رمضـان كـريــم

أسأل الله لكم في شهر رمضان حسنات تتكاثر وذنوب تتناثر وهموم تتطاير وأن يجعل بسمتكم سعادة وصمتكم عبادة وخاتمتكم شهادة ورزقكم في زيادة وبكل زخة مطر وبعدد من حج واعتمر أدعو الله أن يتقبل منكم صالح العمل

كل عام وأنتم بخير

و رمضــان كـريــم

The Moment of Truth

من فترة كبيرة وأنا كنت عايزة اتكلم على الموضوع ده بس الظروف عطلتني

كان فيه برنامج بيذاع على mbc4 اسمه The Moment of Truth أو لحظة الحقيقة

أكيد أغلبكم سمع عنه أو شاهده

فكرة البرنامج عبارة عن شخص بيتقدم للبرنامج ويجاوب على عدد كبير من الأسئلة ويكون على جهاز زي جهاز كشف الكذب يقيس ردود أفعاله ويحدد مدى صدقه

ثم يتم سؤاله مجموعة من الأسئلة دي على الهوا وقدام كل الناس وتتقارن اجاباته باجاباته السابقة ويشوفوا هل هو بيكذب أو لاء

وده بيتم على الهواء مباشرة وفي وجود جمهور كبير في الاستديو مع وجود عدد من أهل أو أصدقاء الشخص المشارك واللي بيكون من حق كل واحد منهم أنه يعترض على سؤال من الأسئلة الموجهة للشخص المشارك

والأسئلة بتكون على مجموعة مستويات وكل مايزيد المستوى بتزيد صعوبة الأسئلة ومن حق المتسابق يوقف في أي وقت ويكتفي بالمبلغ اللي وصل له لأنه لو كذب في اجابة سؤال هيخسر كل المبلغ اللي كسبه

إلي هنا وكله تمام لكن اللي لفت نظري بقى هو طبيعة الأسئلة اللي بتتسأل للشخص المشارك في البرنامج

واللي هي عبارة عن أسئلة شخصية جدا و من الصعب الاجابة عنها على الملأ

يعني مثلا

هل تعتقد أن والدتك متسلطة وبتتحكم في كل شئون حياتك؟؟

هل تعتقد أن والدك كان المتسبب الرئيسي في فشل زواجه هو و والدتك؟

هل حدث وأعجبت بفتاة وأنت مرتبط بخطيبتك؟

هل سبق وأخذت بقشيش في مقابل تقليل فاتورة الحساب- السؤال كان لشاب يعمل نادل- ؟

هل سبق وسرقت المال من حافظة والدك؟

هل تعنقد أن أصدقائك أغبياء؟

هل تكره التواجد مع أهل زوجتك؟

وأسئلة تانية كتير من هذه النوعية وبعضها شديد الخصوصية ولا مجال لذكره هنا

لكن بصفة عامة ومن حيث المبدأ

ما رأيكم في هذا البرنامج؟

هل تعتبره برنامج جيد وبالتبعية هل تقبل بالمشاركة فيه ؟

أنا شخصيا معجبتنيش فكرته وبالتالي محبش أشارك فيه

لأني أولا شايفة أن في درجة معينة من الخصوصية بيتمتع بيها أي شخص وغير منطقي أني أطلع على الهوا وأقول أدق تفاصيل حياتي الشخصية

ثانيا حتى لو كنت شايفة في الناس اللي حواليا حاجات معينة مش هينفع أطلع على الهوا وأقولها

يعني بيتهيألي في حاجز معين في العلاقات الانسانية المفروض ما نجتازهوش وإلا مش هنعرف نرجع تاني زي ما كنا

ولو وقفت في وش أعز صديق ليك وصارحته بشيء أو حاجة ما ممكن تكون النتيجة بعد البرنامج أنك تكون كسبت كام ألف دولار بس خسرت صديق عمرك

