الأربعاء، ٨ أكتوبر ٢٠٠٨

إعلانات أم اشتغالات

-1-

احسبها صح تعيشها صح

أول حملة إعلانية هي حملة احسبها صح تعيشها صح

وخلاصتها أنك لو نظمت نفسك هتعرف تعيش كويس

ومثال عليها شاب عايش لوحده وعلشان يوفر وبما أنه بيحسبها صح فهو بيطبخ أكله بنفسه
ومبيطلبش دليفيري وبيكوي هدومه بنفسه وتوفيره ده -المفروض هو كده وفر- هيخليه يحقق
أحلامه أسرع وبينتهي الإعلان بصورته وهو بيخطب وفرحان

ياريت كل واحد يراجع حساباته علشان يشوف الغلط جاي منين

-2-

الفشخرة والمنظرة

الإعلان ده بيبدأ بزوجين سعدا وفرحانين بيخشوا السوبر ماركت ويشتروا من كل حاجة
بشراهة ويحضروا سفرة معتبرة والناس تيجي تأكل وتمشي

وبعدين بقية الأكل تترمي في الزبالة مع أن الصواني شكلها يفرح وزي ما هيا تقريبا ... المهم يكتشف الزوجين أنهم أنفقوا كل اللي حيلتهم

وينتهي الإعلان بإن الفشخرة والمنظرة هما سبب الغلاء اللي أحنا بنعاني منهم

ولو كل واحد مشى على قده مكنش حصل كده وإن الأكل اللي بنرميه في غيرنا أولى بيه

أنا شخصيا مش هصرف كل مرتبي على عزومة لأني أكيد هتصرف في حدود إمكانياتي ...ثم
مين قال أنه لو فاض أكل من العزومة هرميه لا سمح الله

يا أكله في يوم تاني يا أما هديه لأي حد محتاج ينتفع بيه بدل ما يكون مصيره الزباله

وغير كده أبقى استحق الحجر وزوال النعمة

-3-

الضريبة العقارية

إعلان طويل عريض أشبه بفيلم قصير مليان بحوار تعليمي الغرض منه شرح الضريبة العقارية
وتبريرها

والإعلان بيقول إن 99% من الناس مش هيدخلوا في الضريبة العقارية لأنهم بيسكنوا في
عقارات قيمتها أقل من نص مليون جنيه

واللي عنده نص مليون هيدفع 13 جنيه فقط لا غير شهريا وبتتدرج الضريبة لحد 160 جنيه للي
عنده بيت قيمته 2 مليون جنيه

وبيشرح الإعلان تاريخ الضرية وفوايدها

ألا أنتوا ساكنين في بيت قيمته كام

-4-

اتكلم أرضي يا ابن بلدي

سلسله إعلانات الشركة المصرية للإتصالات واللي شعارها اتكلم أرضي يا ابن بلدي وسيبك
من المحمول

دي دقيقة الأرضي بتلات قروش .. اتكلم منه وما ترحموش

وافتكرت الإشتراك والفاتورة اللي بندفعها كل تلات شهور

وعجبي ...

هناك ٣٧ تعليقًا:

  1. الحمد لله وصلت فى الوقت المناسب ولحقت اول تعليق

    اوافق على موضوع الاعلانين الاول والثانى

    واهرش محتارا من الثانى

    واقف بغباء امام الثالث

    وانتظر ما سأتى به الزمن
    واللى يعيش يا ما يشوف


    تحياتى

    ردحذف
  2. عارفه بجد بحب الراجل بتاع اعلان المصريه للاتصالات بتاع البوفيه بحس انه مسخره
    تانى حاجه هما صرفوا كام عشان يعملوا الاعلان والحمله بتاعت وفر ؟
    انا بجد مصرى

    ردحذف
  3. بداية حمدالله علي السلامه ياهبه بما انك بقالك فتره كبيره منزلتيش اي بوستات جديده وانا مش عارف ليه بتغيبي كده

    انا بصراحه الاعلان بتاع الاتصالات ده بيستفزني , انا ملاحظ في التليفونات الارضي ان الخدمه بتزداد سوء والتكلفه في المقابل بتزيد , اكيد الناس لو لقت خدمه كويسه مش اتسيب الارضي بدال الاعلانات دي اللي بتتحمل علي الفاتوره ويقلك انغلي المكالمات عشان واقعه علينا بخساره

    بالنسبه للاعلانات الاولانيه هو الترشيد طبعا حاجه مطلوبه وضروريه , بس السؤال هل مشكلة اغلب الشعب الترشيد ولا ان الاسعار بقت خارج السيطره ؟؟؟

