الأربعاء، ١٣ فبراير ٢٠٠٨

هل يقبل ؟؟

كنت قاعدة زهقانة فقلت اتفرج على التلفزيون .. قعدت اقلب في القنوات فلقيت فيلم طريق الأمل بتاع فاتن حمامة و شكري سرحان شغال فاتفرجت عليه .

المفروض إن فاتن حمامة في الفيلم كان ليها ماضي - على رأي شكري سرحان - طبعا كأي فيلم عربي محترم والدتها كانت مريضة ومكنش في حل قدامها غير كده

المهم نرجع لسبب كتابتي هنا - أكيد مش علشان أقولكم أني شفت الفيلم مثلا -

شكري سرحان اللي قابل فاتن حمامة في بيت مشبوه - بيت دعارة يعني - وعارف كل حاجة عنها طلب ايدها للجواز

طبعا أنا أصابني ذهول وجالي عته منغولي وأنا بتفرج مع أني مش أول مرة أشوف الفيلم


وجه على بالي سؤال

أي راجل شرقي ده اللي هيقبل يتجوز واحدة ليها ماضي؟!

ده ولا في التلاتينات ولا في الأربعنيات ولا الخمسينات ولا في 2008 ولا حتى في 2105

مش بيتهيألي إن فيه راجل شرقي ممكن يرضى بكده أبدا حتى لو كانت البونية يا عيني اضطرتها الظروف تعمل كده

أنا عن نفسي عمري ما هضمت نظرية إن الواحدة تعمل كده علشان أبوها عيان أو أمها بتموت ولازم تنقذهم .. أنا عندي تسرق أو حتى تموت أحسن

ده حتى المثل بيقول تجوع الحرة ولا تأكل بثدييها

المهم نرجع لمرجوعنا

هل يقبل الرجل الشرقي الزواج من إمرأة لها ماضي ؟؟

أنا في رأيي إن ده مش ممكن يحصل

هيجي حد يقولي ما يمكن بيحبها ؟؟

هأرد وأقوله كلا وألف كلا .. صحيح هما بيقولوا الحب يصنع المعجزات لكن بيتهيألي إن المعجزة دي خارج نطاق قدراته

وسيقف عندها الحب عاجز لا حول له و لا قوة

ومهما كان الرجل بيحب المرأة عمره ما هيقدر ينسى الماضي أبدا

هناك ٢٩ تعليقًا:

  1. بصي انا شايف ان اجابة الموضوع ده مش سهلة , فانا قلتلك طبعا مش ممكن يغفرلها فانا كده بحكم علي انسان بالاعدام بصرف النظر عن اسباب انحرافها واكني بقولها لاما تنتحري لاما خليكي في اللي انتي فيه

    ولو قلت ايه المانع يبقي انا بتغافل عن طبيعة النفس البشرية اللي اكيد مش سهل تغفر بسهولة واكيد الشك ايكون دايما موجه في كل تصرف بتعمله

    طيب ايه الحل

    بداية لازم هي تكون توبتها صادقة فعلا ويكون احساسها بالندم حقيقي ..

    ثانيا لازم يكون بيحبها بجد عشان يقدر يغفرلها بجد

    ثالثا : ان هو يكون شخصية قوية وغير مترددة ولو احس ولو في لحظة ان جواه صعب ينسي فالافضل انه يسيبها بدال ما يعذبها ويعذب نفسه معاها

    تقبلي مروري

    ردحذف
  2. بصى يا هبه الموضوع اللى طرحتيه دة اكتر من معقد
    لكن كلامك صح
    لا يمكن واحد يقبل ان يتجوز مومس
    كل سرير فى كل شقة شاهد عليها
    انا مش قاسية ربنا غفور رحيم
    لكن الناس مش ربنا
    ولو حصل واتجوزو يبقى نزوة
    وهيطلقها لما يفوق منها

    ردحذف
  3. اكيد محدش هيرضى
    اذا كان الرجاله دلوقتى بيعتبروا البنت المخطوبه ليها ماضى وبيذلوها بالخطوبه دى
    ده حتى لو واحد عرف واحده و غلط معاها بيعتبر انه ده ماضى مينفعش يتجوزها عشانه