والمعادلة دي خسرانة في نظري

ولا أنتوا رأيكم أيه

البقاء لله

أعتذر للجميع عن عدم ردي على تعليقاتكم أو مروري على مدوناتكم في الفترة الحالية

لقد فقدت صديقة عزيزة من يومين

أرجو منكم جميعا أن تدعوا لها ولكل أموات المسلمين بالرحمة والمغفرة

وأن تدعوا لأهلها وأصدقائها بالصبر

بسم الله الرحمن الرحيم

يا أيها النفس المطمئنة إرجعي إلى ربك راضية مرضية فادخلي في عبادي وادخلي جنتي

صدق الله العظيم

*

*

*

تحــديـــث

يبدو حقا أن المصائب لا تأتي فرادى

لقد أصيب والدي من أسبوع بجلطة في المخ

والحمد لله الأن الحالة مستقرة

لكنه يحتاج فترة علاج طبيعي

بجد أنتوا على بالي على طول يا جماعة بس الظروف اليومين دول وحشة جدا

أول ما تسمح هتواجد بينكم زي زمان

أدعوا لي أنتوا بس وأدعوا لوالدي بالشفاء

خلع ولا .....

-1-

كنت في عيادة دكتور أسنان النهاردة علشان بعيد عنكم عندي درس مسوس

المهم كانت فيه واحدة و زوجها قاعدين وزوجها قال لها لو قال حشوهنقول له عايزين خلع ردت عليه وقالت له آه مش هنحشيه هنخلعه

الموقف وجعني أوي بصراحة تخيل أنك تضطر علشان ممعكش فلوس أو عايز توفر فلوس أنك تخلع درسك خالص بدل ما تحاول تعالجه

أنا عارفة طبعا إن الموضوع هيكلف لأني بمر بخطواته دلوقتي وعارفة إن الدكتور عمال يوديني ويجيبني علشان الحساب يتقل كنوع من الاستغلال

يا ترى لو مكنش معايا فلوس كنت هأعمل ايه

كنت هأخلع أنا كمان ؟؟؟

ويا ترى لو الواحد لا قدر الله صابه مرض عضال هيبقى معاه فلوس يتعالج ولا هيتخلع من كشف الأحياء لإن اللي ممعهوش مايلزمهوش

-2-

فيه بنت قريبتي من بعيد

كانت رايحة الدرس وراكبة مشروع (وسيلة مواصلات عامة) ماشي في طريق رئيسي مش حتة متطرفة ولا في زقاق ولا حتى عشوائيات

وجه واحد لابس ظابط وقف المشروع وكان مصر ينزلها من غير ما تكون عملت حاجة

ولما البنت طلعت ناصحة ورفضت تنزل حاول يعرف رقم موبايلها فقالت له معيش طبعا مصدقهاش ومرضاش يسيبها غير لما واحدة من الركاب قالت أنها والدتها

من ساعتها ووالدها بيوديها كل يوم الدرس ويرجعها

ومن ساعتها وأنا بقول هل المفروض أخاف أنزل الشارع وأمشي في الطريق العام وفي عز الضهر

القصة حقيقية وأنا متأكدة منها

-3-

شاب بيشتغل زي مندوب مبيعات بيعدي على الصيدليات يحصل فلوس

فيه ناس خدت بالها منه وراقبته وقتلوه علشان يسرقوا الفلوس

أنا معرفوش ومعرفش والدته بس القصة وصلتني لإن والدته زميلة لقريبتي في الشغل

القصة مكررة بس تزيد احساسك بعدم الأمان

-4-

شفت إعلان في التلفزيون عن طفل صغير بيسرق شنطة

صاحبها بيجري وراه وبيمسكه ويضربه

الشنطة بتقع وبتعرف إن فيها عيش ( سرق علشان يأكل)

الشباب اللي قي الشارع دفعوا تمن العيش لصاحب الشنطة بس واحد منهم شيل الولد شنطة تقيلة جدا وقاله لو عايز العيش يبقى لازم تشتغل

طبعا مغزى الإعلان واضح السرقة مش الحل

بس معرفش ليه محبتش الإعلان ده

يمكن علشان حسيت بالقسوة لما الطفل الغلبان شال شنطة ضعف حجمه في مقابل أنه يحصل على رغيف حاف

