه بكلامي

أنا أقصد أننا حولنا حياتنا لمجموعة مواسم

مصر داخلة بطولة يبقى كلنا نشجع ونشتري أعلام وكوفيات على شكل علم مصر ونرسم العلم على وشوشنا

ويصل مؤشر الوطنية لأقصى درجاته وبعدين هوب تخلص الحكاية وينفض المولد وينشغل كل واحد بحاله ويموت الاحساس
وينخفض مؤشر الوطنية لما يقارب الصفر

نفس الحال أيام رمضان

كل الناس بتبقى واخداها الحماسة أوي وعايزين يختموا القرآن أكتر من مرة وتلاقي الناس بتقرا في المواصلات والمساجد وقبل الفطار وعند الفجر كأننا في سباق

وتلاقي حد يقولك بفخر أنا ختمت القرآن 4 مرات مثلا لكن تعالى بقى اتفرج بعد انتهاء الشهر الفضيل هتلاقي محدش في المواصلات ماسك مصحف خالص وعمو اللي ختم في رمضان أربع مرات ده هتلاقيه من ساعتها ما جاش جنب المصحف

وكأننا مثلا في امتحان ولازم كل واحد يعمل كل جهده علشان يلم درجات أو ده وقت أعمال السنة فلازم تبقى ملتزم وماشي تمام

أو كأن استغفر الله ربنا مش بيشوفنا بنعمل ايه غير في رمضان بس

أنا على فكرة مش بستثنى نفسي من الكلام ده .. أنا نفسي بقالي مدة ما مسكتش المصحف وقريت زي ما بيحصل أيام رمضان

بجد دلوقتي لما بصادف حد في المواصلات ماسك مصحف ببقى عايزة أحييه

بالقياس على كل كلامي .. هتلاقي أننا بنعيش حالات معينة في أوقات محددة وكأننا قسمنا كل حياتنا لمواسم

وبقى لكل حاجة موسم حتى الدين دخل في التقسيمة وبقى له موسم
منطق غريب مش كده بس صحيح وبيحصل

هناك ٤٠ تعليقًا:

  1. عارفه اهو برضه احسن من البلاده
    مش بتحصل تلاقى ناس قبل الامتحان مش بيذاكروا وواقفين بكل ثقه رغم انهم مش عارفين اى حاجه
    وتلاقى ناس فى رمضان لا بتصلى ولا بتصوم
    وتلاقى ناس بتسب وتلعن فى ام البلد فى كل الاوقات سواء نصر او هزيمه
    مش بقول مبرر بس بقول حال احسن من حال ولا ايه؟

    ردحذف
  2. احنا مجتمع يعاني من الازدواجية فى حياته اصلا
    مجتمع باكتر من وش او زى تعبيرك الرائع خلينا الحياة مواسم بس مش خليناها مواسم شكليات دا بقي اقتناع داخلي بكدا

    بلاش ازود علشان ما تخنقش واخنقك معايا

    تحياتى لحد كدا
    تشي

    ردحذف
  3. البوست تحفة وحقيقى وواقعى وكلنا ممكن نكون بنعمل كدة فعلاً من غير ما نحس ، كأن مبدأ "المواسم" و"على آآآخر لحظة" جزء من تكويننا كمصريين .. ده فى رأى بيرجع لـ"عدم اتساق" الإنسان مع ذاته.. يعنى إنه يتصرف فى مواقف بشخصية وفى مواقف تانية بشخصية تانية خالص.. مين فينا مش كدة على الأقل "أحياناً"...... للأسف .. كلنا هذا الرجل

    بس البوست جامد طحن :))))))))))

    دمت فى أحسن حال

    ردحذف
  4. الله ينور عليكى بجد
    اول زيارة لمدونتك ولن تكون الاخيره
    تقبلى تحياتى

    ردحذف
  5. تصدقي ملاحظة رائعة وواقعية جدا ,عارفة انا شايف الموضوع ده شامل حاجات كتير , يعني مثلا الشارع لا يتم سفلته وتنظيفه الا لما يكون في مسؤول كبير ايعدي , لا يتم الاهتمام بالبنايات المخالفة الا لما يحصل كارثة بسقوط عمارة ووقوع ضحايا , حتي احيانا في البيوت لايتم جعل البيت في كامل نظافته الا لما يكون في ضيوف مهمين

    وكمان بمناسبة الامتحانات في ناس مش بتفتكر تصلي الا لما يكون في امتحانات

    عودة قوية بعد غياب , وتسلم ايدك يا هبة

    ردحذف
  6. مشكلة فعلاً أعتقد تعود إلى أن احنا مش عارفين نعيش حياتنا صح ....

