الجمعة، ٢٨ مارس ٢٠٠٨

6 أبريـل انتفاضة وطنية


اتفقت كافه القوي الوطنية في مصر علي

أن يكون يوم 6 إبريل

يوم إضراب عام في مصر

يوم 6 إبريل

خليك قاعد في البيت أو شاركنا فى الميادين العامة

أوعي تنـــــــــزل لكن شاركنا

ماتروحشي الشغل

ماتروحشي الجامعه

ماتروحشي المدرسة

ماتفتحشي المحل
ماتفتحشي الصيدليه

ماتروحشي القسم

ماتروحشي المعسكر

عايزين مرتبات تعيشنا

عايزين نشتغل

عايزين تعليم لأولدنا

عايزين مواصلات أدمية

عايزين مستشفيات تعالجنا

عايزين دواء لأطفالنا

عايزين قضاء منصف

عايزين أمن وأمان

عايزين حرية وكرامه

عايزين شقق للعرسان

مش عايزين رفع أسعار

مش عايزين محسوبيه

مش عايزين ظباط بلطجية

مش عايزين تعذيب في الإقسام

مش عايزين أتاوات

مش عايزين فساد

مش عايزين رشاوي

مش عايزين إعتقالات

مش عايزين تلفيق قضايا

قول لأصاحبك مايروحوش الشغل همه كمان وخليهم يدخلوا الإضراب

حزب العمل المصري- حركة كفاية - الإخوان المسلمين - حزب الكرامه - حزب الوسط - حركة موظفي الضرائب العقاريه - عمال غزل المحلة - حركة إداريي وعمال القطاع التعليمي - نقابة المحامين - حركة أستاذه الجامعات

6أبريـــــــــــــــــل

أضراب عام في مصر سلمي

أبعت رسايل لخمسة من أصحابك

ولو كل واحد بعت لخمسة

في ظرف يومين البلد كلها حتعرف

بالموبايل

بالأرضي

بالأيميلات

أو حتي رسايل عالشات في قنوات التليفزيون

أنسخوا رسالتنا وأبعتوها تعليق على كل المقالات ألي بتقروها
بيكوا وبينا البلد دي حتتغير أنشاء الله

المسيحين مع المسلمين لصالح مصر


يالا يامحمد يالا يامينا مصر مش هتتغير إلا بإيــــدينـــــــا



الكلام اللي فوق ده وصلني بالنص كده وزي مهو مكتوب بدون بزيادة ولانقصان عن طريق الايميل

الكلام واضح الرسالة الهدف منها الإعلان عن إضراب سلمي وطني عام يوم 6 أبريل

مطلوب منك كمواطن كما جاء في الرسالة أنك ومهما كانت وظيفتك تقعد اليوم ده في بيتك ومتروحش شغلك

أو لو عايز تشارك تنزل في الميادين العامة

طبعا أنا رحت على محرك البحث علشان أفهم أكتر عن الموضوع اللي اتضح إن بقاله مدة منتشر وفيه كلام كتير أوي عليه مع أني شخصيا مسمعتوش قبل كده

الهدف من الاضراب كل المطالب الوطنية اللي مكتوبة في الايميل ده

أنا شخصيا معنديش مانع في أني مروحش الشغل اليوم ده

دي حاجة بسيطة جدا وسهلة التنفيذ يعني مش مطلوب مني ألبس حزام ناسف زي ما أخواننا الفلسطينين بيعملوا ده أنا يا دوب هأخد يوم أجازة

بس هل ده هيعمل حاجة بجد

بداية التغيير أننا نعمل حاجة فعلية وإلا نبقى نستاهل كل اللي يجرالنا ومحدش بقى يشتكي من الأسعار والفسادوالذي منه

السكوت علامة الرضا زي ما بيقولوا

صحيح الاضراب ده جايز ميفرقش كتير بس أهي بداية

بس اللي يقلق بجد أنها تتحول لحرب والناس تكسر المحلات وتولع في العربيات ومتبقاش وقفة سلمية

احنا كأفراد عايزين نعبر عن رأينا ونقول مشاكلنا بس من غير ما نكسر ونسرق لكن التجمعات اللي من النوع ده غالبا بيسودها الهرج والمرج

وفيه فئة معينة ممكن تستغل الفرصة في السلب والنهب وفي النهاية تتحول الوقفة السلمية لانتفاضة حرامية جديدة

