الأربعاء، ١٤ مايو ٢٠٠٨

تـــاج

فيه تاجين من الفارس الملثم

التاج الأول

النسخة العربية من التاج اللي جاوبت عليه في البوست اللي فات واللي مطلوب فيه أني أقول 10 عن نفسي

1- أنا كسولة جدا جدا وده عيب خطير ومضر بس للأسف مش عارفة أتخلص منه.

2- أنا حساسة أو زي أصحابي ما بيقولوا عليا قماصة بس أنا مش بعتبرها كده يمكن يكون السبب أنك كل ما بتزيد علاقتك بشخص بتزيد نسبة توقعك لحاجات معينة منه ولما ده مش بيحصل أو بيحصل عكسه لسبب أو لآخر بتتضايق بس في المقابل أنا مش بشيل حاجة لحد وسهل أوي أني أنسى وزي ما أقل حاجة تزعلني أبسط حاجة ممكن ترضيني

3- بحب القراية جدا بس مؤخرا مبقتش لاقية وقت أمارسها

4- بحب حاجة أسمها دراما وأعشق مشاهدة الأفلام .. تخيل مئات العوالم التي لم تشاهدها والمواقف والاحاسيس التي لم تختبرها .. عالم سحري زي صندوق الدنيا يخليكي على مدى ساعتين تتوحد مع الشخصيات اللي بتابعها

5- نفسي طويل ومش بيأس بسهولة بس لما بكون عايزة ده .

6- مؤمنة بالحب جدا ومش عارفة ليه متخيلة نفسي نجوى في شقة مصر الجديدة مع إن أنا عارفة أني مش جميلة ولا دمي خفيف ولا أيتوها حاجة من مواصفات بطلات الأفلام الرومانسية وغالبا هكون سعيدة الظ لو ربنا كرمني بجوازة صالونات تنقذني من لقب عانس في ظل هذا الزمن السعيد

بس أنا عندي أمل برضه

7- عمري ما فهمت الاشارات واللي كان يحاول يغش مني في اللجنة كنت ممكن أفضحه وأفضح نفسي لأني مش ببقى فاهمة غالبا هو بقصد ايه بأشارته .. ممكن يكون ده أحد أنواع الغباء

8- بحب البحر جدا وبالذات في الشتا بس مبعرفش أعوم ولا عمري نزلت الميه حتى

9- أنا مش بحلم كتير بس ساعات من أحباطي بحلم بحاجات حصلتوأنا بعيد صياغتها في أحلامي من جديد علشان تكون زي ما اتمنتها تحصل أو بحلم بحاجات محصلتش وكنت اتمناها تحصل

10- لما بأكل فلفل أخضر حامي بتجيلي نوبة زغطة جامدة مش بترضى تروح بسهولة.. دي الصنف الوحيد اللي قدر يقهرني من بين كل الحاجات اللي بتتاكل

بعد ما قريت الكلام اللي أنا كتباه حسيت أني شخصيتي معقدة مش عارفة ليه؟!

طبعا مصر كلها ردت على التاج وبالتالي مفيش حد معين هأمرره ليه بس اللي حابب يججاوب عليه يتفضل


التاج التاني بتاع الصور

أسمك

استضافة الملف بواسطة

حيوان أليف تملكه

استضافة الملف بواسطة

أوصف شكلك

استضافة الملف بواسطة

ماذا تقود

استضافة الملف بواسطة

الحالة الاجتماعية

استضافة الملف بواسطة

البرنامج التلفزيوني المفضل

استضافة الملف بواسطة

فيلمك المفضل

استضافة الملف بواسطة

الحالة المزاجية

استضافة الملف بواسطة

المطرب المفضل

استضافة الملف بواسطة

محل الإقامة

استضافة الملف بواسطة

محل العمل

استضافة الملف بواسطة

حتعمل ايه النهارده وعملت ايه امبارح

استضافة الملف بواسطة

الحلوى المفضلة

استضافة الملف بواسطة

والتاج ده برضه كل اللي يحب يجاوب عليه يتفضل

وكل تاج وأنتم طيبين

هناك ١٨ تعليقًا:

  1. بداية يا هبه انتي بقيتي فعلا بتغيبي كتير ونتمني يكون السبب خير ..

    كمان انتي نزلتي بوستين في وقت واحد ليه انتي متديش حقه خالص من المشاهده , رغم ان اجاباتك جميله بجد وعفوية , واقلك ملاحظاتي عليها .

