الخميس، ٢٤ يوليو ٢٠٠٨

The Moment of Truth

من فترة كبيرة وأنا كنت عايزة اتكلم على الموضوع ده بس الظروف عطلتني

كان فيه برنامج بيذاع على mbc4 اسمه The Moment of Truth أو لحظة الحقيقة

أكيد أغلبكم سمع عنه أو شاهده

فكرة البرنامج عبارة عن شخص بيتقدم للبرنامج ويجاوب على عدد كبير من الأسئلة ويكون على جهاز زي جهاز كشف الكذب يقيس ردود أفعاله ويحدد مدى صدقه

ثم يتم سؤاله مجموعة من الأسئلة دي على الهوا وقدام كل الناس وتتقارن اجاباته باجاباته السابقة ويشوفوا هل هو بيكذب أو لاء

وده بيتم على الهواء مباشرة وفي وجود جمهور كبير في الاستديو مع وجود عدد من أهل أو أصدقاء الشخص المشارك واللي بيكون من حق كل واحد منهم أنه يعترض على سؤال من الأسئلة الموجهة للشخص المشارك

والأسئلة بتكون على مجموعة مستويات وكل مايزيد المستوى بتزيد صعوبة الأسئلة ومن حق المتسابق يوقف في أي وقت ويكتفي بالمبلغ اللي وصل له لأنه لو كذب في اجابة سؤال هيخسر كل المبلغ اللي كسبه

إلي هنا وكله تمام لكن اللي لفت نظري بقى هو طبيعة الأسئلة اللي بتتسأل للشخص المشارك في البرنامج

واللي هي عبارة عن أسئلة شخصية جدا و من الصعب الاجابة عنها على الملأ

يعني مثلا

هل تعتقد أن والدتك متسلطة وبتتحكم في كل شئون حياتك؟؟

هل تعتقد أن والدك كان المتسبب الرئيسي في فشل زواجه هو و والدتك؟

هل حدث وأعجبت بفتاة وأنت مرتبط بخطيبتك؟

هل سبق وأخذت بقشيش في مقابل تقليل فاتورة الحساب- السؤال كان لشاب يعمل نادل- ؟

هل سبق وسرقت المال من حافظة والدك؟

هل تعنقد أن أصدقائك أغبياء؟

هل تكره التواجد مع أهل زوجتك؟

وأسئلة تانية كتير من هذه النوعية وبعضها شديد الخصوصية ولا مجال لذكره هنا

لكن بصفة عامة ومن حيث المبدأ

ما رأيكم في هذا البرنامج؟

هل تعتبره برنامج جيد وبالتبعية هل تقبل بالمشاركة فيه ؟

أنا شخصيا معجبتنيش فكرته وبالتالي محبش أشارك فيه

لأني أولا شايفة أن في درجة معينة من الخصوصية بيتمتع بيها أي شخص وغير منطقي أني أطلع على الهوا وأقول أدق تفاصيل حياتي الشخصية

ثانيا حتى لو كنت شايفة في الناس اللي حواليا حاجات معينة مش هينفع أطلع على الهوا وأقولها

يعني بيتهيألي في حاجز معين في العلاقات الانسانية المفروض ما نجتازهوش وإلا مش هنعرف نرجع تاني زي ما كنا

ولو وقفت في وش أعز صديق ليك وصارحته بشيء أو حاجة ما ممكن تكون النتيجة بعد البرنامج أنك تكون كسبت كام ألف دولار بس خسرت صديق عمرك

والمعادلة دي خسرانة في نظري

ولا أنتوا رأيكم أيه

هناك ٤٠ تعليقًا:

  1. اولا انتى فين يا بنتى من زماااااااان؟؟
    وحشتينا بجد

    ثانيا البرنامج الغلس ده بصرف النظر عن اسئلته الجنسيه الى بتمثل 80% من الاسئله الا انه برنامج كافى جدا لهدم اى علاقه كويسه

    فى حاجات عندنا لو عرفها الناس عننا مش هيكلمونا خالص مالص فالص

    ربنا سترنا بستره ودول بيفضحو الستر وكلها حاجات يخجل الواحد انه يعترف بيها

    اقولك ابيات شعر بحبها اوى للقحطانى

    أنت الذي أطعمتني وسقيتني ... من غير كسب يد ولا دكان
    وزرعت لي بين القلوب مودة ... والعطف منك برحمة وحنان
    ونشرت لي في العالمين محاسنا ... وسترت عن أبصارهم عصياني
    وجعلت ذكري في البرية شائعا ... حتى جعلت جميعهم إخواني
    والله لو علموا قبيح سريرتي ... لأبى السلام علي من يلقاني
    ولأعرضوا عني وملوا صحبتي ... ولبؤت بعد كرامة بهوان
    لكن سترت معايبي ومثالبي ... وحلمت عن سقطي وعن طغياني
    فلك المحامد والمدائح كلها ... بخواطري وجوارحي ولساني

    ردحذف
  2. ازيك يا هبه , اتمني تكوني بقيتي احسن دلوقتي ..