بيني وبينكم أنا مش عارفة

هل الإضراب ده هيحصل فعلا ولا لاء ؟؟؟؟

وهل الناس هتشارك ولا هتخاف ولا ايه

ولو حصل هل هيغير حاجة فعلا ؟؟

هل هيكون الاضراب سلمي زي ما الايميل بيقول ولا زي ما حصل في السبيعنيات

هناك ٦٥ تعليقًا:

  1. عموما قبل اى كلام انتى ليه اتخرتى كده كنتى بتجهزى لموضوع الاضراب كلنا عارفين انتى بجد وحشتينا ووحشنا كلامك الجميل
    يا ستى انا هتلاقينى فى وسط الناس الضريبه يعنى متخفيش عليه

    ردحذف
  2. محمد

    ربنا يخليك

    أنتم كمان وحشني نقاشكم معايا

    بس أنا متابعة مدونتك ومدونات كل أصدقائي

    أنا شفت إن ليا تاج عندك وهأجاوب عليه في أقرب فرصة

    أسفة بجد والله على التأخير بس معلش مكنش عندي مزاج اكتب

    ياه أنا مكنتش أعرف إن موضوع الاضراب ده منتشر

    أنا معرفتوش غير النهاردة بس

    أصلا أنا كنت داخلة احط بوست تاني خالص

    بس لقيت الموضوع ده أهم طبعا

    ردحذف
  3. مش عارف حكايه الاضراب دى
    بس ثوره الجياع جايه جايه
    واظن دى بدايتها

    ردحذف
  4. محمود

    أزيك

    فعلا يمكن تكون دي البداية

    الأحوال بقت سيئة جدا لدرجة لا تحتمل

    ردحذف
  5. D:
    مبادرة لذيذه مايعملهاش الا الشعب المصرى
    الشعب اللى بيتلكك عشان ياخد اجازات حتى لو كانت بدعوى الاعتراض

    وانا مؤيدا لهذة المبادرة الجليلة اقترح اننا نعمل شهر ابريل كله اضراب
    نظرا لسوء الوضع وتفاقم الحال وان يوم واحد اضراب مش كفاية D:


    طبعا ده كلام فارغ , عمر الكلام ده ما هايحل المشكلة

    ردحذف
  6. لا موضوع الاضراب ده وصلني فعلا من اكثر من جهة , يعني انا كنت متصور انه وصل للناس اللي بتدخل نت بس ,لكن واضح ان الموضوح وصل ناس كتير , وانا شايف ان اي حد يقدر يشارك باي طريقة ياريت يعملها , حتي ربات البيوت اللي بتشتري حاجتها من السوق ما تنزلش اليوم ده , يمكن يكون ده بداية تغيير ما بدال الاستسلام للامر الواقع اللي بقينا فينا

    اخيرا , عودة بعد غيبة طويلة يا هبة وبلاش تتاخري كده علينا تاني

    تحياتي وتقديري

    ردحذف
  7. المتألقة دوماً هبة
    عودة قوية كالعادة ..
    أما عن الإضراب فأنا شخصيا لا أعتقد إن الناس هتتجاوب مع الدعوة دى لأنهم متوقعين تنكيل قوات الأمن بيهم وهما مش ناقصين بهدلة .. الإضراب اللى ممكن الناس تشارك فيه صحيح هو اللى بتسانده قوى حزبية أو مجتمع مدنى ليكون المواطن تحت حمايتها ..ولو حتى كانت هذه الحماية صورية .. اللى أنا متأكدة منه إن الناس لديها حاجة ملحة واستعداد عالى للمشاركة ..لكن ليس لديها تصور واضح عن حجم الضرر الذى قد يترتب على مشاركتهم .. والإنسان بطبيعته بيميل لحساب المكسب والخسارة قبل الإقدام على خطوة زى دى .. يعنى المواطن لو يقدر يتوقع بشكل محدد تداعيات اتخاذه قرار الإضراب ..ممكن فعلا يشارك ورزقه على الله .. لكن طول ما الحتة دى غامضة هيخاف على نفسه وعياله وكلنا عارفين أقسام البوليس والحجز بيحصل فيهم ايه.. باختصار من غير مساندة قوى المجتمع المدنى والأحزاب والحركات المعارضة .. ومن غير وجود تصور واضح لشكل تعامل الأمن مع مثل هذا الإضراب ..ولا عواقبه على المشارك فيه على مستوى عمله مثلا لو تغيب فى هذا اليوم.. يبقى إضراب يوم ستة ده فشنك ..لأنه ببساطة لم يسبقه تخطيط جيد .. ولم يقدم إجابات مقنعة تزيل مخاوف المواطن قبل أن يدعوه للمشاركة


