كل سنة وأنتم طيبين

كل سنه وانتم طيبين , وان شاء الله يكون عيد سعيد عليكم وعلي امة المسلمين جميعا ويتعاد علينا كلنا بالخير يارب

حتى لا نحترق بنارنا

طالعتنا صحف اليوم بخبر أصابة 35 ضابط مصري أمس خلال المظاهرة التي قام بها المصريون أمام السفارة الجزائرية .. كم يلزمنا أن نفقد من رجالنا وشبابنا قبل أن ينتهي هذا الأمر للأبد .لا أدري لماذا يصر الجميع على إشعال نيران الغضب في دماء المصريين .. لو كان الإعلام الخاص وحده هو المسئول عن ذلك لقلت أنها حرب فضائيات فهذا يتهم ذاك بالغباء والأخر يتهمه بأنه عميل يعمل بقناة تمولها جهات غير مصرية وبالتالي يعمل هو لحساب تلك الجهات لكن الأدهى والأمر أن الإعلام الوطني يسير في نفس الهوجة ويمكنك أن ترى هذا يوميا فقط لو شاهدت البيت بيتك واستمعت لتعليقات تامر وخيري رمضان ... مظاهرات الأمس أبسط ما يمكن أن يحدث نتيجة لهذا الشحن الإعلامي المستمر والمستفز ... من فضلك لا تعرض عليّ صور لعلم وطني وهو يحترق ويداس بالأقدام ولشباب بلدي وهم يضربون ويهانون ثم تطلب مني بعدها أن أتعامل مع الأمر بروية وهدوء وبمزيد من التعقل وضبط النفس ... لقد أنتظر الشعب رد فعل من الحكومة يشفي غليلهم ولما لم يحدث شيء تصرف كل على هواه لذلك يجب أولا أن نكف عن الضغط على الجرح كي لا ننزف المزيد . لقد كنت أشاهد أحدى الفضائيات وصدمت عندما سمعت كلمة حرب قالها أحد الجالسين ببساطة وسط كلامه أما أنا فصعقت حرب ايه ولأي سبب ومن سنحارب .. الجزائر ... أنا لا أدافع عن الجزائر وما حدث منها هو سقطة رياضية وسياسية وإساءة في حق مصر لكن هل وصلت الأمور للحرب .أريد أن أسال كل من يشعر بالأهانة والإساءة هل ترى أن الحرب هي الحل الأمثل الذي يرضيك ويرد لك كرامتك . أو كما يقول البعض أن نقطع كافة العلاقات المصرية الجزائرية يعني بلاها ميمي وبلاها سوسو وهو حل غير منطقي بالمرة .... هل ننوي طرد السفير الجزائري وقطع كافة العلاقات الجزائرية ومقاطعة كل ما هو جزائري وفي المقابل نبقي على حبيبنا وأخونا السفير الإسرائيلي ونرضي بالتطبيع طب تيجي أزاي دي .. مع العلم إن إسرائيل صاحبة أكبر قفا أكله العرب في يوم من الأيام. حل غير منطقي ليس فقط بسبب أن كلانا عرب ولا لإن كلانا نسكن نفس القارة ولا حتى من أجل وطني حبيبي الوطن الأكبر فجميعنا يعرف أنه لا وجود لمثل هذا الوطن على أرض الواقع فقد ماتت الوحدة العربية منذ زمن وأصبحت كل دولة تتصرف بما يتواقف مع مصالحها وتضرب طناش وقت ما تحب ... إنما بسبب إسرائيل التي ولا بد أنها تضحك بينها وبين نفسها وهي تشاهد ما يحدث بين من مصر والجزائر وبسبب العالم الي يشاهدنا الأن ويسخر من جهل العرب وتخلفهم حتى أنهم يقتلون بعضهم من أجل مباراة كرة قدم .. نعم تلك هي الصورة التي سيرانا العالم بها للأسف .. أنا ككثير غيري من المصريين أشعر بغصة وضيق شديد وكلما زاد الكلام عن الموضوع زاد هذا الشعور لكن في الوقت نفسه لا أريد أن تزداد النار اشتعالا ونكون نحن أول ما تأكله .

وأخيرا انتهت المعركة

مبروك للجزائر وهاردلك لمصر وتحية لمنتخبنا القومي ... لقد فعلوا كل ما بوسعهم

كلامهم اللي دخل دماغي

حسنا حان وقت الاعتراف يا رفاق


احم عندي هواية لكن غريبة شوية ... بحب جدا أقرا الكلام اللي مكتوب على السيارات الملاكي أو المشاريع - ميكروبصات بلهجة أهل القاهرة - من الخلف .. بحس إن كل واحد كاتب حاجة شايف انها خلاصة الحكمة وسر الوجود وساعات فعلا بيكون فيه كلام بيعجبني.


