الأحد، ١١ يناير ٢٠٠٩

مصر أمي ومهياش مرات أبويا

تعمدت أن أجعل عنوان ها البوست تنويعة على عنوان كتاب مصر ليست أمي .. دي مرات أبويا لأسامة غريب بهدف توضيح وجهة نظري

يمكن اللي خلاني اتكلم في الموضوع ده أني صادفت جروب على الفيس بوك يحمل عنوان الكتاب وفي الواقع الجروب فيه عدد كبير معديين ال 4000 تقريبا والهدف من الجروب ولفت نظري موضوع مطروح للنقاش بعنوان لو لم أكن مصريا يبقى قشطة اوي

والأراء في الردود على الموضوع متفاوتة اللي كاره البلد ومش طايقيها واللي مشيل الحكومة كل حاجة واللي بيدافع عن البلد واللي شايفنا سلبيين وبنتكلم بس من نغير ما نعمل حاجة بجد

أراء كتير متابينة وبعيدا عن الجروب وأعضاءه

نتكلم عن الفكرة الأساسية مصر أمك ولا مرات أبوك

المشكلة إن الورق بيتخلط ببعضه

أنا في رأيي - وأعتقد إن ده رأيي أغلب المدونين اللي هنا - أني لما بكتب عن أي حاجة مش عجباني في بلدي ..لما بنقد أي حاجة مش راضية عنها ده مش معناه أني بكره بلدي ومش طايقاها

بالعكس يمكن أنا وغيري بنعمل كده .. بنعمل كده علشان مشاكلنا توضح .. علشان اتناقش مع ناس غيري وأسمع رأيهم وعلشان أوضح رأيي حتى لو كنت مش بعمل حاجة فعلية تغير الواقع اللي بنقده ده

يعني الهدف مش كره البلد وشتمها بقدر مهو مناقشة متحضرة لمشاكل بنعيشها يمكن نقدر نحلها يوما ما

ونقدر نعيش ونعيش أولادنا في المستقبل حياة أفضل ونشوف بلدنا في أحسن حال زي ما بنتمنى نشوفها

انا بحب بلدي أوي ,اتمنى أشوفها أحسن وفي رأيي أنها هتبقى أحسن لو كل اللي ناس بتحبها وبتحاول ترفع من شأنها

هتقولوا لي بقى كلامك ده بقى وردي أو خيالي مش مهم

المهم إن مصر مهياش مرات أبويا

هناك ١٤ تعليقًا:

  1. اقولك
    انا حاسس اننا لما بنبعد عن مصر بنعرف قيمتها بجد
    لما نبعد بنعرف معنى صديق كان عشره عمر
    معنى حبيب كان لينا الدنيا وما فيها
    معنى اسره
    معنى سعاده

    بس اقولك
    انى بحبها
    بكل مافيها

    بحبها كده زى ماهيه

    بالعلماء اللى فيها
    وبالحراميه

    ردحذف
  2. السلام عليكم ورحمة الله وبركاته

    التعليق دا لو لم اكن مصريا يبقي اقشطه اوي
    كانت احد الاصدقاء كتباه ع الياهو ولما قريته اتضايقت ولما سألت قالت انه مجرد تنفيث عن ضغوط لكن الحقيه لا مش قشطه ولا حاجه

    علي اد مافي كتير مش طايقين البلد لكن البلد يعني ايه
    تراب ..... مباني ...... ولا اهل واصحاب وذكريات مهما كانت حلاوتها او مرارتها فهي خلاص انحفرت جوانا ومش هانقدر نخلص منها

    احيانا المصريين بيطلوعوا كلام لمجرد تفضية الضغوط لكن لما بسأل نفسه بيلاقي ان كلام ده مجرد كلام