    عايزه واحد يتجوز واحده اتعرف عليها فى بيت دعاره ؟ اشك طبعا

    ولا ايه رأيك ؟؟؟؟؟

    ردحذف
  4. عشان ماتفهمنيش غلط أكيد محدش هايتجوزها لأنه صعب جدا جدا جدا .
    بس نتكلم بقى من الناحيه التانيه
    واحده عايشه مع امها ومقطوعه من شجره وامها بتموت والصيدليه تحت البيت ومعهاش فلوس او لابد من عمليه خطيره وغاليه
    حلو لحد كده
    الناحيه التانيه بقى جارها واد لبط وصايع وقاعد للبت فى الرايحه والجايه وبيعرض عليها اى شىء واى مبلغ
    صدقينى احتمالات انها تضحى بنفسها هاتبقى اكبر من انها تسيب امها تموت
    ولو انه مش هايبقى تضحيه
    قصدى تفرط فى نفسها
    .
    واضح ان انا طولت اوى
    باى

    ردحذف
  5. ممكن اقول علي حاجة
    كويسة اوي اتعلمتها في اليومين دول

    كل شيئ في الدنيا دي جايز

    بجد موضوعك صعب اوي اوي
    بس بجد فكرة البوست هايلة
    وانا عن نفسي واحد من الناس عمري ما هرضي ان شالة لو حبيتها 100000مرة
    اذا كان دي واحدة محبتش نفسها ورمتها للكلاب الضالة في كل شارع
    اجي انا واحبها ازاي
    وحتي لو حبيتها هيكون حب شفقة مش حب
    صافي واكيد هتكون لي مشاكل كتيرة انا في غني عنها

    كانت اول زيارة
    مدونة كويسة معبرة ناضجة الفكر والاحساس

    عبدالرحمن

    ردحذف
  6. بداية الموضوع مش سهل ابدا معتقدش انوا هيرضى بدة خالص لاننا شرقيين فى الاول والاخر ودة مرتبط بالكرامة اكتر ممكن يكون حبها بس حتى الحب صعب انوا يكون محامى دفاع فى محكمة الضمير اللى هيفضل يانبة لو اتجوزها موضوع جميل اوى يا هبة
    استمرى فى مواضيعك الحية اللى فعلا بتشد اى حد يقراها
    مدونتك هايلة اوى وواقعية جداااااااا
    فى نجاح دائم وربنا يوفقك

    ردحذف
  7. مدونتك حيوية جدا وواقعية جدا جدا وأنا اتفق معك فى الرأى .. فالرجل الشرقى لا يقبل أن يتزوج من فتاة لها ماض حتى لوك كان هذا الماضى معه هو شخصيا!!
    Maha
    www.mashrabeya.blogspot.com

    ردحذف
  8. السلام عليكم
    يا جدعان صدقونى لو هى فكرت اصلا فى الجواز
    عمرها ماكانت هتتبع الطريق دا
    ومحدش يقول الظروف والجوابات
    طالما الواحده اختارت طريق الشيطان
    بيتهيالى من الصعب انها ترجع عنه
    حتى لو حد طلبها للزواج
    لانى اللى هيطلبها للزواج
    هيبقى واحد زيها بالضبط
    مش علشان يتستر عليها لاء
    دا يمكن علشان يكسب من جسمها
    عذرا اختاه

    تقبلى مرورى المتواضع
    وان شاء الله مش هتكون الزياره الخيره
    احمد سكر

    ردحذف
  9. هبه

    موضوع جميل جدا واسلوبك هايل في كتابته

    دا بس لو كان فيه حب قبله بيفضل فاكر ان كان فيه واحد غيره مابالك انتي بقه بيت مشبوه يعني مش واحد