هقول ايه بس المهم أني مش قادرة أبطل الهواية دي وطول ما أنا راكبة المشروع أفضل أبص من ورا الأزاز و اتفرج على اللي الناس كاتبينه..


فيه ناس بيبقوا كاتبين أسامي أولادهم .. تلاقيهم كاتبين الأميرة ياسمين .. الأمير محمد أو كاتبين الأسامي مباشرة بدون ألقاب .


وفيه ناس بتحط حاجات مواكبة للأحداث ... يعني من بعد الرسوم المسيئة للرسول عليه أفضل الصلاة والسلام بقيت أشوف ناس كتير جدا كاتبين "لا إله إلا الله .. محمد رسول الله" .


والنهاردة شفت سواق مشروع كاتب "يا رب مصر" طبعا العبارة عامة وفيها دعاء شامل لمصر لكن أنا متأكدة أنها مخصوص علشان الماتش.


من كام يوم شفت سواق مشروع كاتب " الكلاب تعوي والقافلة تسير" والناس اللي في المشروع اللي أنا راكباه قعدوا يتريقوا مش عارفة ليه بصراحة.


من مدة شفت مشروع كاتب جملة عجبتني جدا .. الراجل كان كاتب " آه يا ناره اللي مش كاره " فعلا ناس كتير بتحشر نفسها في اللي مالهاش فيه بدون فهم ولا معرفة وبيبقوا مقتنعين أنهم بيفهموا في كل حاجة ويقدروا يعملوا أي حاجة .


جملة تانية أثرت فيا جدا بس المرة كانت على عربية ملاكي كان صاحبها قايل "only God can judge me"

الله وحده يمكن أن يحاسبني


فضلت أفكر فيها كتير قوي بعدها وصاحبها عنده حق مش من حق حد يحكم على حد ويحاسبه لإن ببساطة محدش خالي من العيوب أو الذنوب.


حد فكر يعمل زيي قبل كده ولا أنا الوحيدة الي لسعت بتعمل كده ولو فيه ياريت يقول لي على الجمل اللي لفتت نظره ...

اكتشف نفسك.. الأخ اجتماعي.. ولّا عود درة وحداني في غيط كمون؟؟

اكتشف نفسك.. الأخ اجتماعي.. ولّا عود درة وحداني في غيط كمون؟؟

خواطر أكتوبرية

منتخب الشباب خسر وهو ما يستحق أن يطلق عليه لعنة الطلاينة

يا جماعة محدش بيكسب الطليان ويكسب تاني في الماتش اللي بعده

*******

بلاش يا جماعة نربط 6 أكتوبر بمباراة كرة قدم لإن 6 أكتوبر أكبر من كده

******

أصابني أحباط تفاعلي مركب شديد لما عرفت القصة الحقيقة لسامية فهمي أو الصحفية ليلى عبد السلام

اللي طلعت مالهاش علاقة باللي حصل في المسلسل خالص

http://www.alssiyasi.com/?browser=view&EgyxpID=40807

ليلى عبد السلام لم تخاطر وتذهب لإيطاليا لتمنح معلومات للموساد ولم ينجح جهاز المخابرات المصري في تهريبها وإعادتها للقاهرة كما حدث في المسلسل لإن الواقعة في الحقيقة حدثت في القاهرة والباقي من خيال الدراما.

*****

يا ترى إسرائيل بتعمل ايه في ستة أكتوبر

بعد ما شفت حرب الجواسيس فكرت هما الإسرائيلين مش بيعملوا مسلسلات لوقائع نجح فيها الموساد في التغلب على جهاز المخابرات المصري ولا هما عمرهم ما تغلبوا علينا أبدا

********

إذا لقيت واحد يبيع علم مصر فالشارع فتأكد أن المنتخب بيلعب ماتش النهارة

فعلا كنت بتمنى أعيش أيم أكتوبر فعلا .... أيام ما كان أسم مصر مش مرتبط بس بماتش كورة

