الجمعة، ١٥ فبراير ٢٠٠٨

أنت من بتوع الأتوبيس ؟؟

وأنا راكبة المشروع النهاردة دار حوار لطيف بين السواق والراجل اللي راكب جنبه

في البداية أنا مكنتش متابعاهم خالص وكنت سرحانة مع نفسي بس صوت السواق شد انتباهي وخلاني أركز في الحوار

واللي فهمته إن الراجل اللي قاعد جنب السواق قال حاجة معينة على الأمريكان فالسواق هاج وماج وقعد يردد في كلام من نوعية

بلاش كلام في السياسة الله يخليك

أحنا غلابة وعندنا عيال عايزين نربيها

بلاش تتكلم على الأمريكان الله يكرمك أحسن يودونا أسمه ايه ده مونتانمو (جوانتانامو)

وأثناء ترديده للعبارت السابقة كان بيلتفت للوراء ويبص للركاب بتوجس متوقعا أن يكون أحدهم جاسوس للأمريكان فيقول لهم على اللي حصل ويكون مونتانامو هو مصيره

مش عارفة الموقف ده فكرني بعبد المنعم مدبولي في فيلم احنا بتوع الأتوبيس


كان موظف حكومي رب أسرة عنده هاجس طول الوقت أن أعين النظام تراقبه ومستنية بس ينطق بكلة علشان توديه ورا الشمس

علشان كده مكنش بيحاول يشارك في أي نقاش سياسي في المصلحة اللي بيشتغل فيها حتى بيته كان بيهمس بصوت يكاد يكون غير مسموع لإن الحيطان لها ودان

وكان شايف أنه كده بيحمي نفسه وبيحمي عيلته

وده اللي يميز فيلم احنا بتوع الاتوبيس عن غيره من الأعمال اللي بتناقش نفس الموضوع - التعذيب داخل المعتقلات - زي فيلم الكرنك لأنه اختار نموذجين ملهمش في السياسة خالص

واحد زي ماقلت بيخاف يفتح بقه لحد من عيون النظام يسمعه وبيبعد عن الشر ويغني له

وشاب عايش حياته ومالوش دعوة بحاجة والسياسة مش من ضمن قائمة اهتماماته

والصدفة لوحدها هي اللي بتخليهم يدخلوا المعتقل ويكتشفوا الحقيقة

على عكس فيلم الكرنك مثلا اللي هتلاقي فيه الطلبة لهم ميول واتجاهات سياسية واضحة ومعلنة ويمكن يكون فيلم البرئ له نفس اتجاه فيلم احنا بتوع الاتوبيس لانه بيتكلم عن شخص مالوش في السياسة ولا بيفهم فيها برضه

في نهاية فيلم احنا بتوع الاتوبيس اكتشفت الشخصيتان إن موقفهم من المجتمع والسياسة غلط

وإن اللي كان بيخاف يرفع صوته كان المقروض يتكلم

وإن اللي كان مكبر ومش داوش دماغه كان المفروض يسأل ويفهم ويهتم

أنا عن نفسي وبصراحة ممكن أكون مزيج من الشخصيتين الخايف والمكبر

أنت بقى ايه ؟؟؟

الكلام اللي جاي ده كان بيقولوه وجدي العربي في الفيلم

ليا مين غيرك يا بلدي .. ليا مين

ياللي علمتيني ايه معنى الحنين

انتي اللي أرضك طيبة

و الغربة فيكي قريبة

و حنينة على قلبنا

طول السنين

ماشيين يا بلدي في سكتك

حريتك

حريتك هيا الطريق

بالصبر و الرأي الجرئ

بالحب

بالحب يا بلدي ولادك مخلصين

و شرفك يا بلدي لتبقي

حياتك هي عمري

و قدرك هو قدري

حرية على طول الزمان

حب و سلام في أي مكان

و شرفك يا بلدي

سحابة و تعدي

و برضه أنتي بلدي

مهما عملوا يا بلدي فيكي

أحنا ليكي

أحنا بيكي

ده أحنا ياما خدنا منك

فيها ايه لو يوم نديكي

فيها ايه لو يوم نديكي؟

هناك ٢٩ تعليقًا:

  1. مرسى جدا على عزاك ليا
    انا عارفة انك اول مرة تدخلى مدونتى

    وانا كمان اول مرة اكتب لحد بعد اللى حصل الحمد الله

    المهم موضوعك حلو قوى وفعلا انا لما بركب الاتوبيس بيمع الكلام ده
    الناس خايفة وتعبانة فوى