    تحياتى ..وشكرا لك يا هبة على إثارة مثل هذا الموضوع المهم

    ردحذف
  8. هههههههههههههههههههههههههههههههه
    أضراب مرة واحده
    ولا اتقدمتى يا مصر
    بس على فكره انا لو مرحتش الشغل عمى هيولع فيا
    ده المدير يابنتى

    وحشتينى بجد يا هبة
    بس معلش غصب عنى الشغل واخدنى والدنيا
    الوقت بيجرى بسرعه كبيرة

    المهم
    بجد وحشتينى ووحشتنى كل البلوجات واصحابى فيها وكل حاجه
    معلش كان غصب عنى وهرجع تانى
    يلا خدى بالك من نفسك
    تحياتى سيكو

    ردحذف
  9. فى حلقة القاهرة اليوم واحدة ست جابوها بتبكى عشان مرتب جوزها مش بيكفيهم هم والعيال وسألت يعنى أرمى العيال دول فى الشارع ولما بأقول لجوزى اتصرف يقولى يعنى أسرق يعنى ؟؟؟؟ تفتكرى كام اسرة بتقول نفس الحوار الأيام دى ؟؟؟؟ الاضراب أقل حاجة ممكن الناس تعبر بيه عن غضبها أنا فعلا مش حاروح الشغل وعارفه انه حيتخصم من مرتبى والضرر حيقع عليا أكتر لكن ده أضعف الايمان ولازم كلنا نشارك فيه مش لازم الستات تنزل الشارع لو فيه خطر عليها لكن لازم تعمل حاجة ,,متستنيش غيرك يعمل اعملى انت وأنا وغيرنا اللى مؤمن ان لازم نعمل أى حاجة

    تحياتى وتقديرى عزيزتى

    ردحذف
  10. هو انا لما عرفت بجد فرحت حسيت ان اخيرا هنتفق علي حاجة في مصلحة الناس ولان الوضع بقي من المهانة السكوت عليه

    لكن ياتري الموضوع هيجيب نتيجة الحقيقة مش عارفة ساعات باشك انه ممكن يعمل حاجة لكن في نفس الوقت باتمني
    وبجد الموضوع دا لو اتنفذ صح واتطبق بجد ممكن ولو حتي زي ما قلتي يكون البداية

    ردحذف
  11. أزيك يا هبة أولا و حمد لله على سلامتك
    أنا صديقي مواطن مصري كان عامل الموضوع ده بس بشكل مختلف هو كان بيطلب مش بيستفسر زيك و حصلت بيننا مشادة أنا حنقلها لكم
    أنا بصراحة قلقت أني أنقل الموضوع ده عندي لأن مشكلة المواقع الشخصية إنها غير المدونات ممكن جدا تتقفل لو كان فيها موضوع يثير القلق
    عموما دي تعليقاتي و تعليقاته و حاسيبكم أنتم تحكموا

    ردحذف
  12. عاشق العندليب يقول:
    أنا افتكرت حاجة من أيام السادات
    قامت مظاهرة قام بيها طلبة الجامعة بيطلبوا مطالب من الحكومة المطالب دي كلها اتنفذت ؟
    و بالمناسبة دي غنى عبد الحليم اطلب يا شباب
    لكن تفتكر إن الناس اللي محتاجة كل مليم بتقبضه علشان تأكل عيالها و تصرف على بيوتها ممكن يضحوا بيوم يتخصم من مرتبهم و يا عالم يمكن الحكومة ترفدهم أصلا بعد المظاهرة دي
    اللي أنا باقصده إنك متقدرش تروح لواحد عنده هو و أسرته فرخة هي كل اللي عندهم كل يوم بتبيض بيضة بيقسموها مع بعض تقوله متكولش النهاردة أنت و ولادك البيضة علشان خاطر الحكومة مسؤولة تجيب لكم أكتر من فرخة و لحوم و حمام و ما لذ و طاب
    ممكن جدا الحكومة تدبح لهم الفرخة و ما يبقوش طالوا حتى البيضة اللي بياكلوها