    ردحذف
  7. ايوة فعلا
    فكرتينى بفيلم عبده مواسم
    احنا كدة وبرضه لما يحصل حاجة عن النبى
    كله يقوم ويهيص وشوية يسكتو
    فلسطين تضرب يقومو ويشجبو
    وبعد كدة ينامو
    احنا للاسف شعب مبيقومش غير لما بيزنق
    او يحصل حاجة
    عارفة ليه
    عشان مبنخططش
    ومالناش هدف
    تحياتى

    ردحذف
  8. هوكده يبقى انتا اكيد فى مصر
    بمناسبة الكورة هي دى طبيعة الشخص المصرى
    ويسلام كمان لوسألتيه عند توقعاته قبل الماتش ... يقولك ان شاء الله هنفوز تسعة
    وبالنسبه للأوتوبيسات اللى الواحد يسلام بيشوف فيها مواهب ومهارات المواطن المصرى فى الركوب والأتوبس ماشى...مش كدة وبس لا... وفن التسلل الى داخل الأوتوبس ... والوقوف على أطراف الأصابع على اخر درجة فى السلم............اطلع من ع الباب

    ردحذف
  9. هبه ازيك ياقمر اخبارك ايه

    حلو البوست اوي

    احنا فعلا حياتنا عباره عن مواسم كل حاجه ليها وقتها

    يمكن نكون بنتصرف غلط بس خلاص اتعودنا علي كدا

    سلاموووووووووز ياسكر

    ردحذف
  10. بطوط حبوب

    أهلا بيك

    بص يا سيدي الكلا اللي أنت بتقوله كويس

    بس ما ينفعش نقيس عليه

    يعني اللي مش بيصوم ولا بيصلي في رمضان ده غلط فبالتالي مش هينفع نقارن بينه وبين السلوك المتبع في الأيام العادية أو في رمضان ونقول أهو كده احسن

    تحياتي ليك وشكرا على مرورك

    ردحذف
  11. Che The Hermit

    معاك حق احنا بنتعامل بازدواجية في حاجات كتير

    تحياتي ليك

    وشكرا على مرورك

    ياريت متكونش أخر زيارة

    ردحذف
  12. مها

    أهلا بيكي منوراني

    شكرا على كلامك أخجلتيني

    فعلا كلنا هذا الرجل

    كلنا بنتصرف بنفس الطريقة كأننا مبرمجين على كده

    شكرا على مرورك

    ردحذف
  13. صالح سعيد

    أهلا بيك

    وشكرا على كلامك وياريت متكونش أخر زيارة

    ردحذف
  14. الفارس الملثم

    نورتني

    الحاجات اللي قلت عليها داخلة ضمن تقسيمة المواسم اللي أحنا ماشيين عليها لا إراديا مع أنها غلط ومش منطقية

    شكرا على كلامك ومرورك

    ردحذف
  15. Human

    أهلا بيك

    أحنا فعلا مش عايشين حياتنا صح أو بمعنى تاني المعايير اللي بنفكر أو بنتصرف بيها غلط

    تحياتي ليك

    وشكرا على مرورك وياريت متكونش أخر مرة

    ردحذف
  16. دوحة

    أهلا بيك

    فعلا أحنا ردود أفعالنا بتبقى في قمتها في البداية وبعد كده خمود تام

    تحياتي

    وياريت تكرري الزيارة

    ردحذف
  17. Mahammed Salah

    أهلا بيك

    حب الكورة ده مرض عالمي مش موجود في مصر بس

    تحياتي وشكرا على مرورك

    ردحذف
  18. أهلا يا وزة

    منورة المدونة

    فعلا أحنا اتعودنا على كده

    تحياتي يا قمر وشكرا على مرورك

    ردحذف
  19. اتفرجتى على فيلم عبده مواسم
    اتفرجى عليه هتلاقيه بيتكلم عن نفس موضوع البوست ده
    وعلى العموم احنا كدة وهنفضل كدة
    وعشان الناس بتسترزق ومفيش شغل بجد
    الناس اللى بتسترزق دى هى الل خلت الحياه مواسم
    يعنى بيبعو دباديب حمرا شوية وشوية اعلام مصر واهى ماشيه
    اما الناس بتوع المصاحف دول
    ده لان المواعيد فى رمضان بتكون مراعيه شوية فترة الصيام وكدة فبيبقى فى وقت اكبر للمصاحف والقرأن