    الحياه فعلا صعبة والنظام حول مصر لمعتقل كبير لكن بيسمحوا من وقت لاخر بالكلام

    +
    مصر بقت مجاعه
    قدروا يلهوا الشعب بالاكل والكورة
    ربنا يستر

    ردحذف
  2. مرسى لذوقك يا هبة

    انا الحمد اله كويسة دلوقتى

    الحمد الله

    ردحذف
  3. بوست حلو...فى كام كلمة صغيرين كده قال حال الناس فى بلدنا شكله ايه دلوقتى
    بيخافوا من اللى مش عارفينه ولا فاهمينه
    لا تماااام....تمام جدا :)
    تسلم الأيادى

    ردحذف
  4. بقى طول اليوم علىمدونتك

    خسااره
    كان نفسى اكون اول تعليق

    يلا تتعوض مره تانى

    مش هنتكلم بئه فى السياسه

    احنا اتفقن الحيطان ليها وداان
    ههههه

    اسلوبك جميل جدا

    وشكرا لسعة صدرك معايا

    تقبلى تحيتى الحاره
    احمد سكر

    ردحذف
  5. بصي يا هبة بداية اكيد في فرق كبير في تعامل النظام الحاكم مع المعارضين وبين ماكان يحدث في نظم الحكم السابقة لاسيما ابان عبد الناصر ..

    يعني في الوقت الحالي ونظرا لاختلاف الظروف السياسية في العالم النظام الحاكم بيتغاضي عن من يتكلم بالسياسة او حتي بيشتم نظام الحكم وانتي لو بصيتي في صحف المعارضة او المستقلة اتلاقي نقد لاعلي المناصب السياسية ويصل احيانا لدرجة الشتيمة بس طبعا ده مش لان النظام الحاكم مؤمن بحرية الرأي او الديمقراطية لا سمح الله لكن ده نوع من الدعاية السياسية خاصة للعالم الخارجي

    لكن ده لا يمنع ان هناك خطوط حمراء بمجرد ان تتجاوزها سيظهر لك النظام الحاكم الوجه الاخر مثلما حدث مع ايمن نور او طلعت السادات او حتي ابراهيم عيسي اللي يمكن اعتبارهم القطة التي يتم ذبحها بين الحين والاخر للتخويف لاي شخصية سياسية تبدأ في تشكيل صداع للنظام الحاكم ناهيك عن اطلاق يد الامن في التعامل مع كثير من القضايا مثلما يحدث في بعض الاوقات مع المظاهرات او ما يحدث في اقسام الشرطة

    الخلاصة ان النظام الحاكم اشبه بذئب يلبس جلد حمل لكن عندما يستثار يظهر علي حقيقته

    تقبلي مروري

    ردحذف
  6. الشعب المصري كله بقى بتاع الأتوبيس
    وسلميلي على الكُمسري
    مع أطيب تمنياتي أنزل المحطة الجاية
    تحياتي

    ردحذف
  7. اصل الناس خلاص بقت عايشه فى رعب وكأن أمريكا مستنيا السواق ده

    ردحذف
  8. احنا بتوع المجاعه يعنى
    غلوه السكر غلوا الزيت
    خلاص بعت عفش البيت
    وعجبى