    ردحذف
  13. مواطن مصري يقول:
    يا عاشق باشا هو انت تعتقد ان الاسره المصريه لسه عندها فرخه
    كان فى مثل شعبى بيول ماحدش بيبات من غير عشا
    ناااااس كتير اوى دلوقتى لا بتتعشى ولا تتغدى ولا تفطر وبتموت من الجوع
    يبقى اللى مش لاقى ياكل عياله يطالب بحقه ويمتنع عن العمل لصالح الدوله اللى فلوسها منهوبه ويطالب باصلاح الدوله ولا لا
    اللى مش لاقى يشترى الاكل مايقدرش يمتنع عن الشراء حتى يزول الاستغلال والجشع وتعود الاسعار كما كانت
    اللى مش لاقى ياكل ده وقاعد فى بيته خايف يثور ومستنى واحد تانى يجبله الاكل ويتضرب ويتحبس علشانه
    ده مش بس يستاهل يجوع ده يستاهل يدفن نفسه احسن
    وبعدين يا عاشق باشا ماهو لو الناس اضربت عن العمل لحين اصلاح الامور الدوله حاتفصل مين ولا مين حاتفصل شعب مصر كله
    يا عاشق العندليب الاضراب والتظاهر من افضل الطرق الاحتجاجيه السلميه من اجل الحصول على الحق
    لا نريد ان ننتظر الى ان يخرج الشعب بالشارع يعتدون على بعضهم البعض من اجل لقمة العيش
    لازم حل سلمى والا البلد خلال سنتين حاتضيع

    ردحذف
  14. عاشق العندليب يقول:
    يا مواطن باشا
    أنت قلتها بنفسك حتى الفرخة بقت مش لاقينها
    لكن زي ما بنقول المسألة مش مسألة خوف بس لكن زي ما قال الأخ الفاضل اللي حيروحوا يتظاهروا مش الشعب المصري كله ده يا راجل الواحد ما بيصدق يلاقي وظيفة يجي سايبها
    أنت لما اتكلمت اتكلمت من وجهة نظرك أنت مش من وجهة نظر المواطن اللي محتاج كل مليم بيقبضه ده دلوقت الراجل اللي عنده أبناء بيصرف عليهم بعد ما اتخرجوا أكتر مما كان بيصرف عليهم و هما بيتعلموا ؟

    ردحذف
  15. مواطن مصري يقول:
    عاشق باشا انت بتتكلم من غير ماتقول حلول
    انا بقلك الحل فى الاضراب والتظاهر من اجل لقمة العيش من اجل الضغط على الحكومه لتلبية مطالبنا كل ماكان الععد كبير كل ما استجابت الحكومه
    دى وجهة نظرى
    انت بقى قولى ايه الحل وقولى وجهة تظرك مش بس تقولى لا ده ماينفعش
    لالالالالالالالالا لازم تقولى ايه اللى ينفع يمكن نعمله

    ردحذف
  16. عاشق العندليب يقول:
    مواطن باشا
    أنا مش معترض على أسلوب التظاهر بشكل عام زي ما أنت فاكر و الدليل على كده أني ضربت لك مثل باللي حصل أيام السادات و مطالب المظاهرة اتنفذت فعلا
    أنا قصدي إننا ندور على حل تاني يمشي مع حال بلدنا
    يعني مثلا انت مش حتروح لواحد مسيحي شايف إن الإسلام دين مش حقيقي و تقولوا تعال صلي معايا ركعتين في المسجد و أنت حتعرف قد أيه الدين ده حقيقي
    لازم نشوف حل يتناسب مع الإنسان اللي موجه ليه الكلام
    بلدنا الأسلوب ده حاليا مينفعش معاها و ده إثباتاته واضحة من فترة كبيرة بدليل إن من فترة كبيرة جدا و لا مظاهرة مطالبها اتنفذت
    أنا باعترف أني مش قادر أوصل لحل لن كل الطرق جربناها و منفعتش بس حاقولك أيه جربوا و شوفوا أيه اللي حيحصل روحوا اتظاهروا و لو نفع الموضوع حابقى أسمعك اطلب يا شباب إن شاء الله !