    بصراحه انا اصلا مش متابع القناه دي , بس من خلال كلامك طبعا جه في بالي برنامج كان بيجي علي اسلوب الكاميرا الخفيه انك ممكن تعمل اي حاجه مقابل الفلوس ..

    هو نفس التفكير انت اتفشي اسرار خاصه جدا واكيد اتخسر ناس قريبين منك مقابل تحصل علي اكبر قدر ممكن من المال ..

    حمدالله علي السلامه يا هبه وان شاء الله متغبيش تاني

    سلامممممممممممم

    ردحذف
  3. اولا حمد الله على السلامه
    ثانيا متفق معاكى تماما
    مش من حق حد انه يعرف اسرارنا على الملأ كدا

    ردحذف
  4. السلام عليكم

    اولا زعلان منك جدا

    لانى كتبتلك فى الشات تطمنينا على والدك

    ومتكلمتيش

    رجاء طمنينا على والدك

    ونتمنى نشوفك فى اجتماع المدونين

    اللى هيكون فى اسكندريه

    امابخصوص البرنامج


    دى اغلبها برامج الفضائيات

    هايفه
    وهمها الاعلانات

    وميهمش الاعلانات تيجى ازاى

    تحياتى

    ردحذف
  5. بجد يا هبة فرحت اويييييي لما لقيت الكومن بتاعك عندي
    حمدلله علي السلامة
    وحشتني كتاباتك اوي ووحشتني تعليقاتك وراجعه بموضوع شيق وانا فعلا دا اللي فكرت فيه لما شفت البرنامج

    بس انا ما عرفتش اوصل لقرار
    انا شايفة ان فيه حاجات ما تهمش حد انه يعرفها غيرك , اشياء خاصة زي منا قلتي , ممكن اتنين يخسروا بعض بسبب الحقيقة , بس من ناحية تانية شايفة ان ايه المشكلة , وان لو الناس بتتعامل فعلا بصراحة وحقيقة خالصة وتسامح وتفهم خلاص مفيشس مشكلة
    مفيش انسان مش بغلط ومفيش انسان ملاك لو فكرنا بالطريقة دي هلاقي ان مفيش مشكلة.
    المفروض ان الصراحة تكون هي طريقة التعامل بين الناس


    بس هاقولك حاجة تانية يمكن احنا مجتمعنا هنا مختلف عنهم
    التفكير نفسه مختلف علشان كدة لو برنامج زي دا عندانا مش هينجح

    ولحد دلوقتي انا فعلا مش عارفة احدد اذا كنت ممكن اقبل المشاركة في برنامج زي دا ولا لأ

    ردحذف
  6. أخيرا بوست...نورتى المدونة تاانى :)))

    مدونتك بتلعب معايا قط و فار أدخل امبارح ملاقيش البوست أدخل النهارده ألاقيه
    شوفى يا هبة مهما كان الواحد بيحب اللى حواليه أكيد ليه عليهم تحفظات كتير و حاجات مينفعش تتقال لأن طبيعتنا كبشر اننا بنطلع عيوب أى حاجة بنشوفها قبل مميزاتها من باب الاحساس بالتميز و بنغلف الحاجات دى كلها بحدود بتبعد الناس و بتحبس الحاجات دى جوانا و أحيانا بتحبسنا احنا كمان معاها
    بس فى حالة البرنامج ده الناس دى قبلت انها حتى تحرج نفسها و تبين جانبها الوحش بس عشان حبة فلوس...دى حبة شجاعة حفزها كام ألف دولار و فى بعض الحلقات و لا مليم...بس أكيد هما كسبوا و اللى حواليهم كسبوا
    البعض طلع وشه المنحرف و الكداب أوى و بانوا و حشين جدا قدام نفسهم قبل أى حد
    و البعض بعد عن حد وحش جدا مينفعش يبقا فى حياته و ده فى حالة أسر المتسابقين...و انا بعتبر ده مكسب للطرفين يمكن يحسو بالغلط اللى عندهم لما يخرجوا من البرنامج ايد ورا و ايد قدام لأنهم كدبوا على نفسهم
    و فى النهاية احنا مش ملايكه بس فى حاجات لازم متتعرفش و متتعملش تحت أى ظرف من الظروف