    ردحذف
  9. سيكو

    منورة مدونتي المتواضعة

    سعيدة جدا بمرورك عندي ويارب تكرري الزيارة

    وأنا معلتش حاجة يا قمر فمفيش داعي للشكر

    فعلا وضع الناس دلوقتي بقى صعب والظروف الإقتصادية بتسوء يوم عن يوم

    الحياه فعلا صعبة والنظام حول مصر لمعتقل كبير لكن بيسمحوا من وقت لاخر بالكلام

    ده اللي أنا بقصده حرية الرأي والتعبير في بلدنا

    نقول ولا ما نقلش

    هذا هو السؤال

    تحياتي وشكرا على مرورك

    ردحذف
  10. Saydalanya Mat7oona

    منوراني

    ايه الحكاية ياشباب كل الصيادلة مطحونين ولا ايه

    الحمد لله إن مجموعي دخلني كلية الأداب

    لا بجد منوراني وشكرا على كلامك الرقيق

    ردحذف
  11. أحمد سكر

    بالنسبة لموضوع التعليق

    تتعوض المرة الجاية إن شاء .. المهم أنك شاركتنا برأيك

    وشكرا على كلامك

    وبما أنك ما تحبش الكلام في السياسة يبقى أنت كده من بتوع الأتوبيس زي حالاتي

    شكرا على مرورك

    ردحذف
  12. الفارس الملثم

    تعليقك من التعليقات اللي بستنى أشوفها على أي بوست أحطه

    يعني في الوقت الحالي ونظرا لاختلاف الظروف السياسية في العالم النظام الحاكم بيتغاضي عن من يتكلم بالسياسة او حتي بيشتم نظام الحكم وانتي لو بصيتي في صحف المعارضة او المستقلة اتلاقي نقد لاعلي المناصب السياسية ويصل احيانا لدرجة الشتيمة بس طبعا ده مش لان النظام الحاكم مؤمن بحرية الرأي او الديمقراطية لا سمح الله لكن ده نوع من الدعاية السياسية خاصة للعالم الخارجي


    كلامك صحيح جدا

    يعني أنا مثلا بقعد اتفرج على القاهرة اليوم وبحس إن عمرو أديب جرئ جدا

    ولو قارنت بينه وبين الربامج المشابهة ليه 10 مساء على دريم أو 90 دقيقة على المحور ستجده أكثرهم جرأة

    صحيح هو بيتكلم من خلال قناة فضائية مش من خلال قناة أرضية مصرية

    لكن ولو مهو في النهاية عايش في البلد

    ويمكن ده زي ما قلت محاكاة للديمقراطية في بلدنا الحبيب

    تحياتي ليك وشكرا على مرورك

    ردحذف
  13. الأستاذ

    الشعب المصري كله بقى بتاع الأتوبيس
    وسلميلي على الكُمسري
    مع أطيب تمنياتي أنزل المحطة الجاية


    بتاع أتوبيس يعني ملكش في السياسة ومتحبش تتكلم فيها

    تحياتي

    ردحذف
  14. جمهورية مصر العربية

    اصل الناس خلاص بقت عايشه فى رعب وكأن أمريكا مستنيا السواق ده


    فعلا النموذج ده موجود

    ومش بس اللي خايف من أمريكا

    واللي خايف يتكلم لحسن حد من جواسيس يسمعه

    شكرا على مرورك

    ردحذف
  15. صوت من مصر

    أهلا بيك

    احنا بتوع المجاعه يعنى
    غلوه السكر غلوا الزيت
    خلاص بعت عفش البيت
    وعجبى



    فعلا كل حاجة بتغلي واليوم بيفرق عن اليوم اللي قبله

    ربنا يرحمنا

    ردحذف
  16. مدونتك حلوه يا هبه
    وانا اول مره ادخل مدونتك بس حلوه

    ردحذف
  17. والله ياهبه انتى لو تيجى تشوفى البحيره اللى انا منها دمنهور يعنى ..... دلوقتى بتستعد لأستقبال الرئيس وطبعا مش محتاج أقول ان البلد زى الفل والنظافه و.... كل حاجه يعنى

    ردحذف
  18. أنا مش معاهم

    أهلا بيك في المدونة

    والحمد لله إن المدونة حازت على إعجابك

    وياريت متكونش أخر مرة وتتكرر الزيارة

    تحياتي ..

    ردحذف
  19. والله ياهبه انتى لو تيجى تشوفى البحيره اللى انا منها دمنهور يعنى ..... دلوقتى بتستعد لأستقبال الرئيس وطبعا مش محتاج أقول ان البلد زى الفل والنظافه و.... كل حاجه يعنى



    أمال ايه يا مصطفى

    ده لما يبقى محافظ ولا رئيس حي الدنيا بتقف على رجل

    فمبالك بالريس بقى

    ده احتمال يجيبوا سكان غيركم أساسا

    ردحذف
  20. يااااه لسه فيه ناس بتفكر بالعقلية دى؟؟ أنا عجبنى البوست وعجبنى أكتر إنك ربطتيه بفيلمين مهمين جداً والمقارنة بينهم كانت لقطة ذكية منك..
    أزمة الثقة والشعور بتربص الآخرين بنا آفة من آفات حياتنا الاجتماعية .. لكن برضه "لسه المعارضة ممكنة"