    ومصر اكيد هاتفضل مهما كان وفيوم هاتقوم طول ما في ناس بدور عليها

    تحياتي
    الي اللقاء

    ردحذف
  3. فى البداية مساء الخير عليكي
    وعاوز اقولك اني كنت مفتقد اني اقرا حاجة ذى كده من زمان
    مش عارف اقولك ايه بس بكلمك وقبل ما اكتب اتنهدت كبيــــــرة اوي
    حقيقي الواحد تعب ومبقاش عارف يعمل ايه يسافر ولا يفضل قاعد مكانه ولا يزعق ويقول ده غلط الواحد زهق بصراحة
    بس برغم كل حاجة بتحصل
    البلد دي مينفعش اكرها
    هقولك حاجة جميلة اوي انا كنت بحاول اقنع نفسي فترة اني يارتني مكنتش من البلد دي وكنت بلد تانية اجمل
    بس اول ما يحصل اي حاجة فيها سيرة مصر والوطنية ذى مثلا على سبيل المثال النشيد
    بجد كنت الاقي جسمي يتنفض بدون ادنى ارادة مدني
    ده ان دل يدل على اننا حتى لو فكرنا نكره البلد دي
    مش هنعرف
    وفعلا مصر امي مش مرات ابويا
    والا كان زماني هعرف
    تحياتي اليكي
    سمسم

    ردحذف
  4. علي فكره هو الكتاب ده كتاب ساخر وانا حتي كنت بديت اقرا في من فتره قريبه هو نوع من النقد اللاذع لسلبيات موجوده في مصر

    لكن زي ما قلتي فعلا احنا بننتقد حاجات في مصر لاننا بنحبها بزياده ونفسنا تبقي احسن بلد في الدنيا لانها هي كده فعلا لكن السلبيات بتغطي علي اي شئ جميل فيها

    اللي ملوش خير في وطنه مش ايكون ليه خير في حد , ومفيش حضن بلد تاني ايكون بديل عن وطنه ..

    لو كان اللي كتب لو لم اكن مصري قشطه اوي حاسس بكده فعلا تبقي كارثه حقيقيه ويبقي في جيل كامل معندوش انتماء لشئ

    ردحذف
  5. هبة

    أنا كمان لفت نظري اسم الكتاب والجروب
    بس للأسف يا هبة مش بي الأوراق هيا اللى اختلطت .. لأ .. دي المشاعر كمان
    فيه ناس في الواقع الحقيقي مش فى الواقع الافتراضى بقوا بيكرهوا مصر فعلا
    مش بس من باب السخرية من الأوضاع أو انتقادها .. والاحساس ده بيكبر جواهم يوم بعد يوم.. وحتى لما تناقشيهم ف فكرة إنه إزاى أى حد مهما حصل يكره بلده بيقولوا إن البلد اللى تكره ولادها لازم تتكره.. وإن بلدهم هيا أى بلد يوفر لهم حياة كريمة ويحفظ لهم كرامتهم.. أى بلد بلدهم لو عاشوا فيها حياة طبيعية تحترم إنسانيتهم..
    أما لو ده محصلش فالبلد اللى عايشين فيها تبقى مش بلدهم.. تبقى بس مجرد "أرض" عايشين عليها..ونطاق جغرافى تابعين له بحكم "شهادة الميلاد" و...بس.

    الناس اللى بتكره البلد موجودين وحقيقيين وده منطقهم ف التفكير.. وغالبا بيرفضوا أى منطق مغاير لأنهم مش ناقصين حد يصدر لهم أفكار معلبة عن الوطنية والانتماء.. ولا عندهم استعداد يمشوا ورا أفكار مثالية لحد مهما يكون مين..

    موضوع مهم يا هبة أشكرك إنك طرحتيه

    مش عارفة احنا رايحين فين..
    لكن دايما بتلح عليا فكرة:
    تمتع بالسيئ فالقادم أسوأ

    ربنا معانا


    تحياتي لك ولاحساسك الجميل مثلك

    ردحذف
  6. مصر كلمه اتظلمت كتير مننا بجد بس هى قاسيه شويه برضه ؟
    حلو يا هبه جدا

    ردحذف
  7. أناhebaوزمان على ايامنا قال الشاعر اللي غناله إيمان البحر :يا بلدنا يا بلد .. هو من امتى الولد.. بيخاف من امه ..لما في الضلمة تضمه.. صدقيني خفت منك صدقيني .. وشكرالك يا Heba