-5-

أجرة المشروع غلت لإن البنزين غلى

وكل حاجة غلت مع أن والحمد لله لسه مقبضناش الزيادة المزعومة

واللي عرفت دلوقتي أنها هتطلع من جيبي مباشرة

علشان ترجع لجيبي أول الشهر ومنه إلي الحكومة والتجار

سيبك أنت المهم إن منيو الخمسة لسه بخمسة

-6-

ما أعرفش ليه بمر بأوقات بحس فيها أني عايزة أخلع ... خالص

تـــاج

فيه تاجين من الفارس الملثم

التاج الأول

النسخة العربية من التاج اللي جاوبت عليه في البوست اللي فات واللي مطلوب فيه أني أقول 10 عن نفسي

1- أنا كسولة جدا جدا وده عيب خطير ومضر بس للأسف مش عارفة أتخلص منه.

2- أنا حساسة أو زي أصحابي ما بيقولوا عليا قماصة بس أنا مش بعتبرها كده يمكن يكون السبب أنك كل ما بتزيد علاقتك بشخص بتزيد نسبة توقعك لحاجات معينة منه ولما ده مش بيحصل أو بيحصل عكسه لسبب أو لآخر بتتضايق بس في المقابل أنا مش بشيل حاجة لحد وسهل أوي أني أنسى وزي ما أقل حاجة تزعلني أبسط حاجة ممكن ترضيني

3- بحب القراية جدا بس مؤخرا مبقتش لاقية وقت أمارسها

4- بحب حاجة أسمها دراما وأعشق مشاهدة الأفلام .. تخيل مئات العوالم التي لم تشاهدها والمواقف والاحاسيس التي لم تختبرها .. عالم سحري زي صندوق الدنيا يخليكي على مدى ساعتين تتوحد مع الشخصيات اللي بتابعها

5- نفسي طويل ومش بيأس بسهولة بس لما بكون عايزة ده .

6- مؤمنة بالحب جدا ومش عارفة ليه متخيلة نفسي نجوى في شقة مصر الجديدة مع إن أنا عارفة أني مش جميلة ولا دمي خفيف ولا أيتوها حاجة من مواصفات بطلات الأفلام الرومانسية وغالبا هكون سعيدة الظ لو ربنا كرمني بجوازة صالونات تنقذني من لقب عانس في ظل هذا الزمن السعيد

بس أنا عندي أمل برضه

7- عمري ما فهمت الاشارات واللي كان يحاول يغش مني في اللجنة كنت ممكن أفضحه وأفضح نفسي لأني مش ببقى فاهمة غالبا هو بقصد ايه بأشارته .. ممكن يكون ده أحد أنواع الغباء

8- بحب البحر جدا وبالذات في الشتا بس مبعرفش أعوم ولا عمري نزلت الميه حتى

9- أنا مش بحلم كتير بس ساعات من أحباطي بحلم بحاجات حصلتوأنا بعيد صياغتها في أحلامي من جديد علشان تكون زي ما اتمنتها تحصل أو بحلم بحاجات محصلتش وكنت اتمناها تحصل

10- لما بأكل فلفل أخضر حامي بتجيلي نوبة زغطة جامدة مش بترضى تروح بسهولة.. دي الصنف الوحيد اللي قدر يقهرني من بين كل الحاجات اللي بتتاكل

بعد ما قريت الكلام اللي أنا كتباه حسيت أني شخصيتي معقدة مش عارفة ليه؟!

طبعا مصر كلها ردت على التاج وبالتالي مفيش حد معين هأمرره ليه بس اللي حابب يججاوب عليه يتفضل

التاج التاني بتاع الصور

أسمك

حيوان أليف تملكه

أوصف شكلك

ماذا تقود

الحالة الاجتماعية

البرنامج التلفزيوني المفضل

فيلمك المفضل

الحالة المزاجية

المطرب المفضل

محل الإقامة

محل العمل

حتعمل ايه النهارده وعملت ايه امبارح

الحلوى المفضلة

والتاج ده برضه كل اللي يحب يجاوب عليه يتفضل

وكل تاج وأنتم طيبين

Nice Tag

This Tag is From Bongo and Yuki


Tag Rules


1- Post 10 random things about yourself

2- Choose 5 people to tag and a reason you chose each person

3- Leave them each a comment directing them to your blog so they know they are it

You can’t tag the person who tagged you (you’ll have to make new friends)

As a courtesy to the person who tagged you, please let them know when you have posted so they can have the sheer delight and extra work load of reading your answers)

I always felt that it would be very difficult to talk about myself because I think I don't see myself the way people really saw me.

