الجمعة، ٣١ أكتوبر ٢٠٠٨

هل كلنــا نـهــى رشــدي؟؟؟

بيتهيألي كل الناس تقريبا سمعت عن نهى رشدي

أنا مكنتش شفت الحلقة بتاعتها في 90 دقيقة بس بعد كده سمعت عنها وتابعت موضوعها لحد ما صدر حكم في قضيتها بالسجن تلات سنين للشخص اللي اتحرش بيها

يمكن ناس كتير اتكلموا عن الموضوع وعنها في مدوناتهم أو حتى في أحاديث شخصية عادية

بس يمكن أنا كبنت حسيت باحساسها أوي ويمكن أي بنت هتحس بالموضوع أكتر وخاصة لو كانت اتعرضت له

حتى لو مكنش بشكل فعلي زي ما حصل معاها فعلى الأقل بالكلام والمعاكسات

أنا عن نفسي اتعرضت له قبل كده

يعني واحد معدي من جنبي في الشارع يروح قايل كلمة ملهاش لازمة أو الصبح وأنا رايحة شغلي وواقفة علشان أعدي الشارع تقرب عربية من الرصيف وتهدي على سبيل التجربة يمكن اللي واقفة دي تحب تركب مثلا !!!

وكل المواقف السابقة بتترك نفس الأثر .. يعني ممكن الكلمة الخادشة دي تجرح أكتر من التحرش الفعلي والمشكلة إن الموضوع مابقاش خاضع لقاعدة معينة

يعني مش لازم اللي يحصل لها كده يكون لبسها مش محترم أو شكلها ملفت مثلا بل بالعكس دلوقتي كله بيحصل معاه كده

حلوة بقى وحشة .. لابسه واسع ومحترم .. محجبة أو لاء مفيش قاعدة ثابتة للموضوع

ولا لعمر المتحرش لأن الحكاية دي كمان بيعملها أطفال صغيرين يمكن يكونوا في أولى أعدادي !!!

حاجة تانية عايزة أقولها في الموضوع ده شجاعة نهى أو بمعنى أصح اصرارها على استرداد حقها

سمعت تعليق ظريف أن يسرا هي السبب لأنها عملت كده في مسلسل قضية رأي عام وبالتالي كل البنات هتعمل زيها وأي واحدة هتمر بموقف مشابه هتتصرف زيها

أنا عن نفسي مقدرش أعمل زيها وكل اللي أعرفهم ومروا بمواقف مشابهة كلهم زيي تقريبا

الموضوع بيبقى سخيف ومهين وغالبا مش هقدر أقول في البيت حصل معايا كذا أو واحد قالي كذا و غالبا ممكن ما أتكلمش عن الموضوع نهائي

يمكن السبب في ده أن الناس اللي حواليك هتتقبل الأمر ازاي وهيبوصلك ويتصرفوا معاك ازاي

والأهل نفسهم هل هيكونوا متفهمين وعندهم وعي زي أهل نهى ولا هيتقال بلاش فضايح أو شوشرة
كده الموضوع له وجهتين نظر

يا أما تسكت على حقك وترضى بالعواقب يا أما تأخد حقك وتقبل الخسائر المعنوية اللي هتعود عليك

طبعا أنا عارفة إن السكوت عن الحق هو السبب الرئيسي والأهم في ضياع أي حق بس زي ما قلت أنا عن نفسي مش هأقدر أعمل زيها حتى بعد ما هي عملت كده.

مش هأقدر أحط نفسي تحت الميكروسكوب وأكسر تابوهات المجتمع

هناك ١٢ تعليقًا:

  1. وعليكم السلاااااااام
    اهو دخلنا فى اول تعليق
    انا هنصحك نصيحه
    انتى دايما تخلى معاكى علبه "حمض مركز"
    او ميه نار
    واللى يعاكس او حتى يفكر
    تخليه يفتكرك طول عمره
    هههههههههههههههههههههههه

    ردحذف
  2. و الله انا مانا عارف

    هو الحق مع مين

    مع نهى اللى طلعت اسرئيليه

    ولا مع الاخ اللى خد الحكم

    ردحذف
  3. هبة

    عندك حق فى كل كلمة.. ثقافة مجتمعنا للأسف ثقافة تستر مش مواجهة.. ثقافة ذكورية الخطيئة فيها دايماً مؤنثة !! البنت دايماً هي اللى غلطانة.. ومش بعيد هى اللى تكون اتحرشت بالراجل المسكين!!! كل ده بيخلى أى بنت تتردد ألف مرة فى المواجهة..

    كلهن مش نهي رشدي!

    ردحذف
  4. ايوا كلنا نهى رشدى
    بس مش بشاجعتها واصرارها على رد انكسارها
    ياريتنا كلنا نهى رشدى فى الشجاعه


    حزينه

    ردحذف
  5. المشكله بمجتمعنا ونظرته بهالموضوع

    نظره سلبيه..رجعيه..سطحيه..!

    بس اكيد لو تمسكنا بحقنا

    بيتغير هالوضع بيوم

    حتى وان صار هالشي..بس وقت طويل:)

    ردحذف
  6. صابر وراضي

    والله كان فيه موضوع مفيد جدا في مدونة خالو أحمد الصباح

    الموضوع بيوضح كيفية التعامل في الحالات المشابهة

    ردحذف
  7. kafrawy

    ايه حكاية اسرائيلية دي


    أنا مسمعتش عن الموضوع ده

    ردحذف
  8. مها

    عجبني كلامك

    محدش بيبقى عنده استعداد للمواجهة لأن غالبا كل اللوم هيلقى على الفتاة

    محدش هيوقف معاها والكل هيحطها في موضع الاتهام

    ردحذف
  9. حزينة

    هو ده اللي أنا بقول عليه

    أن مش كلنا نقدر نبقى زيها

    وأنا شخصيا بعترف أني مقدرش أكون زيها

    ردحذف
  10. موناليزا

    موقف صعب واختيار أصعب

    ردحذف
  11. اقصوصة

    بيتهيألي أحنا محتاجين وقت كبير جدا علشان نقدر نغير نظرتنا للموضوع

    ده إذا كان ينفع أصلا

    ردحذف

اتكلم براحتك أنت في مدونة ديموقراطية جدا واخد لي بالك