    ردحذف
  20. صحفية روشة

    لا أنا ما اتفرجتش على فيلم عبده المواسم

    هي الفكرة خطرت ببالي من اللي بشوفه حواليا وبيحصل معايا

    بالنسبة لموضوع رمضان أنا كنت بتكلم على المبدأ في حد ذاته

    عن مدى التزامنا الديني في رمضان ومدى تكاسلنا بعد انتهائه

    شكرا على مرورك يا قمر

    وما طوليش الغيبة

    ردحذف
  21. السلام عليكم
    ازيك ياهبه

    فعلا يا هبه انتى مميزه

    وبوستاتك كلها هادفه

    اللى انتى بتتكلمى فيه دا طبيع فينا

    بنستنى دايما المواسم علشان نطلع اللى جوانا

    حجات كتير بنعملها ف وقتها

    ولما وقتها يعدى خلاص
    خلصت معاه

    زى مثلا لما يكون فى تفتيش
    اووووه تلاقى الدنيا مقلبوبه وكدا

    وبعد التفتيش ماينتهى

    ترجع ريما لعادتها

    يلا ثانكيو على البوست الرائع

    تقبلى فائق احترامى وتقديرى

    احمد سكر

    ردحذف
  22. هااااااااى

    اول مرة ادخل عندك
    شكل مدونتك جميل فعلا
    كمان انا بحب حنان ماضي جدا

    تعليقلا على البوست
    فعلا عندك حق اصبحت الحياة مواسم و طقوس تؤدي بدون احساس او مشاعر

    تحياتي ليكي
    كريم عزمي

    ردحذف
  23. أحمد سكر

    أهلا بيك

    شكرا على كلامك وتشريفك بالزيارة

    زي ما قلت لما بتكون فيه زيارة الدنيا بتقف على رجل وبعدها خلاص

    واهي كلها مواسم

    ردحذف
  24. kareem azmy

    أهلا بيك

    نورت المدونة وسعيدة أنها حازت على اعجابك

    وياريت الزيارة دي متكونش أخر زيارة

    ردحذف
  25. تحياتي

    بالفعل كما ذكرت حضرتك...مواسم.
    لكن نفسي كل بلكونة يكون فيها علم مصر...كل كراس او كشكول مدرسي او جامعي يكون علية علم مصر....توكيد الانتماء و الولاء...لمصر المحروسة ..

    تحياتي و دمت بالف خير.

    ردحذف
  26. السلام عليكم
    أستطيع مساعدتكم فى تغيير شكل قالب المدونة وفقا لذوقك واختياراتك و ذلك بثلاثون جنيها فقط تدفع فى حسابى بالبريد المصرى بعد عمل التعديلات المطلوبة هذا ان وافقتم
    فى حالة الموافقة يمكن مراسلتى على بريدى الاليكترونى
    4xmisr@gmail.com
    شكرا

    ردحذف
  27. الربان

    أهلا بيك

    يارب فعلا يحصل زي ما بتقول ما يبقاش انتمائنا وحبنا لبلدنا وقتي

    سعيدة بمرورك

    وياريت متكونش أخر زيارة

    ردحذف
  28. 4xmisr

    شكرا على عرضك

    وعلى مرورك

    ردحذف
  29. بجد احب اقولك حاجه ان الحياه كده بقت مش ممله ان الانسان بيجمع كل حاجه بس كلها بظروفها

    ردحذف
  30. محمد

    احنا كده مش بنجمع كل حاجة

    احنا بنخصص وقت معين للحاجة ولما يخلص تخلص معاه وده منطقي

    يعني منطقي تحب بلدك اسبوع بس مثلا أو أنك تلتزم في العبادة في رمضان بس

    وتقعد على مكتبك تشتغل بضمير علشان فيه زيارة

    منطق غير سليم بالمرة

    تحياتي وشكرا على مرورك

    ردحذف
  31. ااااه بتحصل و بتحصل كتير...
    ولا أقولك دى هى القاعدة عند المعظم....زى ما تقولى كده احنا مغيبين حددنا ارادتنا بمجموعة من الأيام و المواسم زى ما قلتى
    ما بنقدرش نعمل حاجات معينة الا فى أيام معينة....ليه؟؟؟ ده اللى معرفوش
    طبيعة بشرية وحشة جدااااا و الواحد مابياخدش باله منها غير فيـــــن
    بعد ما الدنيا تخرب