    خمدالله علي العوده مره اخري يا هبه وياريت متتاخريش علينا في بوستاتك المميزه

    تحياتي دائما

    ردحذف
  4. عندك حق فيه مصاريف كتيره قوى بتصرف على الاعلانات دى
    المفروض يكون الاعلان بسيط باقل التكاليف

    ردحذف
  5. كل سنه و انتى طيبه يا هبه

    و الله انا بقول انه عالم مخابيل مخابيل

    مش عارف العالم دى اكيد بيشتغلونا

    يا بيشتغلونا

    ردحذف
  6. مهو العالم كله ماشى بالإعلانات بس إحنا مش أى حد إحنا المصريين لازم نرغى فى كل إعلان نص ساعة وإعلان قبل المسلسل وإعلان فى نصه وإعلان فى أخر المسلسل
    ربنا يصلح حالنا
    تقبلى تحياتى
    دمتى بود

    ردحذف
  7. ههههههههههههههههههه
    .
    .
    مش عارف عديت هنا قبل كده يا هوبة ، ولا لأ

    بس أنا كنت لسـه كاتب عن الموضوع ده بشيء من التفصيل، وبعنوان شبه عنوانك ده جـدًا

    إبقي عدي شوفيه هنـــا :
    http://anaweana.blogspot.com/2008/09/blog-post_21.html

    ردحذف
  8. حمدلله على السلامه
    بجد الاعلان الاول بتاع احسبها صح عاجبنى جدا له هدف و بجد اكيد هيوفروا صح الصح

    تحياتى

    ردحذف
  9. الأزهري

    فعلا اللي يعيش ياما يشوف

    شكرا على مرورك

    ردحذف
  10. محمد

    أنا اللي غاظني إن الإعلانات مش منطقية

    يا أما عايزة تشربك الحكمة بالمعلقة

    ردحذف
  11. محمد

    قعلا الشبكة المصرية للاتصالات وبغض النظر عن مدى جودة خدمتها بتحاول بأي طريقة تطلع اللي في جيوب الناس وبعدين يعملوا إعلان إن الخدمة بتلات قروش قمة التناقض

    أنت معاك حق في إن الترشيد مطلوب

    بس الغلاء مش سببه أن الناس مش بترشد استهلاكها وده اللي استفزني

    ردحذف
  12. romansy

    يكون الإعلان بسيط ومقنع

    وإلا مش هيبقى له لازمة

    ردحذف
  13. kafrawy

    وأنت طيب

    هما كده أكيد بيشتغلونا ياأما فاكرينا هبل

    ردحذف
  14. mohamed ghalia

    أنت طرحت نقطة كويسة برضه

    كتر الإعلانات والاستمرار في إعادتها طول الوقت ملل لأقصى درجة

    تحياتي وشكرا على مرورك

    ردحذف
  15. ابراهيم

    أزيك يا إبراهيم ... هما الموضوعين متشابهين فعلا بس مع فارق أن أسلوبك في الكتابة أفضل مني وإن أنا كنت أقصد الاعلانات اللي بتشتغل الناس أكتر من اللي بتستفزهم

    عموما أنا هأغير العنوان بتاع البوست لمنع اللبس

    تحياتي وشكرا للفت انتباهي

    ردحذف
  16. Rania

    حمد الله على سلامتك أنتي

    بصي يا ستي

    الإعلان فكرته وشعاره حلوين

    بس تعالي للواقع هتحسيه مش منطقي خالص

    ده الشباب بتتبهدل وبيطلع عينها علشان تكون نفسها

    الصورة مش وردية أوي زي الإعلان

    ردحذف
  17. لا يا هبـة أبدًا، مكنش قصدي ....خااالص إنك تغيري عنوان التدوينة ..

    واضح إن الموضوع ده مُستفز الناس كلها

    امبارح برضه كنت ف مدونة أشرف توفيق لقيته كاتب عن الإعلانات ...

    خـالص تحياتي

    ردحذف
  18. إبراهيم

    ولا يهمك أنا أصلا كنت بفكر أسمي البوست كده من الأول

    بس بصراحة مكنتش هضمة كلمة اشتغالات قوي

    بس العنوان كده بيعبر عن رأيي أكتر

    تحياتي

    ردحذف
  19. أشعر بالصدق الشديد من كلامك وده أهم حاجة في التدوين من وجهة نظري
    تقبلي مرورى بس نصيحة متصدقيش اعلانات التليفزيون المصري

    ردحذف
  20. السلام عليكم ورحمة الله وبركاته
    انت قولتيها
    وعجبي
    آآآآآآآآآآآآآآآآآآآآآآآآآآآآآآه يا بلد
    تحياتي
    الي اللقاء

    ردحذف
  21. الاعلان الاول كويس و فعلا لازم نحسبها صح لكن

    هل الاهدار فى الاكل هو سبب الغلاء؟؟؟ طيب ازاى مش فاهمه

    الضرايب العقاريه دا بقى عشان يفهمنا انهم برضه بياخدوا من الناس اللى معها مش الغلابه بس