And also because I think that 10 things about me is too much, I mean couple of lines will do the job but I'll give it a try.

Let's do it

1) I'm a very lazy person and when I say lazy I actually mean it, if breathing wasn't spontaneous I' would be dead by now.

2) I'm a very touchy person, a tiny simple thing could hurt me but on the other hand I can forget bad things easily.

3) I love reading, I love it very much but recently I'm running out of time.

4) I love to watch movies and to be accurate I watch a lot of movies, it is a fascinating art.

5) I don't give up easily but only when I want to.

6) I believe in love and I hope to experience it one day, when I say that my friends laugh at me, I know I'm not gorgeous and I don’t have this great cool personality but who knows.

7) I don't understand gestures not in general but sometimes I just fail to follow it up.

8) I love sea although I can't swim.

9) I don't dream much but sometimes I dream of things that already happen but I change some details to make it more like I wanted it.

10) I'm allergic to uncooked pepper.


Well during checking my friend's blogs, I find out that most of them have already answered this tag and this put me in critical situation.


I'll pass this Tag to:


صيدلانية مطحونة (كلمتين وبس) , مها (المشربية) ,محمود ( بطوط حبوب) , الصحفية الروشة (نميمة عالمصطبة), سنووايت


And the reason is that I love their souls and before that I respect their minds .


And finally I'm very sorry for my bad English.

سـامحونــي

أنا مدينة للجميع باعتذار

لم أدرك حقا حجم الفترة التي غبتها إلا عندما قمت بجولة سريعة على مدوناتكم لأدرك حقا حجم ما فاتني

اعتذر عن عدم تواجدي ومتابعتي لكم واعتذر عما سببته لكم من قلق

واعتذر عن انقطاعي الطويل

وعن تأخري في الرد على من شرفوني بالمرور والتعليق

وعن تأخري في الرد على التاجات التي أرسلت لي

أرجو أن تتقبلوا اعتذاري وأسفي

وحشتوني

6 أبريـل انتفاضة وطنية

اتفقت كافه القوي الوطنية في مصر علي

أن يكون يوم 6 إبريل

يوم إضراب عام في مصر

يوم 6 إبريل

خليك قاعد في البيت أو شاركنا فى الميادين العامة

أوعي تنـــــــــزل لكن شاركنا

ماتروحشي الشغل

ماتروحشي الجامعه

ماتروحشي المدرسة

ماتفتحشي المحل
ماتفتحشي الصيدليه

ماتروحشي القسم

ماتروحشي المعسكر

عايزين مرتبات تعيشنا

عايزين نشتغل

عايزين تعليم لأولدنا

عايزين مواصلات أدمية

عايزين مستشفيات تعالجنا

عايزين دواء لأطفالنا

عايزين قضاء منصف

عايزين أمن وأمان

عايزين حرية وكرامه

عايزين شقق للعرسان

مش عايزين رفع أسعار

مش عايزين محسوبيه

مش عايزين ظباط بلطجية

مش عايزين تعذيب في الإقسام

مش عايزين أتاوات

مش عايزين فساد

مش عايزين رشاوي

مش عايزين إعتقالات

مش عايزين تلفيق قضايا

قول لأصاحبك مايروحوش الشغل همه كمان وخليهم يدخلوا الإضراب

حزب العمل المصري- حركة كفاية - الإخوان المسلمين - حزب الكرامه - حزب الوسط - حركة موظفي الضرائب العقاريه - عمال غزل المحلة - حركة إداريي وعمال القطاع التعليمي - نقابة المحامين - حركة أستاذه الجامعات