    ردحذف
  8. بصى يا هبه
    كلنا عايزين وطن يدينا حريه ويدينا الحد الادنى من مستوى المعيشه وكل الكلام الحلو ده

    وعشان الوطن بيدينا كل ده بنحس انه امنا الى بتدينا من غير حساب صح؟

    كل ده مش حاسين بيه فبنقول مصر مش امنا
    دا بجانب التصريحات السياسيه الى جابت رسنا فى الارض

    كل دا بيخلي حاله من الاحباط وكره البلد فعلا
    مش كره بمعنى كره ... انما كره بمعنى سخط
    وقت الجد هتلاقى الناس بتحب البلد دى
    بس دلوقتى صعب

    ردحذف
  9. انا هرد عليكى عن لسان واحد تانى(هتلر)
    بيقول ايه:ان اسلحتنا هى اضطراب الذهن وتناقض المشاعر والحيرة والتردد الذى ندخله فى قلوب اعدائنا فعندما يتخاذلون من الداخل ويقفون على حافة الثورة وتهددهم الفوضى الاجتماعية عندما تحين الساعة لنفتك بهم بضربة واحدة.
    واحب اقولك ان دة كان اسلوب المخابرت النازية قبل دخول جيشهم لحرب ودة الاسلوب اللى ماشيه عليه اغلب الدول الاوروبيه لحد دلوقت وبيستخدموه فى وقته الصح
    شوفى مين بقة اللى بيزرعلنا المشاكل وبيتعمد اسلوب الضغط من الخارج وبالتالى الضغط من الداخل لحد ما البلد دى تنهار شوفى بقة اللى عاوزنا نصدق ان بلدنا وحشة بجد وبالافعال بيستغلو الناس وهما طبعا محترفين سياسه والناس لقمة سائغة فى ايديهم يقدرو يحركوهم بالماديات والكلام والافعال
    بس بجد برافو
    نجحوا انهم يوصلونا للحالة دى
    باسلوب منهجى مدروس متحددة ابعادة وخطته الزمنيه اكيد موضوعة
    دة غزو يا هبه
    يارب مكنش طولت ويكون كلامى وصل وموضوع جامد يا هبه

    ردحذف
  10. بصى يا هبة انا شفت الجروب و شفت نفس الموضوع دا و استفزنى جدا و انا طبعا من رأيك جداااااااااااااااا و حتلاقيه رأى اغلب الناس هنا...فرق كبير بين انى اكون شايفاها سودا مخططة باسود منقطة باسود و بين انى اكون بنقد عشان عاوزة حياة احسن و عشان عاوزة حلول و يمكن يكون النقد و النقاش البداية
    موضوع حلو جدا كعادتك
    تحياتى

    ردحذف
  11. السلام عليكم
    مصر دى عاملة بالضبط زي الام والاب الصالحين جدا بس ربنا رزقهم بأولاد كتير كويسين وفيهم واحد من شياطين الانس الناس المفروض تقول ده ابتلاء من ربنا مش نقول العيب في أهله هما ايللي معرفهوش يربوه
    مصر ذنبها ايه لولادها ايللي مش عارفين قيمتها هى معملتش لينا حاجة عشان نكرهها ونلعنها على كل ايللي بيسافروا بيرجعوا يقولوا الله يرحم أيامها وبيتمنوا الزمن يرجع التانى
    باختصار مصر دى معجزة من معجزات ربنا أنا أنا لو لم أكن مصريا ما وددت أن اخلق من الاساس
    تحياتى ليكى

    ردحذف
  12. هبة

    محمد مش هيكتب تاني خلاص

    ردحذف
  13. ما افتكرش أن مرات أبويا نفسها كان ممكن تعمل اللي مصر بتعمله في المصريين..

    مصر مش مكان، مصر ناس، والحقيقة اللي ناس كتير مش عايزين يشوفوها إن الناس ماتت من زمان. القلب مات، والضمير مات، والعقل مات، ما فاضلش غير أشباح عندها عيال عايزة تربيها، تربيها على الموت والخوف والكره والحقد.

    ردحذف

اتكلم براحتك أنت في مدونة ديموقراطية جدا واخد لي بالك