    اما الاتصالات فاانا الحمد لله ماليش فى الارضى ولا التليفونات عموما

    كل حاجه بقت مستفزة فى البلد دى هاتيجى على الاعلانات وهاتكون كويسه

    ردحذف
  22. بصراحه مش بتفرج علي التليفزييون لانه بجد يشل ويجيب ضغط وسكر

    ربنا يكون في عون اللي بيشوفه

    ردحذف
  23. شوفى يا هبة...الناس دى بتحاول تقولبنا فى دور العالم المسرفة اللى هتودى مصر ورا الشمس...احنا اه شعب بيعز الفشخرة و التمثيل بس فى مننا كتير جدا مش لاقى أكل يومه..

    و بصراحة الحكومة والشعب و النظام فقعونى

    بس خلاص

    خالص تحياتى...اتأخرت كتير بس اعذرينى كنت مشغولة بشكل شنيع

    وحشـــــانى كتير
    :)

    ردحذف
  24. dalia

    منورة المدونة

    شكرا على كلماتك الرقيقة وسعيدة إن المدونة حازت على اعجابك

    عزيزتي أنا مش بصدق أي إعلانات مش إعلانات التلفزيون المصري

    نورتيني

    ردحذف
  25. kemet

    مهو فعلا مالهاش حل غير يا عجبي

    نورتي المدونة

    تخياتي

    ردحذف
  26. ضد التيار

    أنا حسيت إن كل الإعلانات فيها نوع من الاشتغال للناس

    يعني الغلاء مش كتر الشراء لان فيه ناس فعلا مش لاقية تاكل

    نورتي المدونة

    تحياتي

    ردحذف
  27. كيارا

    ريحتي نفسك من الشلل

    بحل جذري وعملي

    نورتي المدونة

    تحياتي

    ردحذف
  28. Saydalanya Mat7oona

    زلا يهمك يا جميل أنتي تنوري المدونة في أي وقت

    وأنتي كمان وحشاني جدا

    زي ما قلتي الموضوع أشبه بالمثل اللي بيقول ضربني وبكى وسبقني واشتكى

    اللوم كله يقع على الشعب المسرف السفيه

    والحكومة غلبانة وملهاش ذنب ولا وكمان بتوعي الناس

    نورتيني

    ردحذف
  29. الاعلانات المصرية عموما بقت قمة في السذاجة
    ربنا يرحمنا :D

    ردحذف
  30. اول مره ازور المدونة

    بصراحه ده نوع من السزاجه والأستهبال وحاجه تفع المراره .. رخامه كده

    يعني كده حق اريد بيه باطل

    كلامهم جميل بس مش منطقي ابو مرتب ملاليم ده هيقدر من توفير الملاليم انه يحقق اهدافة ازاي بس..

    يا سلام ..,,
    حاجه حلوه اوي

    ردحذف
  31. Bongo

    فينك أنتي ويوكي

    بجد واحشني جدا

    يارب تكونوا بخير

    فعلا الاعلانات بقت ساذجة وسمجة ودمها تقيل

    نورتيني

    ردحذف
  32. البحث عن الذات

    شكرا على مرورك

    فعلا كلام غير منطقي ومش مقنع والمستفز أكتر أنهم متخيلين أن الناس ممكن تقتنع بكده

    تحياتي

    ردحذف
  33. هههههههههههههههههههه
    جامد أوى البوست ده يا هبة
    وحشتنا قفشاتك العبقرية دى والله..

    عودة جميلة وبلاش غياب تانى بقا




    مها - مشربية

    ردحذف
  34. مها

    وحشتني ردودك وتعليقاتك

    منوراني ومنورة المدونة

    ردحذف
  35. ههههه
    فعلا وعجبى ...
    شىء غريب جدا ومضحك بجد .. وكأن الناس لاقيه تاكل اوى علشان تقدر تتفشخر .. ولا لاقيه فلوس تتكلم بيها ارضى ياابن بلدى .. ههههه
    ولا اصلا لاقين عقار يسكنوا فيه ..
    والله موضوعك جميل جد او بسيط وسريع الايقاع والوصول للعقل المصرى الى يكاد يتحطم يأسا ... كلامك جميل ومدونتك جميله بجد اتمنى تشريفك بالزياره لمدونتى ..

    ردحذف
  36. قلب شاعرة

    شكرا على كلماتك الرقيقة

    فعلا الكلام في الاعلانات مش منطقي بالمرة

    مش راكب على بعضه

    دمتي بخير

    ردحذف

اتكلم براحتك أنت في مدونة ديموقراطية جدا واخد لي بالك