    و فى الحقيقة أنا مش عارفة ليه الناس مهوسين بالبرنامج ده برغم انه مقزز جدا

    لكيت كتيــــــر بس كان نفسى أقول الكلمتين دول من زمان....عليكى مواضيع يا هبة...فى الجون و الله
    :))

    نورتى و سلامات

    ردحذف
  7. اولا انتى اخيرا نزلتى بوست جديد هنعمل فرح ونعلق نور وكده يعنى
    تانى حاجه انا مش هخصر صاحبى ولا الفلوس عارفه ازاى
    الطمطمايه فى كام بزه ؟

    ردحذف
  8. بطوط حبوب

    معلش ظروف يا فندم والله

    جميلة جدا الأبيات اللي حطيتها

    بتعبر عن اللي عايزة أقوله فعلا

    نورتنا يا دكتور

    ردحذف
  9. الفارس الملثم

    أنا بخير الحمد لله

    هو البرنامج مش شبه الكاميرا الخفية أوي

    هو التعبير اللي يناسبه وأعذروني في اللفظ هو فرش الملاية لنفسك وللأخرين في نفس الوقت مقابل بعض المال

    وهي فكرة لن تروق غالبا لأي شخص يحترم نفسه

    نورت المدونة يا محمد

    ردحذف
  10. blue-wave

    الله يسلمك

    الموضوع مش موضوع اسرارك الشخصية فقط لأن اللي بيشارك ممكن يقول على اسارا أشخاص تانين ما قبلوش أنهم يدخلوا اللعبة

    شكرا على مرورك

    ردحذف
  11. أحمد

    أولا أنا طبعا مقصدتش أزعلك خالص هي الظروف اللي متلغبطة

    وبعدين أنا رديت عليك فعلا في الشات بوكس

    بس أنا لما غيرت المدونة رفعت الأكواد ورجعتها تاني وكان عندي مشكلة في التعليقات بس الحمد لله اتحلت

    وأنا بجد متشكرة على اهتمامك وسؤالك

    بصراحة يا جماعة أنتوا كلكم احرجتوني بذوقكم

    ربنا خليكوا


    وبالنسبة للبرنامج

    البرنامج غربي على فكرة والفكرة لم يتم تمصريها وما أعتقدش أن ده هيحصل أصلا

    نورتنا يا أحمد

    ردحذف
  12. سنووايت

    ربنا يخليكي

    دايما بترفعي معنوياتي كده

    بصي يمكن أنا مقدرتش أوصل قصدي كويس

    أنا مش بتكلم على الصراحة في حد ذاتها

    أنا معاكي أن الصراحة مطلوبة مع الذات قبل ما تكون مطلوبة في التعامل مع البشر

    بس اللي بيحصل في البرنامج مش صراحة أو ده جايز نوع جديد منها معداش علينا قبل كده

    صراحة وقحة وغير محمودة لو فاهمة قصدي

    علشان كده أنا خدت القارا بسهولة أن مشاركش في حاجة زي كده

    نورتيني يا قمر

    ردحذف
  13. Saydalanya Mat7oona

    يمكن يكون البرنامج وسيلة تقييم ذاتية للشخص

    يعني بيعرض حقيقتك وحقيقة المحيطين بيك بشكل مباشر وبطريقة ممكن متكونش فكرت بيها قبل كده

    ويمكن ده يكون حافز للتغيير ولو أني معتقدش

    سعيدة أن الموضوع حاز على إعجابك

    نورتيني

    ردحذف
  14. محمد

    ربنا يخليك

    أنتوا اللي منورين المدونة بتعليقاتكم

    هتحلها بطريقة الطماطماية فيها كام بذرة

    امممم..

    ربنا معاك

    نورتنا يا محمد

    ردحذف
  15. طب اعمل فيكى ايه


    بتكلم عربى والله

    باباكى صحته عاملا ايه ؟؟

    sukar_184@yahoo.com

    ابعتيلى رساله ياهبه

    تحياتى

    ردحذف
  16. هبة

    انتي فين يا بنتي
    طبعا يا بنتي
    انا معكي
    ماذا يفيد المرء لو ربح العالم وخسر نفسه

    بس عارفة ؟
    نفسي اطلع ع الملا عشان
    اقول الناس كلها
    اد ايه انا بحبها
    بحبها هي بس
    نسرين