رمـضـــان كـريــــم

كل سنة وكلكم طيبين وبخير

واحشني جدا كلكم والله

يارب رمضان السنة دي يكون شهر عتق ومغفرة لينا كلنا يارب

ربنا يتقبل صيامكم وقيامكم وصالح أعمالكم

كل سنة وأنتوا بخير

شيـكــا بيكــا

شيكا بيكا وبوليتيكا .. ومقالب أنتيكا

ولا تزعل ولا تحزن .. اضحك برضه يا ويكا

ها ها ها ها .. ع الشيكا بيكا


أنا بضحك من قلبي يا جماعة

مع إني راح مني ولاعة

وبطاقتي ف جاكتة سرقوها

وغتاتة كمان لهفوا الشماعة

بقيت أرجف من السقعة

لكن بضحك

الضحك ده مزيكا

كهربا علي ميكانيكا

اضحك ع الشيكا بيكا

ها ها ها ها .. ع الشيكا بيكا


أنا راح مني كمان حاجة كبيرة

أكبر من إني أجيب لها سيرة

قلبي بيزغزغ روحه بروحه

علشان يمسح منه التكشيرة

ادعوله ينساها بأي ويضحك

الضحك ده مزيكا

كهربا علي ميكانيكا

اضحك ع الشيكا بيكا

ها ها ها ها .. ع الشيكا بيكا

هتقولي الشيكا بيكا ايه هي ؟؟؟

هي الحركات اللي مش هيا

الفرقة .. والحرقة .. والغرقة

والزمبة ف البمبة الذرية

فبدال ما نطق يا وله .. لاء نضحك

الضحك ده مزيكا

كهربا علي ميكانيكا

اضحك ع الشيكا بيكا

ها ها ها ها .. ع الشيكا بيكا

*

*

صلاح جاهين ده مبدع بجد

توقفت الثرثرة

محمد مات

كل الناس بتقول إن محمد مات

وأنا مش قادرة أصدق

مش قادرة أصدق إني هكتب ومحمد مش هيدخل يعلق على البوست

على مدى سنة تقريبا هي عمر المدونة عرفت مجموعة كبيرة من الناس

ومحمد كان من أوائل الناس اللي عرفتهم

وبرغم أني معرفش كل أصدقائي هنا بشكل شخصي لكن يمكن أكون عرفتهم أكتر من ناس بشوفهم كل يوم

ببساطة لإن كل واحد هنا بيظهر زي ما هو .. مفيش حاجة بتجبر حد أنه يظهر بغير حقيقته

ولا يتصرف عكس اللي جواه

علشان كده أنا حسيت أني أعرف كل الناس اللي هنا كويس لأني عرفت أرواحهم وعقولهم مش بس عرفت شكلهم

كل الناس اللي عرفتهم هنا بقوا جزء من عالمي ... بقوا أخواتي

محمد مات

جملة صعبة أوي

واقع مش هقدر أغيره وهأخد وقت كبير على ما أقدر أصدقه واتعايش معاه

ربنا يرحمك يا محمد ويغفر لك ويجعل مثواك الجنة

ربنا يقبل حسناتك ويتجاوز عن سيئاتك ويصبر أهلك

مصر أمي ومهياش مرات أبويا

تعمدت أن أجعل عنوان ها البوست تنويعة على عنوان كتاب مصر ليست أمي .. دي مرات أبويا لأسامة غريب بهدف توضيح وجهة نظري

يمكن اللي خلاني اتكلم في الموضوع ده أني صادفت جروب على الفيس بوك يحمل عنوان الكتاب وفي الواقع الجروب فيه عدد كبير معديين ال 4000 تقريبا والهدف من الجروب ولفت نظري موضوع مطروح للنقاش بعنوان لو لم أكن مصريا يبقى قشطة اوي

والأراء في الردود على الموضوع متفاوتة اللي كاره البلد ومش طايقيها واللي مشيل الحكومة كل حاجة واللي بيدافع عن البلد واللي شايفنا سلبيين وبنتكلم بس من نغير ما نعمل حاجة بجد

أراء كتير متابينة وبعيدا عن الجروب وأعضاءه

نتكلم عن الفكرة الأساسية مصر أمك ولا مرات أبوك

المشكلة إن الورق بيتخلط ببعضه

أنا في رأيي - وأعتقد إن ده رأيي أغلب المدونين اللي هنا - أني لما بكتب عن أي حاجة مش عجباني في بلدي ..لما بنقد أي حاجة مش راضية عنها ده مش معناه أني بكره بلدي ومش طايقاها

بالعكس يمكن أنا وغيري بنعمل كده .. بنعمل كده علشان مشاكلنا توضح .. علشان اتناقش مع ناس غيري وأسمع رأيهم وعلشان أوضح رأيي حتى لو كنت مش بعمل حاجة فعلية تغير الواقع اللي بنقده ده

يعني الهدف مش كره البلد وشتمها بقدر مهو مناقشة متحضرة لمشاكل بنعيشها يمكن نقدر نحلها يوما ما

ونقدر نعيش ونعيش أولادنا في المستقبل حياة أفضل ونشوف بلدنا في أحسن حال زي ما بنتمنى نشوفها

انا بحب بلدي أوي ,اتمنى أشوفها أحسن وفي رأيي أنها هتبقى أحسن لو كل اللي ناس بتحبها وبتحاول ترفع من شأنها

هتقولوا لي بقى كلامك ده بقى وردي أو خيالي مش مهم

المهم إن مصر مهياش مرات أبويا