    ردحذف
  17. مواطن مصري يقول "و لقد نجحت في أن أجعله يتوقف عن الحديث":
    ايه المثال ده ايه علاقته بالموضوع اصلا
    بلاش امثله ونتكلم صح

    ردحذف
  18. ياااااااااهبه

    وحشاني بجد مدونتك رجعت تعلق تاني معايا

    بالنسبه بقه للانتفاضه

    احنا ممكن نعمل حاجه مش عارفه ليه حاسه اننا بنسكت علي الا ظالمنا

    فيه ناس كتير متعرفش باليوم ده وحاسه انه هيعدي ومحدش هيعرف عنه حاجه

    سلامووووووووز ياجميل
    وزة

    ردحذف
  19. يلا عايزين نحرق عتريس فى قصره ونقول جوازخ من البلد باطل باطل باطل

    ردحذف
  20. كلنا قلبا و قالبا فى هذا اليوم
    اشكرك عززيتى

    ردحذف
  21. السلام عليكم
    اذيك يا بوبه
    معلش بقالى فترة مش بتابع المدونات اكيد انتى حسيتى من مدونتى انى كنت ف ظروف ومواضيع وحاجات ومحتاجات وكأبات
    المهم انى رجعت لكم سالمه الحمد لله
    ---
    الموضوع دا مهم جدا يا بوبه
    انا مع ان الشعب يعترض وياخد موقف
    بس الخوف من ان الموقف يستغل زى ما قلتى وتبقى عصابات وحراميه وتبوظ اكتر ما هى بايظه
    ولا ان يحصل اى اعمال عنف وعدوانيه
    من الى الناس شيفاة
    تعرفى فى مننا كتير مش حاسيين بالازمه الى مصر فيها
    لكن لكى ان تتخيلى ان فى ناس مكنتش بتاكل غير العيش....ودلوقتى مش لاقياة ...متخيله
    انا شفت الرجاله بتعيط ف التلفزيون يا هبه
    شوفتى حالنا بقى اذاى
    انا معاكى ان دا مش هيغير كتير وان يوم6 مش هيكون فارق كبير دا لو اتبع صح اساسا
    لكن اهه اعتراض على ما نحن فيه
    انا شغلى خاص وهحاول ف اليوم دا فعلا مروحش الشغل
    وربنا يصلح لنا ولمصر حالها ونبقى ناس محترمين نستحق الححياة

    ردحذف
  22. سمعت موضوع الأضراب ده من زمااااان و من اكثر من مصدر

    بس مش عارفه هل الناس هتنفذه فعلا و لا كلام ؟!

    وحشانا يا هبه , كنتي مختفية فييييييين ؟؟ :D

    ردحذف
  23. زانتى فينك يا بنتى..مش ظاهرة ليه

    عامة انا الموضوع دا مش فاهماه اوى و مش عارفة اوى ممكن تكون نتايجه ايه لانها تجربة اول مرة تحصل فى مصر..انما دا اسلوب اعتراض و ضغط على الحكومة معروف فى كل حتة فى العالم.....انما انا بس كان نفسى يحددوا الموضوع شوية يعنى مثلا النهاردة يبقى اضراب عن الغلاء و نقاطع الاسعار اللى غلت انما انهم من يوم يطالبوا بحل كل مشاكلهم و شوية و يقولوا نغير الحكومة لا سامح الله....كمان فى حاجات ماينفعش تقف زى المستشفيات و كدا

    عموما انا مستنية اشوف ايه اللى حيحصل..و يا رب الحكومة تتنازل عن احدى الودنيين يا اما اللى من طين يا اما اللى من عجين و تسمع الناس عاوزة ايه