    محبتى

    ردحذف
  21. مها

    منوراني

    شكرا على كلماتك الرقيقة

    موقف سواق المشروع فكرني أو بعبد المنعم مدبولي في الفيلم

    نفس الشك والخوف والتوجس

    فكرني بزمان أيام المدرسة لما كنوا بيقولوا إن الترام فيها ناس بتتجسس لحساب النظام

    وأي حد هيتكلم هيبلغوا عنه

    الموقف مضحك بس دلالته كبيرة

    زي ما قولتي بيعبر عن أزمة الثقة والشك والخوف اللي احنا حاسين بيه

    شكرا لمرورك

    نورتيني بجد

    ردحذف
  22. ازيك يا هبة
    لا طبعا اكيد مزعلتش انا بقبل النقد بتاعك بصدر رحب لان دة اكيد شى هستفاد منة فى تطوير نمط كتاباتى
    عشان اوضح نقطة مهمة ليكى يا هبة
    انا اللى اتعمدت عدم الترتيب فى الافكار لانى بحاول اعمل اسلوب جديد لكتابتى وبشوف رد فعل اللى يقراها وزى اللى توقعتة عدم الترتيب فى الافكار ادى لشى من التشتت للى بيقرا كلامى
    سعيدة جدا بزيارتك لمدونتى وشكرا على تعليقك ويا ريت نبقى دايما على اتصال

    ردحذف
  23. سارة

    أهلا بيكي

    كويس أنك ما زعلتيش من كلامي

    أنا مكنتش أعرف أنك قاصدة تتبعي أسلوب جديد في طريقة عرضك للموضوعات

    وسعيدة أنك تقبلتي كلامي

    يسعدني دائما أن نكون على اتصال

    تحياتي

    وشكرا على مرورك

    ردحذف
  24. هههههههههههههههه
    جميل الراجل السواق دا و الله....انا بجد من ساعة ما قريت كتاب تاكسى بتاع خالد الخميسى و انا ادمنت الكلام مع السواقيين سواق تاكسى ولا ميكروبازز ولا اى حاجة..شوية و حركب جنب سواق الترام

    بصى انا مقتنعة جدا بكلامك ان ماينفعش نكبر الدماغ ولا نسأل ولا نتعلم لاننا بشكل او باخر بنكون مسئوليين عن اى حاجة سلبية بتحصل لاننا سكتنا و مشينا جوا الحيط

    تحياتى

    ردحذف
  25. dina

    أهلا بيكي

    أنا مقريتش كتاب تاكسي بس كلامك هيخليني أدور عليه وأقراه

    هي ديه المشكلة لو ما اتكلمتش أبقى مسئول عن السلبيات ولو اتكلم ممكن تكون العواقب وخيمة زي ما عم السواق ده كان خايف


    تحياتي ليكي

    وشكرا على مرورك

    ردحذف
  26. انتي جميله يااااهبه

    هو الموضوع حلو بس انا مش بحب الفيلم دا خالص ولا اي فيلم فيه تعذيب ولا الحاجات دي ...


    سلامي ليكي ياقمر


    وزة

    ردحذف
  27. وزة

    ربنا يخليكي يا قمر

    بالعكس أنا بحب الفيلمين دول جدا

    دول من أفلامي المفضلة علشان بيرصدوا الواقع بصدق ومعالجة كويسة أوي فعلا

    شكرا على مرورك واهتمامك

    ردحذف
  28. واحد لسة خارج من معتقل قالك انا مش هتكلم في تلات حاجات

    السياسية والدين والجنس

    لؤؤل

    بوست جميل

    تحياتي لكي بالعطور الفرنسية

    ردحذف
  29. l0vElYGh0sT14

    أهلا بيك

    الثالوث الي ذكرته ( الدين - السياسة - الجنس)قادر تماما على الترويج الجيد لأي موضوع أو عمل أدبي أو شخص

    أي شيء له علاقة بالتلات حاجات دول بيكون له صدى وبيدور حوله جدل كبير

    بعض الناس بتقول إن دكتور علاء الأسواني بيدخل دايما 3 محاور دول في أعماله وده اللي بيسبب له ضجة كبيرة يتبعها نجاح مدوي

    شكرا على كلامك وعلى التحية

    وياريت متكونش أخر زيارة

    ردحذف

اتكلم براحتك أنت في مدونة ديموقراطية جدا واخد لي بالك