    انا شايف بداية انك بتتحاملي علي نفسك في بعض الاجابات وكلنا علي فكره بنحمل شخصيات بتكون صعبة الفهم بالنسبه للاخرين , ويمكن كتير من اجاباتك تشبه شخصيتي ..

    عارفه حكاية الغش في الامتحانات دي فكرتني بنفسي فانا لخمه اوي في الحاجات دي وكنت بشوف انها موهبة مش عندي ..

    بالنسبه لحكاية الصور دي بصي في بعض المواقع اللي بترفع الصور مفروض ترفعي الصوره عليها وتاخدي رابط تحطيه في المدونه لكل صوره , ولو مش عارفه ممكن اقولك علي بعض المواقع ...

    اه ..

    ابقي ارد علي البوست التاني بكره وان كنت شايف تاجليه شويه لغاية ده لما ياخد حقه من الرد

    تحياتي
    محمد

    ردحذف
  2. محمد

    أنا شيلت البوست الجديد لحد ما ده يأخد حقه

    مش عارفة هل أنا متحاملة على نفسي فعلا ولا ده مجرد وصف للواقع مش أكتر

    ساعات بحس أني المفروض أتغير وساعات بحس أني كده كويسة جدا والمفروض الناس تقبلني كده زي ما أنا

    موضوع الغش ده طول عمري فاشلة فيه وكنت لخمة فيه جدا

    علشان كده طول عمري لا كنت بغش ولا بغشش

    بالنسبة للصور

    أنا لما بجي أضيف صورة في البوست بتطلع فوق قبل الكلام ومش بعرف أحطها في النص بين الكلام

    أنا بحط الصور من خلال الايقونة اللي بتبقى موجودة وأنا بكتب البوست

    بيتطلع الصورة فوق خالص ومش في وسط الكلام

    على العموم هبقى أحاول تاني

    ردحذف
  3. بالنسبه يا هبه لموضوع الصور ,انا كنت بعمل كده الاول زيك , بس ده ما ينفعش في وضع اكتر من صوره ,,

    انتي اتدخلي موقع رفع الصور ده

    http://www.3tt3.net/up/

    واترفعي الصور من جهازك , وايديكي الموقع تلات روابط للصوره , انتي اتختاري الرابط التاني وتحطيه في مدونتك في اي مكان تحبي , وممكن تشوفي تنسيق الصوره قبل النشر من خلال ائلاف

    علي فكره جوجل بيديكي في حسابك مساحه لرفع صورك بس خطوات وضع صورك مختلفه شويه...

    اتمني اكون قدرت اشرح بصوره جيده ..

    تحياتي وتقديري
    محمد

    ردحذف
  4. السلام عليكم

    ازيك ياهبه

    طمنينا عليكى وعرفينا سبب غيابك


    بقيتى تغيبى اوى

    وبخصوص البوست


    صراحه قربتينا كتير من شخصيتك

    وانا مع الفارس

    انتى فعلا بتتحاملى على نفسك


    امممممممممم

    والصور تجنن


    تحياتى

    اخيكى /احمد سككر

    ردحذف
  5. محمد شكرا على الشرح

    ساعدني جدا فعلا

    أنا رفعت الصور من خلال الموقع اللي قلت عليه وعرفت أحطها في البوست

    وجاوبت التاج التاني خلاص وكله تمام

    ردحذف
  6. أحمد

    حمد الله على السلامة في أرض الوطن

    منور المدونة

    معلش إن شاء الله موضوع الغياب ده مش هيتكرر تاني

    وسعيدة إن الإجابات والصور عجبتك

    ردحذف
  7. الاخت هبة
    ماشاء الله دمك خفيف
    وادراجك يعرف انك مش معقدة ولا حاجة بس يمكن الانسان بيشوف نفسة اكتر من غيرة
    سعيد بزيارتى لمدونتك واتمنى تشرفينى بمدونتى المتواضعة
    متعك الله بالحب والصحة والعافية ودمتى بود

    ردحذف
  8. بجد فكره التاج التانى ده تحفه مين العبقرى ده الى فكرها
    تانى حاجه يبان منه ان شخصيتك جميله جدا

    ردحذف
  9. بجد اختيارك للصور رائع يا هبه من غير مجامله ..

    يمكن دلت الصور انك شخصيه حالمه تحمل في داخلها روح طفل ..

    بس صح ايه حكاية الحصان , ده شئ بتركبيه فعلا ولا نفسك تركبيه ..