    بجد البوست حقيقى جدا و حلو جدااا
    تسلم الأيادى

    ردحذف
  32. Saydalanya Mat7oona

    منوراني يا قمر

    أهلا بيكي

    عندك حق أنا برضه مش عارفة ايه السبب اللي بيخلينا نعمل كده

    ممكن يكون تعود أو استسهال

    شكرا على مرورك

    وما تحريمناش من الزيارة

    ردحذف
  33. ياهبة
    بعد السلام
    اعتقد ان الدنيا كلها كدة
    يوم ليك و يوم عليك
    يوم وطنية و يوم نشتم ف الحكومة

    وهكذا

    ردحذف
  34. kafrawy

    وعليكم السلام ورحمة الله

    أهلا بيك

    ممكن يكون ده السبب

    إن الدنيا يوم ليك ويوم عليك

    ممكن برضه

    سعيدة بمرورك

    تحياتي

    ردحذف
  35. هيا الله يرحمها وردة ، كانت بتقول ياللي حبك مواسم برضووو ، الفكرة مش فكرة المواسم يا هبة في اعتقادي، ومش شايف رابط بين رمضان و(أحداث) فوز المنتخب ، لأن الأخير تمثيل × تمثيل، وناس عاوزة تفرح، مش لاقيه إلا الفرصـة دي ،،، لكن عنجدي شعور قاهر إن كل واحد فيهم كان جواه حزين
    .
    .
    .
    زي ما كنت أنا !!!

    ردحذف
  36. إبراهيم واللي معاه

    عندي في المدونة .. اتاري الدنيا منورة

    أهلا بيك وباللي معاك

    هو مقصدتش أربط بين رمضان وفوز المنتخب

    أنا كنت بس عايزة أحط مثالين لحاجات بتحصل معايا ومع غيري علشان أوضح الفكرة

    أنا معاك إن فرحة المنتخب دي الناس عاشتها بضمير لأنهم فعلا كانوا محتاجين فرحة

    بس الناس كانت بتتصرف برضه بحب كبير للبلد وتاني يوم هوب انفض المولد وخلصت الحكاية

    وكل واحد راح لحاله ومبقناش فاكرين من مصر غير غلاء الاسعار وكل البلاوي التانية

    هو ده كان قصدي

    *
    *

    هي وردة ماتت ما سمعتش الخبر ده

    شكرا على مرورك وياريت متكونش أخر مرة

    ردحذف
  37. هكذا الدنيا تبات في حال وتصبح في حال

    ودي مشكلتنا
    ان احنا ينعيش اللحظة في وقتها وبس

    لكن مبنبصش لقدام

    بنبص تحت رجلينا وبس

    تقبلوا تحياتي

    ردحذف
  38. في الاول بيحكي على اختيارك لمواضيعك
    بس ده مش غريب عن حضرتك بجد انتي ممتازة في اختيار مواضيعك وبتتناوليها بطريقة سلسلة وجميلة
    ثانيا بجد كل اللي قولتيه صحححححح
    بس ده عشان احنا شعب عاطفي
    اي بمعنى طبلي ارقصلك ... نكد عليا ابكيلك
    بس للأسف طالت دينا
    والناس فكريين عاطفي دي حلوة زي الحب والكلام ده
    عاطفي يعني ملوش اساس ثابت عليه سواء كان وحش او حلو
    يعني شعب هوائي
    شكرا يا هبة وبجد جزاكي الله الجنة

    ردحذف
  39. الجمعاوي الاصيل

    أهلا بيك

    واضح أنك بتشاركني الرأي

    عجبني وصف بنعيش اللحظة مناسب أوي للي كنت أقصده

    تحياتي

    وشكرا على مرورك

    ردحذف
  40. عابد الرحمن

    فينك من زمان

    وياترى أخبار والدك ايه .. يارب يكون أفضل دلوقتي

    شكرا بجد على كلامك اللي ولو أني مازلت اعتقد أن المدونة فاشلة

    مش عارفة حاسة إن هوائي دي كلمة صعبة

    أحنا بس شعب متكاسل شوية

    تحياتي وشكرا على مرورك

    ردحذف

اتكلم براحتك أنت في مدونة ديموقراطية جدا واخد لي بالك