تناقــض

واحدة لابسة جيبة جينز وبلوزة مشجرة قصيرة وبعدين مكبرة الطرحة شوية ولابسة غطاء للوجه ؟؟

أو واحدة لابسة عباية سودا ومغطية وشها برضه بس لابسة طرحة مطرزة ولا كأنها عروسة في فرح

واحدة لابسة بنتاكور وشبشب بصوبع وطرحة !!!!

واحدة محجبة بس ضاربة شعرها أوكسجين ومنزلة الأسة من تحت الطرحة مش عارفة ليه الصراحة يمكن خايفة الناس تحسبها قرعة ؟!!

واحد زميلي في الشغل ملتحي وشفت مراته مرة .. مراته بقى منقبة كانت لابسة اسدال أسود وطرحة وغطاء وجه أسود ومع ذلك الأخ بيبص على البنات عادي

هيجي حد يقول لي مهي يمكن اللي بيبص عليها عاملة حاجة أوفر

هأقوله لا أبدا وحياتك .. أنا مثلا بلبس بنطلونات واسعة وعليها حاجات طويلة ومبحطش مكياج

ولا حاجة ومحجبة الحمد لله حجاب عادي مش مكبرة الطرحة صحيح بس على الأقل حجابي مش تيواني وزمايلي زي حالاتي كلهم بيلبسوا جيبات وطرح كبيرة يعني أنا أكترهم بوظان .. يبقى حد يفهمني حضرته بيبص على ايه

كل الأمثلة اللي فوق دي تدل على مدى التناقض الموجود في المجتمع

وفيه نوعين من التناقض

أول نوع الناس اللي انا اتكلمت عنهم .. دول بيناقضوا نفسهم الواحدة بتلبس الحجاب لكن لا هي ولا سلوكياتها تمت للحجاب بصلة

وبرضه واحد سايب دقنه والمفروض ظاهريا أنه متدين لكنه في نفس الوقت بصباص

وأنا بقى في رأيي إن اللي اختارت تلبس النقاب أكيد وصلت لدرجة عالية من الإيمان والإلتزام وصلتها للقرار ده وبالتالي المفروض إن سلوكياتها تكون على نفس المستوى من التدين والإلتزام .. مش تتصرف بشكل يسيئ للنقاب

وبنفس المنطق المفترض برضه إن زيها يكون خالي من البهرجة والمغالاة مادام هي اللي اختارت كده بنفسها و إلا كان بلاش النقاب وتلبس مشجر وملون وبترتر زي ما تحب

والمحجبة برضه مادام اختارت تلبس الحجاب يبقى لزومه ايه تين الأسة و لا تلبس بنتاكور ولا الحتة اللي غطتها فوق لازم تعريها تحت
الحجاب والنقاب سلوك في الأساس مش مجرد زي بنلبسه تقضية واجب وخلاص

النوع التاني من التناقض بيكون في نظرة الناس للمنقبة أو الملتحى على أنهم ملايكة مُنزلينفي حين إن النظرة دي ممكن تكون غلط لإن عمر ما كان المظهر هو المقياس وممكن يكون شخص مظهره عادي جدا لكن بينه وبين ربه عمار ومتدين وملتزم

في فيلم أنا مش معاهم _ الفيلم ده حلو جدا بالمناسبة ومثل جيد على كلامي هنا _ بعد ما أحمد عيد كان ربى دقنه وبقى يلبس جلباب أبيض و قاطع كل اصحابه القدام وصل في النهاية لنتيجة إن الحكاية مش بالشكل أكيد المضمون أهم بمراحل

ايه رأيكم أنتم بقى