الأربعاء، ١٤ مايو ٢٠٠٨

خلع ولا .....

-1-

كنت في عيادة دكتور أسنان النهاردة علشان بعيد عنكم عندي درس مسوس

المهم كانت فيه واحدة و زوجها قاعدين وزوجها قال لها لو قال حشوهنقول له عايزين خلع ردت عليه وقالت له آه مش هنحشيه هنخلعه

الموقف وجعني أوي بصراحة تخيل أنك تضطر علشان ممعكش فلوس أو عايز توفر فلوس أنك تخلع درسك خالص بدل ما تحاول تعالجه

أنا عارفة طبعا إن الموضوع هيكلف لأني بمر بخطواته دلوقتي وعارفة إن الدكتور عمال يوديني ويجيبني علشان الحساب يتقل كنوع من الاستغلال

يا ترى لو مكنش معايا فلوس كنت هأعمل ايه

كنت هأخلع أنا كمان ؟؟؟

ويا ترى لو الواحد لا قدر الله صابه مرض عضال هيبقى معاه فلوس يتعالج ولا هيتخلع من كشف الأحياء لإن اللي ممعهوش مايلزمهوش

-2-

فيه بنت قريبتي من بعيد

كانت رايحة الدرس وراكبة مشروع (وسيلة مواصلات عامة) ماشي في طريق رئيسي مش حتة متطرفة ولا في زقاق ولا حتى عشوائيات

وجه واحد لابس ظابط وقف المشروع وكان مصر ينزلها من غير ما تكون عملت حاجة

ولما البنت طلعت ناصحة ورفضت تنزل حاول يعرف رقم موبايلها فقالت له معيش طبعا مصدقهاش ومرضاش يسيبها غير لما واحدة من الركاب قالت أنها والدتها

من ساعتها ووالدها بيوديها كل يوم الدرس ويرجعها

ومن ساعتها وأنا بقول هل المفروض أخاف أنزل الشارع وأمشي في الطريق العام وفي عز الضهر

القصة حقيقية وأنا متأكدة منها

-3-

شاب بيشتغل زي مندوب مبيعات بيعدي على الصيدليات يحصل فلوس

فيه ناس خدت بالها منه وراقبته وقتلوه علشان يسرقوا الفلوس

أنا معرفوش ومعرفش والدته بس القصة وصلتني لإن والدته زميلة لقريبتي في الشغل

القصة مكررة بس تزيد احساسك بعدم الأمان

-4-

شفت إعلان في التلفزيون عن طفل صغير بيسرق شنطة

صاحبها بيجري وراه وبيمسكه ويضربه

الشنطة بتقع وبتعرف إن فيها عيش ( سرق علشان يأكل)

الشباب اللي قي الشارع دفعوا تمن العيش لصاحب الشنطة بس واحد منهم شيل الولد شنطة تقيلة جدا وقاله لو عايز العيش يبقى لازم تشتغل

طبعا مغزى الإعلان واضح السرقة مش الحل

بس معرفش ليه محبتش الإعلان ده

يمكن علشان حسيت بالقسوة لما الطفل الغلبان شال شنطة ضعف حجمه في مقابل أنه يحصل على رغيف حاف

-5-

أجرة المشروع غلت لإن البنزين غلى

وكل حاجة غلت مع أن والحمد لله لسه مقبضناش الزيادة المزعومة

واللي عرفت دلوقتي أنها هتطلع من جيبي مباشرة

علشان ترجع لجيبي أول الشهر ومنه إلي الحكومة والتجار

سيبك أنت المهم إن منيو الخمسة لسه بخمسة

-6-

ما أعرفش ليه بمر بأوقات بحس فيها أني عايزة أخلع ... خالص

هناك ١٥ تعليقًا:

  1. سعيدة اني اول من يرد علي الموضوع
    ورغم انه موجع جدا ورغم اني اصابتني نفس الحالة دي من فنرة قريبة وامتنعت عن النزول من بيتنا لمدة اسبوع لاني حاسة بعدم الامان , بس قدرت اخرج منها وان كنت في انتظار اني اخلع خالص

    لما في اسبوع واحد اسمع ان المنطقة عندنا حصلت فيها 3 حالات سرقة بالاكراه وفي وضح النهار وشباب اللس اتسرقوا وواحد منهم اصيب بجرح قطعي في ذراعه اصابة خطيرة علشان تتسرق محفظته اللي يمكن اكتر ما كان فيها ما يزيدش عن 50 جنيه

    يبقي ازاي اقدر انزل بعد كدة من بيتنا وانا مطمنة!!

    والله يا هبة لو قلت لك اني بكره شيء اسمه الفلوس هيبقي قليل عن احساسي اللي حاساه ناحيتها لان هي سبب كل اللي احنا عايشينه ده ومش عارفة الامور هتوصل لاكتر من كدة ايه , قتل وسرقة وفقر وابتزاز وقرف
    ربنا يرفع مقته وغضبه عنا
    وباحييكي علي الموضوع اللي جمعتي فيه حالنا الايام دي في قصص بسيطة ولكنها بتقول كتير

    ردحذف
  2. اتخلعي تروحي فين يا هبه ههههههههه

    دلوقتي مفروض الواحد قبل ما يقرر يمرض يشوف معاه فلوس ولا لا فالمرض دلوقتي بقي مرض وخراب ديار..

    قصة البنت اللي حكتيها دي فكرتني بفيلم شهير وخوف وسلبية الناس كان المحرك لماساة بطلة الفيلم ,لاننا بقينا بنشوف جرائم بتحصل في وضح النهار وبنلاقي ناس بتتفرج علي اساس مبدا خليني في حالي وامشي جمب الحيط اسلم ..