    ردحذف
  17. أحمد

    بابا الحمد لله بخير بيعمل علاج طبيعي دلوقتي على ايده ورجله الشمال وربنا يتم الشفاء

    ربنا يخليك يا أحمد

    ويوفقك دايما

    ردحذف
  18. ساعد نسرين الأيمن

    أنا موجودة يا فندم بس الظروف كانت مش قد كده

    المهم كيف حالك وحال نسرين

    وبالنسبة لموضوع البرنامج

    أكيد نسرين مش محتاجة البرنامج علشان تعرف قد ايه أنت بتحبها

    ردحذف
  19. ازيك يا هبة
    نورتى المدونة تانى
    تصدقى يا قمر كنت فكرت اعمل بوست زى دة بس اتشغلت شوية
    المهم انه فعلا البرنامج استفز حد انه يتكلم عنه

    البرنامج مستفز جدا وبيدمر علاقات كتير وفعلا اغلب اسئلته مش كويسة
    يعنى واحد يقعد يشوف مراته بتتسأل كدة ويعرف انها عملت وعملت وعملت لا ويسقف لها لما تجاوب صح
    وممكن يكون السؤال دة مهين له كرجل
    البرنامج وحش جدا جدا
    وبجد بين ان المجتمع دة مجتمع بايظ جدا جدا
    اهم حاجة اننا منلقاش كمان كم يوم برنامج مصرى زيه لان فى ناس اكيد فكروا يعملوا كدة
    ربنا يستر والا هتبقى مذبحة

    ميرسى كتير على البوست

    ردحذف
  20. دراما كوين

    منوارني يا قمر

    فعلا أنتي عندك حق في نوعية الأسئلة اللي بتتطرح في البرنامج بتكون مخجلة جدا فعلا

    ومع ذلك الناس بيكون معندهاش مشكلة في الاجابة

    يمكن ده بسبب اختلاف المجتمع

    ممكن يكون هما يقبلوا حاجة احنا منقبلهاش

    ردحذف
  21. هبه كدا كتيييييييييير اوى بجد انتى فين؟؟
    عودى يا هامييييييييس

    ردحذف
  22. محمود

    أزيك

    أنا موجودة والله بس عندي مشكلة في الوصلة فبدخل من الشغل على السريع بس متابعاكم والله وموجودة

    ردحذف
  23. بعد السلام

    و الله يا هبة انا شايف ان العالم دى فاضية جدا هما مش لاقيين حاجة يعملوها
    لانهم وصلوا لمرحلة متقدمة جدا من الاشباع ف كل شىء ف الحياة
    مواصلات , ماكل, ملبس ,مسكن ....الخ

    اعتقد ان الفكرة ساذجة جدا و مالهاش لازمة خالص

    تحياتى

    ردحذف
  24. كفراوي

    ممكن يكون السبب زي ما بتقول إن الناس دي خلاص معندهاش مشاكل ولا حاجة تشغلها ويمكن لأنهم عندهم نسبة حرية كبيرة مش متوفرة في مجتمعنا

    بس أنا معاك أن البرنامج مالوش لازمة

    ردحذف
  25. يمكن فكرة البرنامج الأساسية إنه يقنعك إن فيه حاجات كتير أهم من الفلوس .. يعني المتسابق اللي بيخسر أهله و حبيبته و أصدقاءه لمقابل مادي يبقى خسران في الأول و في الآخر .. و الدليل إنهم بيجيبوا التغير اللي حصل في علاقات المتسابقين بعد خروجهم من البرنامج
    و لكن أيا كان المغزى لا يجب أن يكون التقديم بهذا الشكل .. لأن ذلك يعارض ما يحث عليه الإسلام من الستر ، و إخفاء الزلات ، وكتمان العيوب .
    إذ أن إفشاء ينشر الفاحشة
    و كما قال رسول الله صلى الله عليه و سلم : من ستر مسلما(أي رآه على قبيح فلم يظهره للناس) ستره الله في الدنيا و الآخرة ..

    مجرد رأي

    شكرا لك و تقبلي مروري الأول

    ردحذف
  26. ادعوكم لزيارة مدونتى المتواضغة والمساهمه بتعلقاتك وارائك
    www.eyuon.blogspot.com
    وشكرا

    ردحذف
  27. قطرات من شواطئ الحياة

    البرنامج فعلا يتناقض مع تعاليم الإسلام وتقاليد مجتمعنا

    وضرره أكتر بكتير من نفعه

    تحياتي ليك

    وياريت متكونش دي زيارتك الأخيرة

    ردحذف
  28. المهاجر إلى الله

    شكرا على مرورك

    ويسعدني بالتأكيد زيارة مدونتك

    تحياتي

    ردحذف
  29. هبة
    الحبيبة
    عودة جميلة تغفر طول الغياب
    والله افتقدنا موضوعاتك النابضة بالحياة جداً ..