    ردحذف
  24. ياخوفي
    افهميها بأي طريقه بس بجد ياخوفي

    ردحذف
  25. Wael

    أحنا قلنا أنه ممكن ما يحلش المشكلة بس أهو

    وبعدين علشان يحصل تغيير لازم نعمل حاجة ولا الدنيا هتتغير لوحدها

    ردحذف
  26. الفارس الملثم

    ياريت فعلا ناس كتير تشارك ولو أني حاسة أنها هتطلع على مفيش

    الناس يا هتخاف يا هيقولوا انها مش هتفرق كتير

    ردحذف
  27. مها

    فعلا هو ده اللي حاسة أنه هيحصل

    حاسة أنها هتطلع فشنك لإن مفيش خطة محددة

    مفيش غير الكلام اللي في الايميل اللي حطتيه بس

    وده مش كفاية

    ردحذف
  28. سيكو

    ازيك

    منوراني يا قمر

    بالنسبة ليوم الاضراب يا ستي حاولي تأخديه أجازة

    هو يعني أنتي مش بتأخدي أجازات خالص

    عايزة أشوفك كتير وتطمنيني على أخبارك

    ردحذف
  29. مجداوية

    أنتي سمعتي حكاية الراجل اللي قتل ولاده ومراته وحاول ينتحر

    حط لهم سم في الأكل علشان مش قادر يصرف عليهم

    لو الحال فعلا وصل لكده يبقى لازم نحاول نعمل أي حاجة

    حتى لو مكناش هنروح الشغل

    ده أضعف الإيمان زي ما قلتي

    ردحذف
  30. سنووايت

    لو اتنفذ صح تبقى بداية مش وحشة

    يتنفذ صح بس

    واهي بداية ومين عارف

    ردحذف
  31. عاشق العندليب

    أنا مع مواطب في أننا المفروض نعمل حاجة علشان نغير الوضع

    الشكوى وحدها لاتكفي

    لو لم تقم بشيء فعلي لتغيير الوضع يبقى ما تشتكيش وأقبل وعيش وأنت ساكت

    معاك حق جايز الناس تخاف على وظيفتها وأكل عيشها اللي بطوله بالعافيه

    بس برضه هتفضل المشكلة قايمة

    ومادام ساكت تبقى راضي

    الناس بقت بتتخانق مع دبان وشها

    وبيموتوا بعض علشان رغيف عيش

    وبيسرقوا الحديد اللي في المقابر علشان يأكلوا

    ولو فضل الوضع كده اراهنك هتحصل مجزرة

    يعني لازم وقفة سلمية زي اضراب 6 أبريل بس يتنفذ صح

    ردحذف
  32. انين الحزن

    منورة يا قمر

    لو علق معاكي أختاري من القائمة اللي في أعلى الصفحة view ثم encoding ثم unicode

    هتلاقي كله تمام

    إن شاء الله اليوم ميعديش اونطة

    ردحذف
  33. عمر المصري

    احنا عايزين نحصل على حقنا في حياة كريمة

    بدون البني أدم هيحس بالجوع والعجز
    والمرض

    ده كل اللي مطلوب من عتريس حاليا

    ردحذف
  34. Rania

    دايما عندك إرادة وحماس ورغبة في التغيير

    بجد بحييكي

    ردحذف
  35. هبهوب

    حمد الله على سلامتك

    ربنا يفرج همك ويشرح صدرك ويوفقك لما يحبه ويرضاه

    ويرفع عنا البلاء

    فيه ناس فعلا حالتها تقطع القلب

    تخيلي في ظل الغلاء اللي احنا فيه في ناس مرتباتها 350 جنيه

    هيربوا ولادهم ويعيشوا ازاي

    ربنا يرحمنا

    ردحذف
  36. Bongo

    ازيك يا قمر وازي يوكي

    يارب تكونوا بخير

    اتمنى إن تحصل حاجة ايجابية يوم 6 أبريل

    كلنا محتاجين ده

    ردحذف
  37. أنا مقلتش أبدا إننا منعملش حاجة بس لازم بأسلوب ينفع إنما التظاهر ده أسلوب مش حينفع هنا أبدا و خاصة الطريقة المستفزة اللي الناس عايزه تعملها لكن هل كل الناس حيروحوا و حيبقى أسلوب التظاهر أسلوب حضاري ؟ لا ده حيحصل و لا ده حيحصل
    يا عالم أيه اللي حيحصل بسبب اليوم ده و نتايجه حتكون عامله أزاي و أنا باتمنى و الله بجد إن المظاهرة دي مطالبها تتنفذ و ربنا قادر على كل شئ