    بالنسبه لاعلان الطفل ,قال بعد ما البلد كلها اتنهبت جايبين اعلان عن طفل سرق شنطه ..

    مستنين بوستاتك باستمرار كده , ومتغبيش تاني ..

    محمد

    ردحذف
  3. بالنسبة للموضوع رقم واحد
    فعلا اللى معهوش ميلزموش وكله بينتش من كله
    وبالنسبة للموضوع التانى
    حاميها حراميها(مفهوم طبعا فى الموقف دة عاوز يسرق ايه)
    بالنسبه للموضوع التالت
    الجعان يعمل اكتر من كدة
    والموضوع الرابع
    انا هبقى قاسية شويه انا ميصعبش عليا اللى سرق او الفاسد او الصايع
    يا اما يشتغل يا اما يكون انسان محترم وهو مش محترم فيشتغل لحد ما يتعلم انه يكون محترم
    الموضوع الخامس
    علاوة فشنك
    الموضوع السادس
    لما انتى تخلعى وغيرك يخلع مين هيلفت نظرنا للكلام دة
    الموضع السابع
    واحشانى جدا

    ردحذف
  4. سنووايت

    المشكلة مش في الفلوس في حد ذاتها

    المشكلة في القيمة اللي الفلوس بتمثلها

    يعني تخيلي لو كل حاجة رخيصة ومتوفرة ساعتها الفلوس مش هتمثل مشكلة ومش هتبقى الحاجة الأساسية اللي كل الناس بتفكر فيها

    لكن لأن كل حاجة غالية وصعبة المنال .. الفلوس حازت على اهتما أكبر من الناس علشان يقدروا يفروا متطلباتهم

    تحياتي

    ردحذف
  5. الفارس الملثم

    حمد الله على السلامة يامحمد

    يارب تكون أحسن دلوقتي

    اللي ممعهوش مايلزموش هي القاعدة دلوقتي حتى في الصحة والمرض

    وكمان بقت في التعليم لأن سمعت أن المصاريف هتغلى وهيخلوا مدارس مخصصة لمحدودي القدرات العقلية والمادية

    يعني التعليم هيرجع تاني مقتصر على الطبقة العليا

    موضوع خليني في حالي ده عندك حق فيه

    كل الناس تقريبا بقت بتعمل بالمثل ده حتى أنا ساعات للأسف

    بالنسبة للموضوعات فلو عليا أنزل موضوعات جديدة

    بس أكيد أنت شايف المدونة نايمة خالص

    تحياتي

    ردحذف
  6. صحفية روشة

    أولا أنتي كمان وحشاني جدا

    عندك حق في كل اللي قلتيه

    بس موضوع السرقة ده أنا معاكي فيه وهي حرام طبعا بس لما طفل صغير زي ده يجوع هيبقى مطلوب منهيعمل ايه غير كده

    تحياتي

    ردحذف
  7. أخيرا

    3 كومنتات

    أحمدك يارب

    اللهم أحفظها نعمة

    ردحذف
  8. الحال اكيد يسد النفس
    انا مش عارف اصتدمتي بالحوادث دي في فترة زمنية قريبة قوي كده عن سوء حظ ولا ؟؟!!
    هو مش سوء حظ
    للأسف ده الغالب
    هو ده طبع المجتمع دلوقتي
    والليمتضرر يخلع
    ايوة
    كل حاجة بتنادي وتقول اخلع
    يا يمين عالخليج نبيع جاز ونشتري جاز
    يا شمال على اللي ما تتسمى نبيع نفسنا ونشتري تشيزبرجر
    يا اما نخلع عند اللي خالقنا
    ربنا يصبرك ويصبرنا

    ردحذف
  9. ايه نشرة اخبار وجع القلب دي ع الصبح


    انا معدي اسم في امان والله .. معملتش حاجة


    :)

    ردحذف
  10. أحمد سلامة

    هو جايز يكون سوء حظ أني أصادف كل المواقف دي مرة واحدة

    أنا عارفة أن كل ده موحود بس لما تقابله متجمع بتبقى كارثة

    ربنا يصبرنا جميعا

    شكرا على مرورك وياريت متكونش أخر مرة

    ردحذف
  11. محمد العدوي

    أهلا بيك

    معلش بقى حظك جه في البوست النكد ده

    بس هنعمل ايه

    الدنيا كلها كده دلوقتي

    دمت بخير

    ردحذف
  12. وجعتى قلبى .. ربنا يشفى كل الناس

    زورينى

    تحيــــاتى
    المصــــــــرى

    ردحذف
  13. ألف سلامة عليكى يا هبة....عارفة غلاسة دكاترة السنان و مشورة الحشو...التى فى الغالب ما تنتهى بعمل طربوش زيادة فى استغلالك مش أكتر و الواحد بينتهى قرطاس.....
    يالا ما علينا :)
    تصدقى يا هبة ان واحدة صاحبتى اتقلبت و هى مستنية الشفوى...و المفروض ان اللى قلبتها دى هتبقا صيدلانية و كده
    بصراحة انا معنديش تعليق ع البوست بتاعك....غير ان فعلا كل ده و منيو الخمسة لسه بخمسة
    تحياتى ع البوست ده

    ردحذف
  14. almasry

    أكيد هزور مدونتك إن شاء الله

    شكرا على المرور

    ردحذف
  15. Saydalanya Mat7oona

    أنا رأيي كده برضه

    مدام منيو الخمسة لسه بخمسة كله هيبقى تمام

    منوارني دايما

    ردحذف

اتكلم براحتك أنت في مدونة ديموقراطية جدا واخد لي بالك