رمـضـــان كـريــــم

كل سنة وكلكم طيبين وبخير

واحشني جدا كلكم والله

يارب رمضان السنة دي يكون شهر عتق ومغفرة لينا كلنا يارب

ربنا يتقبل صيامكم وقيامكم وصالح أعمالكم

كل سنة وأنتوا بخير

شيـكــا بيكــا

شيكا بيكا وبوليتيكا .. ومقالب أنتيكا

ولا تزعل ولا تحزن .. اضحك برضه يا ويكا

ها ها ها ها .. ع الشيكا بيكا


أنا بضحك من قلبي يا جماعة

مع إني راح مني ولاعة

وبطاقتي ف جاكتة سرقوها

وغتاتة كمان لهفوا الشماعة

بقيت أرجف من السقعة

لكن بضحك

الضحك ده مزيكا

كهربا علي ميكانيكا

اضحك ع الشيكا بيكا

ها ها ها ها .. ع الشيكا بيكا


أنا راح مني كمان حاجة كبيرة

أكبر من إني أجيب لها سيرة

قلبي بيزغزغ روحه بروحه

علشان يمسح منه التكشيرة

ادعوله ينساها بأي ويضحك

الضحك ده مزيكا

كهربا علي ميكانيكا

اضحك ع الشيكا بيكا

ها ها ها ها .. ع الشيكا بيكا

هتقولي الشيكا بيكا ايه هي ؟؟؟

هي الحركات اللي مش هيا

الفرقة .. والحرقة .. والغرقة

والزمبة ف البمبة الذرية

فبدال ما نطق يا وله .. لاء نضحك

الضحك ده مزيكا

كهربا علي ميكانيكا

اضحك ع الشيكا بيكا

ها ها ها ها .. ع الشيكا بيكا

*

*

صلاح جاهين ده مبدع بجد

توقفت الثرثرة

محمد مات

كل الناس بتقول إن محمد مات

وأنا مش قادرة أصدق

مش قادرة أصدق إني هكتب ومحمد مش هيدخل يعلق على البوست

على مدى سنة تقريبا هي عمر المدونة عرفت مجموعة كبيرة من الناس

ومحمد كان من أوائل الناس اللي عرفتهم

وبرغم أني معرفش كل أصدقائي هنا بشكل شخصي لكن يمكن أكون عرفتهم أكتر من ناس بشوفهم كل يوم

ببساطة لإن كل واحد هنا بيظهر زي ما هو .. مفيش حاجة بتجبر حد أنه يظهر بغير حقيقته

ولا يتصرف عكس اللي جواه

علشان كده أنا حسيت أني أعرف كل الناس اللي هنا كويس لأني عرفت أرواحهم وعقولهم مش بس عرفت شكلهم

كل الناس اللي عرفتهم هنا بقوا جزء من عالمي ... بقوا أخواتي

محمد مات

جملة صعبة أوي

واقع مش هقدر أغيره وهأخد وقت كبير على ما أقدر أصدقه واتعايش معاه

ربنا يرحمك يا محمد ويغفر لك ويجعل مثواك الجنة

ربنا يقبل حسناتك ويتجاوز عن سيئاتك ويصبر أهلك

مصر أمي ومهياش مرات أبويا

تعمدت أن أجعل عنوان ها البوست تنويعة على عنوان كتاب مصر ليست أمي .. دي مرات أبويا لأسامة غريب بهدف توضيح وجهة نظري

يمكن اللي خلاني اتكلم في الموضوع ده أني صادفت جروب على الفيس بوك يحمل عنوان الكتاب وفي الواقع الجروب فيه عدد كبير معديين ال 4000 تقريبا والهدف من الجروب ولفت نظري موضوع مطروح للنقاش بعنوان لو لم أكن مصريا يبقى قشطة اوي

والأراء في الردود على الموضوع متفاوتة اللي كاره البلد ومش طايقيها واللي مشيل الحكومة كل حاجة واللي بيدافع عن البلد واللي شايفنا سلبيين وبنتكلم بس من نغير ما نعمل حاجة بجد

أراء كتير متابينة وبعيدا عن الجروب وأعضاءه

نتكلم عن الفكرة الأساسية مصر أمك ولا مرات أبوك

المشكلة إن الورق بيتخلط ببعضه

أنا في رأيي - وأعتقد إن ده رأيي أغلب المدونين اللي هنا - أني لما بكتب عن أي حاجة مش عجباني في بلدي ..لما بنقد أي حاجة مش راضية عنها ده مش معناه أني بكره بلدي ومش طايقاها

بالعكس يمكن أنا وغيري بنعمل كده .. بنعمل كده علشان مشاكلنا توضح .. علشان اتناقش مع ناس غيري وأسمع رأيهم وعلشان أوضح رأيي حتى لو كنت مش بعمل حاجة فعلية تغير الواقع اللي بنقده ده

يعني الهدف مش كره البلد وشتمها بقدر مهو مناقشة متحضرة لمشاكل بنعيشها يمكن نقدر نحلها يوما ما