    أما عن البرنامج ده فللأسف هى دى طبيعة البرامج القائمة على فكرة "الاعترافات" المأخوذة بحذافيرها عن برامج أجنبية ..علشان كدة لما اتقدمت فى الدول العربية واجهت انتقادات لأن أسلوب معالجتها استفزازى بالنسبة لعاداتنا وتقاليدنا .. ومع ذلك فيه ناس كتيييير بتشوف البرنامج ده .. احنا كدة .. عايشين حالة فصام مزمنة


    طلتك علينا بالدنيا وما فيها
    كل أيامك أفراح يا جميلة

    ردحذف
  30. مها

    منورة المدونة

    فعلا سبب عدم نجاح البرنامج هو اختلافه مع عاداتنا وتقاليدنا

    بس فعلا على رأيك فيه ناس بتحب تشوفه

    يمكن ده للسبب اللي كان بيقول عليه دكتور أحمد خالد توفيق إن الناس تحب تتفرج على فيلم رعب وبتحس بلذة الخوف والرعب بس وهما متطمنين أن ده مش هيحصل معاهم

    تحياتي ودمت بخير

    ردحذف
  31. حمدلله على سلامتك يا هبه
    لكى وحشة جامدة و الله

    بخصوص البرنامج
    فانه برنامج تافه تافه يا ولدى

    ردحذف
  32. أهلا بيكى دأئما أنتى مسجله عندى على البلوج فى مدوناتى المفضلة
    وقد علقت على تشريفك

    ردحذف
  33. السلام عليكم

    كيف حالك أختى الحبيبة أسال الله أن تكونى دائما بخير ووحشتنى زيارتك وتعليقاتك فشكرا لقدومك أخيرا لزيارتى

    أنا شفت البرنامج اللى كتبتى عنه وده طبعا مقدمة لنوعية برامج تانية بتقتل القيم فينا وتبقى الأباحة وقلة الحياء شجاعة تستحق عليها التقدير والاعجاب وكمان الفلوس ,وربنا بيستر على عباده فى الدنيا رحمة بهم لكن هذه المجتمعات بتحب الفضايح زى عنيها

    من رحمة ربنا بالمسلم أنه يوم القيامة يدنيه منه وهو يذكره بالذنب الفلانى والذنب الفلانى حتى يظن المؤمن انه هالك فيقول له الله سبحانه وتعالى ما معناه لقد سترتها لك فى الدنيا واليوم أغفرها لك والعفران معناه عفو مع محو الذنب
    فالحياء من الذنب والاستعفار منه يجعل الله يغفره لنا أما الجهر به والزهو بالبجاحة فهو أمر المفروض ألا ينهجه المسلم فيا رب الطف بينا ويسامح من صدر لنا هذه البرامج والأفكار التى تهدم كل الأخلاق
    أحييك على طرح هذا الموضوع وحياءك لعدم عرض كل نوعية الأسئلة

    وكل عام وأنت بخير بمناسبة شهر رمضان المبارك

    ردحذف
  34. مبروك على النيولوك الجديد وعموما بوست هايل بس انتى بخيله يا هبه ياريت تبقى تكتبى اكتر ؟

    ردحذف
  35. كل سنه وانتي طيبه يا هبه

    رمضان كريم

    ردحذف
  36. Rania

    الله يسلمك يا جميل

    ويارب تكوني بخير دايما

    بالنسبة للبرنامج فهو زي ما قلتي بالظبط

    تحياتي يا قمر

    ردحذف
  37. mohamed

    أهلا بيك في المدونة يسعدني مرورك وتشريفك

    وسعيدة أن المدونة في قائمة مفضلاتك

    دمت بخير

    ردحذف
  38. مجداوية

    والله أنتي دايما على بالي بس هي ظروف

    المدونة فعلا نورت بردك ومرورك

    وردك كالعادة بيعكس شخصيتك المثقفة الملتزمة

    تحياتي

    وكل سنة وأنتي بخير

    ردحذف
  39. محمد

    والله ما بخل هي ظروف بس مش أكتر

    كل سنة وأنت طيب

    ردحذف
  40. محمد

    كل سنة وأنت طيب

    ربنا يتقبل منك صالح الأعمال

    ردحذف

اتكلم براحتك أنت في مدونة ديموقراطية جدا واخد لي بالك