    انا اول مره اتكلم في الموضيع الكبيرة دي
    يارب اكون عرفت اوصل رأي

    سلامي ياقمر ومرسي لزيارتك عندي نورتيني بجد

    سلامووووووووز ....... وزة

    ردحذف
  10. ممكن المصرى يتجوز واحده عنها ماضى لكن مش شغاله فى شقه دعاره للاسف لان الماضى بيكون قصه وماتت مش لسه بتشتغل وهتبطل عشانه صعب جدا ؟
    الحياه ساعتها هتكون صعبه عليها هى وهو ممكن يذلها بالموضوع ده كل شويه ؟
    يعنى قومى اعمليلى سندوتش
    هتقوله لا
    هيقولها متنسيش انى جايبك من بيت مشبوه
    تقوم بسرعه تعمل السندوتش

    ردحذف
  11. هبه مدونتك رائعة لكن لا يعجبنى انك لا تردى على التعليقات
    وهذا اعتبره عدم اهتمام بناس تهتم بك وبكتاباتك
    انا بنصحك عشان تنطلقى للامام مش تمشى للامام
    سلام

    ردحذف
  12. صحفية روشة

    كنت أنوي اليوم أن أرد على كل التعليقات

    لكن أنتظرت حتى يأخذ الموضوع وقته في النقاش

    أنا فعلا عندي موضوع جديد

    لكن قررت أجل تنزيله والرد هنا لإن في المواضيع اللي فاتت أما كنت أحط رد وأنزل موضوع جديد

    الموضوع القديم بيموت

    فأنا كنت حابة أسيب فرصة لكل من يحب يعلق

    لكن بالتأكيد أنا أكن كل الاحترام والتقدير لكل من شاركني النقاش وأنتي على رأسم

    ولي عودة

    ردحذف
  13. عزيزتى
    احب اقولك ان رايك فى الفيلم عجبنى جدا برغم ان فى كتير من البنات صغيرات السن يقولة طب ومالة اصل الحب دة ممكن يعمل المعجزات .
    هو طبعا ممكن يعمل المعجزات بس تكون خلفيتة بيضاء وشفافة وانا بحكم انى رجل شرقى اعرف كيف يفكر الرجال ( الا طبعا انصاف الرجال ومن هم ليس لديهم شئ من الحمية والرجولة وفى هذا الزمن موجودين بالهبل)
    فالرجل الشرقى الغيور لايسمح ابدا بمثل هذة الامور حتى لو حب والحب (بهدلة)زى ما قال اسماعيل يس والدوامة خدتة وسامحها أعتقد انة عمرة ما حينسى الماضى دة وبعد الجواز والذى منة عند اول خلاف حيقوم بمعايراتهاويفكرها انة انقذها من الوحل اللى كانت عايشة فية ومش هيغفرها ولا يغفر لنفسة
    ومش حيكون مطمئن على تربية اولادةيعنى جوازة محكوم عليها بالفشل وما هو الا كلام افلام غير واقعى .
    واخيرا انا عارف ان فى ناس كتير هيزعلوا منى عشان الصراحة دى

    ردحذف
  14. عزيزتى
    احب اقولك ان رايك فى الفيلم عجبنى جدا برغم ان فى كتير من البنات صغيرات السن يقولة طب ومالة اصل الحب دة ممكن يعمل المعجزات .
    هو طبعا ممكن يعمل المعجزات بس تكون خلفيتة بيضاء وشفافة وانا بحكم انى رجل شرقى اعرف كيف يفكر الرجال ( الا طبعا انصاف الرجال ومن هم ليس لديهم شئ من الحمية والرجولة وفى هذا الزمن موجودين بالهبل)
    فالرجل الشرقى الغيور لايسمح ابدا بمثل هذة الامور حتى لو حب والحب (بهدلة)زى ما قال اسماعيل يس والدوامة خدتة وسامحها أعتقد انة عمرة ما حينسى الماضى دة وبعد الجواز والذى منة عند اول خلاف حيقوم بمعايراتهاويفكرها انة انقذها من الوحل اللى كانت عايشة فية ومش هيغفرها ولا يغفر لنفسة
    ومش حيكون مطمئن على تربية اولادةيعنى جوازة محكوم عليها بالفشل وما هو الا كلام افلام غير واقعى .
    واخيرا انا عارف ان فى ناس كتير هيزعلوا منى عشان الصراحة دى