    ردحذف
  38. dina

    ازيك يا قمر

    هو حد طايل الحكومة

    على رأي العزيزة مداوية الحكومة شفافة

    أو لابسة طايقة الاخفا وسايبة الناس يبخطوا في بعض ومش سائلة فيهم

    يارب بس متكونش الحكومة رايحة عليها نومة يوم الحد وتاخد بالها من الاضراب

    ردحذف
  39. wael

    معرفتش أنت خايف من ايه بصراحة

    خايف من الحكومة

    ولا من تخاذل الناس

    ولا من تهورهم ولا من ايه

    ردحذف
  40. واضح انك مناضلة اجتماعية

    بس احب ابشرك

    انتو بتنفخوا في قربة مقطوعة

    انتو عايزين تجبروا الحكومة علشان تتحرك.. بس من امتى الميت بيتحرك لما حد بيضرب فيه.. الحكومة ميتة.. والنظام مشغول بس بالتوريث.. وسلموليلي على التروماي؟؟؟؟؟؟؟؟؟؟؟؟؟؟؟؟؟؟؟؟؟

    تقبلي مروري

    مصري في الإمارات

    ردحذف
  41. في حب مصر

    أنا ولا مناضلة اجتماعية ولا يحزنون

    النضال ده كلمة كبيرة أوي

    اللي بيناضل ده غالبا بيكون له أفعال وتصرفات يناضل بيها مش بس كلام

    أنا يا دوب بتكلم واتناقش

    لكن أفعال جامدة على أرض الواقع للأسف مفيش

    جايز يكون معاك حق في أن الحكومة هتضرب طناش ومش هتعبر حد

    بس أنا كنت بتكلم على تحويل الكلام لفعل

    يعني أعمل حاجة بدل ما أنا عمالة اتكلم وخلاص

    تحياتي وشكرا على مرورك

    ردحذف
  42. قوول يارب بس

    تعرف إن أختى بتشتغل فى مؤسسة حكومية قالولها إمباارح اللى هيغيب بكرة

    هنرفدة شوفت بقى

    ردحذف
  43. كل ده حصل النهارده واكتر حتى الجامعه اضربت حلو كده
    يارب بس نعمل حاجه سلام

    ردحذف
  44. بصي يا هبة -انا شايف الاضراب حقق الغرض منه في اشعار الحكومة بالخطر, وان بقاءالاحوال المعيشية كما هي دون تحسين قد يطور الامور لعصيان مدني شامل ,فقدرة الناس علي التحمل علي وشك النفاذ.

    تقبلي مروري

    ردحذف
  45. دعاء مواجهات

    أهلا بيكي

    كلامك سليم ومظبوط بس ناقصه تاء التأنيث لأني فتاة

    فعلا كتير من المصالح الحكومية تردد فيها إن اللي هيغيب هيترفد

    ردحذف
  46. rommantic

    فعلا فيه ناس كتير التزمت بالإضراب في اليوم

    وناس يا ما برضه ماالتزمتش بيه

    اللي لفت نظري إن الناس فعلا قامت بالموضوع بشكل منظم وبطريقة حضارية فيماعدا أحداث المحلة المؤسفة

    ردحذف
  47. الفارس الملثم

    أنا كنت ماشية في الشارع وسمعت اتنين بيتكلموا

    رأيهم إن الاضراب كويس بس ده يوم واحد بس

    وهترجع تاني يوم تشتري أو تكون اشترت احتياجاتهم في اليوم اللي قبله

    وبكده السوق مش هيتأثر كتير

    يعني مثلا اللحمة غالية نضرب عن شرائها شهر علشان نهز التجار اللي بيبعوها

    وبصراحة عجبني رأيهم

    بس حاسة إن تنفيذه هيبقى صعب

    ردحذف
  48. you've been tagged heba :)

    http://2twinz.blogspot.com/2008/04/new-tag.html

    ردحذف
  49. سورى بئه مكنتش فى مصر
    بس شفت وتابعت فى الفضائيات

    سيبك انتى المهم
    اخبارك ايه

    طمنينا عليكى
    احمد سكر

    ردحذف
  50. أكثر شي عجبني الأغنية ... وتمنيت تكون لمارسيل لأنها بصوت مارسيل أحلى .. وعجبني انتمائك لفلسطين بما انه الأغنية لفلسطين ولحيفا
    راح أتابع مدونتك
    كوني بخير

    ردحذف
  51. بقالك فترة غايبة
    المهم انا جيت اعلق متأخر
    بس اكيد عرفتى اجابات الكام سؤال اللى كنتى كاتباهم تحت