    معلش جيت واعديلك المدونه برد , بس قلت لازم اعلق علي تاج الصور

    تحياتي
    محمد

    ردحذف
  10. طارق الغنام

    شكرا على كلامك

    وسعيدة إن المدونة حازت على إعجابك

    وأكيد هزور مدونتك في أقرب فرصة

    شكرا على مرورك

    ردحذف
  11. محمد

    ربنا يخليك

    أنا مش عارفة مين اللي عمل التاج هو اتمرر لي من الفارس الملثم

    طيب يا سيدي أنا عايزة أشوف اجابتك على التاج ده

    أنا عاملة التمرير عام لكل اللي يحب يجاوب عليه

    ومادام عاجبك ورينا الاجاباتك الجامدة

    ردحذف
  12. محمد

    لولا مساعدتك مكنتش عرفت أحط الصور في البوست خالص

    ومكنتش عرفت أجاوب التاج من أصله

    أنت عندك حق ساعات كتير بحس أن جوايا روح طفل

    بس صدقني الموضوع ده له مزاياه وعيوبه

    وبالنسبة لموضوع الحصان

    فده خيال

    أنا عمري ما ركبت حصان ومعتقدش أني هأركبه في يوم من الأيام

    بس هو فعلا كائن جميل جدا

    برضه صورة محل الاقامة دي خيالية

    يعني الواحد نفسه يسكن في مكان قريب من البحر وفيه خضرة وشجر زي اللي في صورة

    والحيوان الأليف ده برضه من خيالي

    يعني لو الفرصة متاحة كانت هتبقى قطة زي اللي في الصورة

    على الفكرة

    وأنا براجع البوست اكتشفت أني نسيت السؤال بتاع الفيلم المفضل فجاوبت عليه

    بس كان اختيار صعب لإن فيه أفلام كتير مفضلة بالنسبة لي

    ردحذف
  13. بوست رائع , واعجبتني جدا الصور التي قمتي باختيارها

    تحياتي

    ردحذف
  14. نور

    سعيدة إن الصور عجبتك

    تحياتي وشكرا على مرورك

    ردحذف
  15. معقده إيه بس صدقيني إنت أرحم من ناس كتيير . بس بجد حاجه كويسه أوي أن الواحد يوصف نفسه أو على الأقل يحاول يعمل ده ويا سلام لو كان صريح متهيألي أن دي قمة الصدق مع النفس .. سامحيني مقدرتش محسدكيش على صراحتك مع نفسك.
    دمت صادقه

    ردحذف
  16. السلام عليكم
    الرجل تدب مطرح ما تحب يبقى بعدك عن هنا انك مشغوله عنه وفيه الأهم

    المهم ان النسخة المترجمة العربى واضحة جدا وخليتنا نشوفك من قريب

    الزواج السعيد يبنى على المودة والرحمة وليس شرط له الحب قبله فزواج الصالونات كما يسمى قد تجدى فيه زواجا اسعد بكثير من زواج تم بعد حالات حب قوية لكن لم يدم او ضعف او اصبح اعتيادا فالاختيار الصحيح وهو ان يكون شريك الحياة انسان يتق الله ومشهود له بالصلاح يجعله اهم مليون مرة من الحب الذى عادة او غالبا بيكون اعمــــــــــــــــى

    تحياتى ودعواتى لك بكل السعادة

    ردحذف
  17. أحمد

    مش عارفة هل الواحد يقدر يحكم على نفسه فعلا ولاء

    يعني ممكن حد يقولك أنت عصبي مثلا في حين أنك مش شايف نفسك كده

    بيتهيألي إن الناس اللي بتحتك بالواحد هي اللي تقدر تحكم عليه فعلا لإن نظرتهم ليه هتختلف عن نظرته لنفسه

    عموما الواحد بيحاول يوقف روحه قدام المرايا ويشوف ايه اللي هيظهر له

    تحياتي

    ردحذف
  18. العزيزة مجداوية

    وهنا حيث أحب

    بس الصراحة المدونة بتمر فترة موات رهيبة تعد الأولى منذ بدايتها

    وأنا مش عارفة هل ده لأني تغيبت فترة ولا لإن ده موسم امتحانات فبالتالي الناس كلها مشغولة

    يعني البوست اللي تشرته ده بقالي أسبوع كاتباه بس مش عايزة أنزله لأن محدش هيرد

    بالنسبة لموضوع الحب وجواز الصالونات فده موضوع ممكن أعرضه في بوست يوضح وجهة نظري ويفتح باب مناقشة للجميع يقولوا رأيهم

    شكرا على مرورك أختي الغالية

    ودمت بخير

    ردحذف

اتكلم براحتك أنت في مدونة ديموقراطية جدا واخد لي بالك