    ردحذف
  15. مرحبا

    أولا أنا سعيدة جداجدا لأن أول مرة من يوم ما بدأت التدوين أكتب بوست ويجي عليه عدد الكومنتات ده

    خصوصا أني كنت لسه بشكو في البوست السابق إن فيه ناس كتير بتدخل وبتمشي ومش بتعلق وده كان محسسني أن المدونة فاشلة

    البوست ده كان الوضع مختلف

    إلي جانب الناس اللي متعودة تتابعني دايما زي الفارس الملثم و الصحفية الروشة والناس اللي سبق وشرفتني واللي أنا سعيدة بجد أنهم كرروا الزيارة زي راسبوتين وجمهورية مصر العربية و سارة علي


    كان فيه ناس أول تشرفني وسعدت جدا بزيارتهم لأن ده قادني لزيارة مدوناتهم المتميزة فعلا

    وأتمنى أنهم يكرروا زيارتهم ليا تاني

    وأحب أقول برضه إن أنا مقصدتش أتجاهل الناس اللي دخلت وحطت رد هنا

    بس زي ما قلت أنا كنت حابة أدي وقت للنقاش لإن غالبا بعد ما أرد وأنزل بوست جديد النقاش هنا هيقف

    شكرا تاني لكل اللي علق ويارب تكرروا الزيارة

    ردحذف
  16. الفارس الملثم

    أهلا بيك ومنورني دايما

    عجبني في كلامك نقطة محدش غيرك أثارها

    إن أحنا لما هنرفض أننا ندي الشخصية دي فرصة تحيا حياة جديدة يبقى كأننا بنقول لها موتي أو أفضلي زي ما أنتي

    وده طبعا حكم قاسي خصوصا إذا كانت هي فعلا تابت توبة صادقة وعايزة تبدأ من جديد

    بس أنا شفت من خلال مجمل التعلقيات سواء من الفتيات أو الشباب إن الرأي العام مقارب لرأيي

    مفيش راجل هيقبل بالوضع ده

    إلا لوكانت شخصيته زي ما أنت قلت وكانت هي صادقة في نيتها فعلا

    تحياتي وشكرا على مرورك

    ردحذف
  17. صحفيتنا الروشة

    أهلا بيكي ومبروك على تغيير الأسم

    أنتي رأيك من رأيي

    بس انتي بتقولي أنه ممكن يتجوزها على سبيل نزوة ولما يفوق هيطلقها

    بس أنا مش معاكي في النقطة دي لأن واحدة دي مهنتها هتبقى متاحة من غير جواز

    أنما لما واحد يوصل لقرار أنه يتجوز الواحدة دي أكيد قراره هيكون أكتر من مجرد نزوة

    زي خالد صالح في فيلم عن العشق والهوى كده

    أكيد هيكون فكر كتير أوي قبل ما يوصل لقرار زي ده

    شكرا على مرورك يا قمر

    ردحذف
  18. CALM CAT
    أول مرة تنوريني ويارب متكونش الأخيرة

    أنا كنت قايلة رأيي في البوست وهو من رأيك

    فعلا الواحدة لما بتكون اتخطبت والخطوبة اتفكت ده يعمل معاها مشكلة مع أني شيفاها حاجة عادية

    اتنين اتخطبوا وبمرور الوقت حسوا بعدم وجود توافق بينهم وأنهم هينجحوا كزوجين فسابوا بعض ايه المشكلة هنا

    المطلقة نفس الوضع المجتمع بيبص لها بصة مش قد كده مع أن ده وارد يحصل برضه

    تحياتي وشكرا على رأيك

    ردحذف
  19. جمهورية مصر العربيه

    أهلا بيك

    بداية أنت ما طولتش ولا حاجة .. المدونة مدونتك وأنا يهمني أسمع رأيك ووجهة نظرك في الموضوع

    أنت رأيك من رأيي

    بس زي ما قلت في البوست

    عمري ما قدرت أهضم نظرية أن واحدة تعمل كده علشان الظروف أجربتها

    جايز كلامي نظري لأني بأقول رأيي في تجربة ما مريتش بيها وبالتالي ممكن يكون حكمي غير صائب