    ردحذف
  52. الحبيبة هبة

    وحشتينى جداً وغيابك طول .. لعل المانع خير انشاءالله .. أنا كل يوم أدخل وأنا متوقعة جديد .. ومتأكدة إن قراء مدونتك كلهم مستنيين زي ما انا مستنية .. بلاش تغيبى كتير لأنك فعلا سايبة فراغ رهيييييييييب

    مع كل حبى ودمت بخير

    ردحذف
  53. عزيزتى
    مش عارف حاسس انى علقت هنا
    الخطوط دخلت فى بعضها بقه

    على العموم العمال بس اللى اثبتوا انهم جدعان ورجاله عمال المحلة

    هنشوف المره الجايه بقيت البلد هتعمل ايه

    ومش مشكله لو الاضراب تخلله شويه عنف علشان الديمقراطيه لازم يكون ليها ثمن فى اى بلد

    تحياتى

    سلام

    ردحذف
  54. ايه يا هبة انتي غبتي رحتي فين كده؟؟؟؟؟؟

    ردحذف
  55. ايه يا هبة
    كل دى غيبة.....بقالى كتير بدور هنا و هنا و نفسى أشوف عندك بوست
    جاية على بالى اليومين دول أوى...يا رب تكونى بخير
    ترجعيلنا بالسلامة

    ردحذف
  56. ايه يا هبهوب
    قلقتينى عليكى
    فينك يا توتى
    اكتبى بوست تطمنينا عليكى
    انا كذا مرة ادخل مدونتك ومش الا قى بوست منك

    ردحذف
  57. Yuki

    hope u & Bongo are fine

    thanks for the tag

    I'll answer it as soon as I could

    ردحذف
  58. سكر

    حمد الله على السلامة

    وترجع بالسلامة

    يظهر إن الواحد غاب كتير فعلا

    وأنا مدينة للجميع بالاعتذار فعلا

    ردحذف
  59. الحلونجي اسماعيل

    أهلا بيك

    أنا أول مرة إن الأغنية دي لمارسيل

    أنا سمعتها وأعرفها بصوت عايدة الأيوبي

    أسعدني مرورك وعيدة إن المدونة حازت على إعجابك

    تحياتي

    ردحذف
  60. صحفية روشة

    منورة في أي وقت يا جميل

    ردحذف
  61. مها

    كلامك أصابني بالخجل

    مرة من نفسي لطول غيابي وتأخري الكبير عليكم

    ومرة لأني فعلا حسيت إن الكلام ده كتير عليا بجد

    المهم تطمنيني عليكي لإن مدونتك مغلقة وأنا بحس أنك لما بتعملي كده بتكوني متضايقة

    طمنيني عليكي

    ردحذف
  62. أنا مش موافق

    الحرية لها تمن

    كلامك صح

    بس ده مش معناه أننا كمصريين ندبح بعض تحت شعار تلك العبارة

    أنا هأيد العبارة دي تماما لو أحنا في حالة مواجهة مع عدو أجنبي

    يعني الاحتلال الانجليزي ونكسة بتاعة 67 انتهوا بتضحيات الناس اللي حاربوا أو اللي كانوا بيقاوموا الاحتلال الانجليزي

    أنا مش معقول ندبح في بعض ونقول الحرية ليها تمن

    وبعدين اللي بيتضربوا ويموتوا ناس غلابة زي وزيك ومش هما العقبة الحقيقية الرئيسية اللي واقفة في طريق حريتنا


    تحياتي

    ردحذف
  63. الفارس الملثم

    بصراحة أنت ومها من أكتر الناس اللي أنا مكسوفة منهم بجد

    ومش عارفة أقولكم ايه بصراحة

    بس إن شاء الله اللي حصل ده مش هيتكرر تاني

    أنا شفت ابداعات جديدة في المدونة

    ورايحة حالا أقرا بتمعن أكبر

    تقبل اعتذاري

    ردحذف
  64. Saydalanya Mat7oona

    ربنا يخليكي

    أنا الحمد لله تمام دلوقتي

    ويارب أنتي كمان تكوني بخير وفي أحسن حال

    ردحذف
  65. هبههههوب

    شكرا على سؤالك يا قمر

    أنا الحمد لله تمام

    المهم تطمنيني عليكي أنتي وعلى أحوالك

    ويارب تكوني بخير دايما

    ردحذف

اتكلم براحتك أنت في مدونة ديموقراطية جدا واخد لي بالك