ونقدر نعيش ونعيش أولادنا في المستقبل حياة أفضل ونشوف بلدنا في أحسن حال زي ما بنتمنى نشوفها

انا بحب بلدي أوي ,اتمنى أشوفها أحسن وفي رأيي أنها هتبقى أحسن لو كل اللي ناس بتحبها وبتحاول ترفع من شأنها

هتقولوا لي بقى كلامك ده بقى وردي أو خيالي مش مهم

المهم إن مصر مهياش مرات أبويا

وامعتصمــاه

أمَّتي هل لك بين الأمم
منبر للسيف أو للقلمِ؟
أتلقاك وطرفي مطرق
خجلاً من أمسك المنصرم
ويكاد الدمع يهمي عابثاً
ببقايا كبرياء الألمِ

أين دنياك التي أوحت إلى
وترى كل يتيم النغم
كم تخطيت على أصدائه
ملعب العز ومغنى الشمم
وتهاديت كأني ساحب
مئزري فوق جباه الأنجم

أمتي كم غصة
خنقت نجوى علاك في فمي
أي جرح في إبائي راعف
فاته الآسي فلم يلتئم

ألإسرائيل تعلو راية
في حمى المهد وظل الحرمِ؟
كيف أغضيت على الذل ولم
تنفضي عنك غبار التهم؟
أو ما كنت إذا البغي اعتدى
موجة من لهب أو من دم؟
فيم أقدمت وأحجمت ولم
يشتف الثأر ولم تنتقمي

اسمعي نوح الحزانى واطربي
وانظري دمع اليتامى وابسمي
ودعي القادة في أهوائها
تتفانى في خسيس المغنم

ربَّ (وامعتصماه) انطلقت
ملء أفواه البنات اليتمِ
لامست أسماعهم لكنها
لم تلامس نخوة المعتصمِ

أمتي كم صنم مجدته
لم يكن يحمل طهر الصنم
لا يلام الذئب في عدوانه
إن يك الراعي عدو الغنم
فاحبسي الشكوى فلولاك لما
كان في الحكم عبيد الدرهم

أيها الجندي يا كبش الفدا
يا شعاع الأمل المبتسم
ما عرفت البخل بالروح إذا
طلبتها غصص المجد الظمي
بورك الجرح الذي تحمله
شرفاً تحت ظلال العلم

كل سنة وأنتم طيبين

كل سنة وأنتم طيبين

وعيد سعيد عليكم

أوباما ... الملك الجديـد

بغض النظر عن الابعاد السياسية واللي غالبا مش هتتغير لأنها سياسة عامة لدولة ومش هتتغير بتغير الرئيس

إلا أني فرحت جدا بفوز اومابا سواء إذا كان هيقدر يعمل تغيير حقيقي أو لاء

الصراحة أنا بعتبرها حاجة كويسة جدا

أخيرا رئيس جمهورية أسمر في بلد عاني فيها أصحاب البشرة السمراء كثيرا

واضطهدوا وحرموا من حقوقهم ومورست تجاهم كافة أساليب الاساءة والتعامل الغير الأدمي

فوز أوباما مؤشر جيد على اختفاء العنصرية من المجتمع الامريكي ونتيجة جيدة لكفاح طويل

لكن ترى هل تختفي العنصرية من السياسة الأمريكية؟؟؟

وترى من الوقت يلزم لذلك؟؟؟؟

هل كلنــا نـهــى رشــدي؟؟؟

بيتهيألي كل الناس تقريبا سمعت عن نهى رشدي

أنا مكنتش شفت الحلقة بتاعتها في 90 دقيقة بس بعد كده سمعت عنها وتابعت موضوعها لحد ما صدر حكم في قضيتها بالسجن تلات سنين للشخص اللي اتحرش بيها

يمكن ناس كتير اتكلموا عن الموضوع وعنها في مدوناتهم أو حتى في أحاديث شخصية عادية

بس يمكن أنا كبنت حسيت باحساسها أوي ويمكن أي بنت هتحس بالموضوع أكتر وخاصة لو كانت اتعرضت له

حتى لو مكنش بشكل فعلي زي ما حصل معاها فعلى الأقل بالكلام والمعاكسات

أنا عن نفسي اتعرضت له قبل كده

يعني واحد معدي من جنبي في الشارع يروح قايل كلمة ملهاش لازمة أو الصبح وأنا رايحة شغلي وواقفة علشان أعدي الشارع تقرب عربية من الرصيف وتهدي على سبيل التجربة يمكن اللي واقفة دي تحب تركب مثلا !!!

وكل المواقف السابقة بتترك نفس الأثر .. يعني ممكن الكلمة الخادشة دي تجرح أكتر من التحرش الفعلي والمشكلة إن الموضوع مابقاش خاضع لقاعدة معينة

يعني مش لازم اللي يحصل لها كده يكون لبسها مش محترم أو شكلها ملفت مثلا بل بالعكس دلوقتي كله بيحصل معاه كده

حلوة بقى وحشة .. لابسه واسع ومحترم .. محجبة أو لاء مفيش قاعدة ثابتة للموضوع

ولا لعمر المتحرش لأن الحكاية دي كمان بيعملها أطفال صغيرين يمكن يكونوا في أولى أعدادي !!!