    بس أنا عامة مش برتاح لحاجة معينة

    مثلا اللي كانت ظروفها بالشكل وده أضطرها تفرط في نفسها زي ما قلت ده مش مبرر لتصرفها

    زي الراجل اللي مرتبه مش مقضيه فبيضطر يسرق أو يرتشي

    أنا متعاطفة تماما معاه ومع ظروفه لكن ده في النهاية ما ينفيش إن السرقة أو الرشوة أو اللي البونية دي بتعمله غلط

    تحياتي وشكرا على مرورك

    ردحذف
  20. Abd-Alrahman & NOUR

    الصيدلي المطحون جدا

    أهلا بيك في المدونة

    شكرا على كلام أنت كمان مدونتك جميلة

    بص أنت بتقول أزاي أحب واحدة رمت نفسها للكلاب

    مش عارفة بيتهيألي برضه مفيش واحدة ممكن تكون عملت كده بكامل ارادتها

    يعني دايما في الأعمال الدرامية بتلاقيه غالبا مطلع النموذج ده مجبور وبيعمل كده غصب عنه

    الشخصية الوحيدة اللي عملت كده بكامل ارادتها هي حميدة في زقاق المدق لنجيب محفوظ

    الوحيدة اللي كان عندها أختيار بين الطريقين وبدل ما تختار الحياة الكريمة أختارت الطريق الأسوأ

    ودي حاجة عمري ما قدرت أفسرها بصراحة

    تحياتي ليك وشكرا على مرورك

    ردحذف
  21. سارة علي

    أهلا بيكي وشكرا على كلامك الرقيق

    أنتي رأيك من رأي الأغلبية

    فعلا صعب جدا إن الرجل يتجاهل الماضي ويبدأمن جديد

    شكرا على مرورك

    ردحذف
  22. مها

    أهلا بيكي

    أنتي كمان بتشاركينا نفس الرأي

    شكرا على كلامك و مرورك

    ردحذف
  23. أحمد سكر

    أهلا بيك

    بص أنا لسه كنت قايلة الكلام ده في ردي على عبد الرحمن

    بيتهيألي نسبة قليلة أوي اللي هتختار الطريق ده بإرادتها

    أعتقد أن محدش يحب يبقى كده

    وبرضه رأيي ده نظري بحت

    والعلم عند الله

    تحياتي ليك وتنور في أي وقت

    ردحذف
  24. انين الحزن

    أهلا بيكي وشكرا على زياتك وكلامك الرقيق

    رأيك زي رأيي ورأي الغالبية العظمى هنا

    رأيك وصل يا قمر

    تحياتي وبانتظارك دايما

    ردحذف
  25. raspoutine

    أهلا بيك منورني

    أنت الوحيد تقريبا اللي قال رأي مخالف

    وقال أن الرجل الشرقي ممكن يقبل

    ولو أن ده صعب في رأيي لكن شئ جايز

    تحياتي ليك وشكرا على مرورك

    ردحذف
  26. صوت من مصر

    أهلا بيك

    هو حتى الرجل لو وصل لقرار أنه يتزوج تلك المرأة

    الماضي هيفضل موجود في خياله برضه زي ما قلت

    تحياتي ليك وشكرا على مرورك

    ردحذف
  27. ابو يوسف المصري

    هو الحب صحيح بيعمل المعجزات بس الموضوع اللي بنتكلم عنه ما ينفعش القرار فيه قرار القلب فقط

    العقل هيدخل في الموضوع ومنطق العقل هيخلي الحب يتراجع

    على فكرة كلامك ما يزعلش

    تقريبا كل اللي شارك في النقاش له نفس رأيك

    يا أما بيعتقد إن الرجل لن يقبل من الأساس أو أنه إذا قبل فالجوازة فاشلة من البداية لأسباب كتير مختلفة

    تحياتي ليك وشكرا على مرورك

    ردحذف

اتكلم براحتك أنت في مدونة ديموقراطية جدا واخد لي بالك