هل كلنــا نـهــى رشــدي؟؟؟

بيتهيألي كل الناس تقريبا سمعت عن نهى رشدي

أنا مكنتش شفت الحلقة بتاعتها في 90 دقيقة بس بعد كده سمعت عنها وتابعت موضوعها لحد ما صدر حكم في قضيتها بالسجن تلات سنين للشخص اللي اتحرش بيها

يمكن ناس كتير اتكلموا عن الموضوع وعنها في مدوناتهم أو حتى في أحاديث شخصية عادية

بس يمكن أنا كبنت حسيت باحساسها أوي ويمكن أي بنت هتحس بالموضوع أكتر وخاصة لو كانت اتعرضت له

حتى لو مكنش بشكل فعلي زي ما حصل معاها فعلى الأقل بالكلام والمعاكسات

أنا عن نفسي اتعرضت له قبل كده

يعني واحد معدي من جنبي في الشارع يروح قايل كلمة ملهاش لازمة أو الصبح وأنا رايحة شغلي وواقفة علشان أعدي الشارع تقرب عربية من الرصيف وتهدي على سبيل التجربة يمكن اللي واقفة دي تحب تركب مثلا !!!

وكل المواقف السابقة بتترك نفس الأثر .. يعني ممكن الكلمة الخادشة دي تجرح أكتر من التحرش الفعلي والمشكلة إن الموضوع مابقاش خاضع لقاعدة معينة

يعني مش لازم اللي يحصل لها كده يكون لبسها مش محترم أو شكلها ملفت مثلا بل بالعكس دلوقتي كله بيحصل معاه كده

حلوة بقى وحشة .. لابسه واسع ومحترم .. محجبة أو لاء مفيش قاعدة ثابتة للموضوع

ولا لعمر المتحرش لأن الحكاية دي كمان بيعملها أطفال صغيرين يمكن يكونوا في أولى أعدادي !!!

حاجة تانية عايزة أقولها في الموضوع ده شجاعة نهى أو بمعنى أصح اصرارها على استرداد حقها

سمعت تعليق ظريف أن يسرا هي السبب لأنها عملت كده في مسلسل قضية رأي عام وبالتالي كل البنات هتعمل زيها وأي واحدة هتمر بموقف مشابه هتتصرف زيها

أنا عن نفسي مقدرش أعمل زيها وكل اللي أعرفهم ومروا بمواقف مشابهة كلهم زيي تقريبا

الموضوع بيبقى سخيف ومهين وغالبا مش هقدر أقول في البيت حصل معايا كذا أو واحد قالي كذا و غالبا ممكن ما أتكلمش عن الموضوع نهائي

يمكن السبب في ده أن الناس اللي حواليك هتتقبل الأمر ازاي وهيبوصلك ويتصرفوا معاك ازاي

والأهل نفسهم هل هيكونوا متفهمين وعندهم وعي زي أهل نهى ولا هيتقال بلاش فضايح أو شوشرة
كده الموضوع له وجهتين نظر

يا أما تسكت على حقك وترضى بالعواقب يا أما تأخد حقك وتقبل الخسائر المعنوية اللي هتعود عليك

طبعا أنا عارفة إن السكوت عن الحق هو السبب الرئيسي والأهم في ضياع أي حق بس زي ما قلت أنا عن نفسي مش هأقدر أعمل زيها حتى بعد ما هي عملت كده.

مش هأقدر أحط نفسي تحت الميكروسكوب وأكسر تابوهات المجتمع

إعلانات أم اشتغالات

-1-

احسبها صح تعيشها صح

أول حملة إعلانية هي حملة احسبها صح تعيشها صح

وخلاصتها أنك لو نظمت نفسك هتعرف تعيش كويس

ومثال عليها شاب عايش لوحده وعلشان يوفر وبما أنه بيحسبها صح فهو بيطبخ أكله بنفسه
ومبيطلبش دليفيري وبيكوي هدومه بنفسه وتوفيره ده -المفروض هو كده وفر- هيخليه يحقق
أحلامه أسرع وبينتهي الإعلان بصورته وهو بيخطب وفرحان

ياريت كل واحد يراجع حساباته علشان يشوف الغلط جاي منين

-2-

الفشخرة والمنظرة

الإعلان ده بيبدأ بزوجين سعدا وفرحانين بيخشوا السوبر ماركت ويشتروا من كل حاجة
بشراهة ويحضروا سفرة معتبرة والناس تيجي تأكل وتمشي

وبعدين بقية الأكل تترمي في الزبالة مع أن الصواني شكلها يفرح وزي ما هيا تقريبا ... المهم يكتشف الزوجين أنهم أنفقوا كل اللي حيلتهم

وينتهي الإعلان بإن الفشخرة والمنظرة هما سبب الغلاء اللي أحنا بنعاني منهم

ولو كل واحد مشى على قده مكنش حصل كده وإن الأكل اللي بنرميه في غيرنا أولى بيه

أنا شخصيا مش هصرف كل مرتبي على عزومة لأني أكيد هتصرف في حدود إمكانياتي ...ثم
مين قال أنه لو فاض أكل من العزومة هرميه لا سمح الله

يا أكله في يوم تاني يا أما هديه لأي حد محتاج ينتفع بيه بدل ما يكون مصيره الزباله

وغير كده أبقى استحق الحجر وزوال النعمة

-3-

الضريبة العقارية

إعلان طويل عريض أشبه بفيلم قصير مليان بحوار تعليمي الغرض منه شرح الضريبة العقارية
وتبريرها

والإعلان بيقول إن 99% من الناس مش هيدخلوا في الضريبة العقارية لأنهم بيسكنوا في
عقارات قيمتها أقل من نص مليون جنيه

واللي عنده نص مليون هيدفع 13 جنيه فقط لا غير شهريا وبتتدرج الضريبة لحد 160 جنيه للي
عنده بيت قيمته 2 مليون جنيه

وبيشرح الإعلان تاريخ الضرية وفوايدها

ألا أنتوا ساكنين في بيت قيمته كام

-4-

اتكلم أرضي يا ابن بلدي

سلسله إعلانات الشركة المصرية للإتصالات واللي شعارها اتكلم أرضي يا ابن بلدي وسيبك
من المحمول

دي دقيقة الأرضي بتلات قروش .. اتكلم منه وما ترحموش

وافتكرت الإشتراك والفاتورة اللي بندفعها كل تلات شهور

وعجبي ...