حاجة تانية عايزة أقولها في الموضوع ده شجاعة نهى أو بمعنى أصح اصرارها على استرداد حقها

سمعت تعليق ظريف أن يسرا هي السبب لأنها عملت كده في مسلسل قضية رأي عام وبالتالي كل البنات هتعمل زيها وأي واحدة هتمر بموقف مشابه هتتصرف زيها

أنا عن نفسي مقدرش أعمل زيها وكل اللي أعرفهم ومروا بمواقف مشابهة كلهم زيي تقريبا

الموضوع بيبقى سخيف ومهين وغالبا مش هقدر أقول في البيت حصل معايا كذا أو واحد قالي كذا و غالبا ممكن ما أتكلمش عن الموضوع نهائي

يمكن السبب في ده أن الناس اللي حواليك هتتقبل الأمر ازاي وهيبوصلك ويتصرفوا معاك ازاي

والأهل نفسهم هل هيكونوا متفهمين وعندهم وعي زي أهل نهى ولا هيتقال بلاش فضايح أو شوشرة
كده الموضوع له وجهتين نظر

يا أما تسكت على حقك وترضى بالعواقب يا أما تأخد حقك وتقبل الخسائر المعنوية اللي هتعود عليك

طبعا أنا عارفة إن السكوت عن الحق هو السبب الرئيسي والأهم في ضياع أي حق بس زي ما قلت أنا عن نفسي مش هأقدر أعمل زيها حتى بعد ما هي عملت كده.

مش هأقدر أحط نفسي تحت الميكروسكوب وأكسر تابوهات المجتمع

إعلانات أم اشتغالات

-1-

احسبها صح تعيشها صح

أول حملة إعلانية هي حملة احسبها صح تعيشها صح

وخلاصتها أنك لو نظمت نفسك هتعرف تعيش كويس

ومثال عليها شاب عايش لوحده وعلشان يوفر وبما أنه بيحسبها صح فهو بيطبخ أكله بنفسه
ومبيطلبش دليفيري وبيكوي هدومه بنفسه وتوفيره ده -المفروض هو كده وفر- هيخليه يحقق
أحلامه أسرع وبينتهي الإعلان بصورته وهو بيخطب وفرحان

ياريت كل واحد يراجع حساباته علشان يشوف الغلط جاي منين

-2-

الفشخرة والمنظرة

الإعلان ده بيبدأ بزوجين سعدا وفرحانين بيخشوا السوبر ماركت ويشتروا من كل حاجة
بشراهة ويحضروا سفرة معتبرة والناس تيجي تأكل وتمشي

وبعدين بقية الأكل تترمي في الزبالة مع أن الصواني شكلها يفرح وزي ما هيا تقريبا ... المهم يكتشف الزوجين أنهم أنفقوا كل اللي حيلتهم

وينتهي الإعلان بإن الفشخرة والمنظرة هما سبب الغلاء اللي أحنا بنعاني منهم

ولو كل واحد مشى على قده مكنش حصل كده وإن الأكل اللي بنرميه في غيرنا أولى بيه

أنا شخصيا مش هصرف كل مرتبي على عزومة لأني أكيد هتصرف في حدود إمكانياتي ...ثم
مين قال أنه لو فاض أكل من العزومة هرميه لا سمح الله

يا أكله في يوم تاني يا أما هديه لأي حد محتاج ينتفع بيه بدل ما يكون مصيره الزباله

وغير كده أبقى استحق الحجر وزوال النعمة

-3-

الضريبة العقارية

إعلان طويل عريض أشبه بفيلم قصير مليان بحوار تعليمي الغرض منه شرح الضريبة العقارية
وتبريرها

والإعلان بيقول إن 99% من الناس مش هيدخلوا في الضريبة العقارية لأنهم بيسكنوا في
عقارات قيمتها أقل من نص مليون جنيه

واللي عنده نص مليون هيدفع 13 جنيه فقط لا غير شهريا وبتتدرج الضريبة لحد 160 جنيه للي
عنده بيت قيمته 2 مليون جنيه

وبيشرح الإعلان تاريخ الضرية وفوايدها

ألا أنتوا ساكنين في بيت قيمته كام

-4-

اتكلم أرضي يا ابن بلدي

سلسله إعلانات الشركة المصرية للإتصالات واللي شعارها اتكلم أرضي يا ابن بلدي وسيبك
من المحمول

دي دقيقة الأرضي بتلات قروش .. اتكلم منه وما ترحموش

وافتكرت الإشتراك والفاتورة اللي بندفعها كل تلات شهور

وعجبي ...

رمضـان كـريــم

أسأل الله لكم في شهر رمضان حسنات تتكاثر وذنوب تتناثر وهموم تتطاير وأن يجعل بسمتكم سعادة وصمتكم عبادة وخاتمتكم شهادة ورزقكم في زيادة وبكل زخة مطر وبعدد من حج واعتمر أدعو الله أن يتقبل منكم صالح العمل

كل عام وأنتم بخير

و رمضــان كـريــم