6أبريـــــــــــــــــل

أضراب عام في مصر سلمي

أبعت رسايل لخمسة من أصحابك

ولو كل واحد بعت لخمسة

في ظرف يومين البلد كلها حتعرف

بالموبايل

بالأرضي

بالأيميلات

أو حتي رسايل عالشات في قنوات التليفزيون

أنسخوا رسالتنا وأبعتوها تعليق على كل المقالات ألي بتقروها
بيكوا وبينا البلد دي حتتغير أنشاء الله

المسيحين مع المسلمين لصالح مصر

يالا يامحمد يالا يامينا مصر مش هتتغير إلا بإيــــدينـــــــا


الكلام اللي فوق ده وصلني بالنص كده وزي مهو مكتوب بدون بزيادة ولانقصان عن طريق الايميل

الكلام واضح الرسالة الهدف منها الإعلان عن إضراب سلمي وطني عام يوم 6 أبريل

مطلوب منك كمواطن كما جاء في الرسالة أنك ومهما كانت وظيفتك تقعد اليوم ده في بيتك ومتروحش شغلك

أو لو عايز تشارك تنزل في الميادين العامة

طبعا أنا رحت على محرك البحث علشان أفهم أكتر عن الموضوع اللي اتضح إن بقاله مدة منتشر وفيه كلام كتير أوي عليه مع أني شخصيا مسمعتوش قبل كده

الهدف من الاضراب كل المطالب الوطنية اللي مكتوبة في الايميل ده

أنا شخصيا معنديش مانع في أني مروحش الشغل اليوم ده

دي حاجة بسيطة جدا وسهلة التنفيذ يعني مش مطلوب مني ألبس حزام ناسف زي ما أخواننا الفلسطينين بيعملوا ده أنا يا دوب هأخد يوم أجازة

بس هل ده هيعمل حاجة بجد

بداية التغيير أننا نعمل حاجة فعلية وإلا نبقى نستاهل كل اللي يجرالنا ومحدش بقى يشتكي من الأسعار والفسادوالذي منه

السكوت علامة الرضا زي ما بيقولوا

صحيح الاضراب ده جايز ميفرقش كتير بس أهي بداية

بس اللي يقلق بجد أنها تتحول لحرب والناس تكسر المحلات وتولع في العربيات ومتبقاش وقفة سلمية

احنا كأفراد عايزين نعبر عن رأينا ونقول مشاكلنا بس من غير ما نكسر ونسرق لكن التجمعات اللي من النوع ده غالبا بيسودها الهرج والمرج

وفيه فئة معينة ممكن تستغل الفرصة في السلب والنهب وفي النهاية تتحول الوقفة السلمية لانتفاضة حرامية جديدة

بيني وبينكم أنا مش عارفة

هل الإضراب ده هيحصل فعلا ولا لاء ؟؟؟؟

وهل الناس هتشارك ولا هتخاف ولا ايه

ولو حصل هل هيغير حاجة فعلا ؟؟

هل هيكون الاضراب سلمي زي ما الايميل بيقول ولا زي ما حصل في السبيعنيات

الـشــرف

أولا : أنا عارفة أن الموضوع اللي هتكلم فيه جرئ على الأقل بالنسبة لبنت زيي

ثانيا : أنا هأحاول قدر الإمكان طرح الفكرة اللي عايزة اتكلم فيها بدون خدش حياء القارئ وبدون خدش حيائي من قبله

ثالثا : أنا لا أدعو للتحرر والفجور فياريت محدش يفهمني غلط

**

في بريد القراء يوم السبت الماضي

كانت فيه رسالة من فتاة بتقول فيها أنها ونتيجة لحادث ما حصل لها وهي عندها 9 سنين لم تعد عذراء

هي دلوقتي عندها 27 سنة على قدر لا بأس به من الجمال .. متعلمة ومتدينة على حد قولها لكن وعلى عكس كل البنات بتقول أنها مش قادرة تحلم بالزوج والبيت والأولاد

لأنه على حد تعبيرها مين ده اللي هيرضى بيها ويصدق أنها لم يمسسها بشر ولو بفرض ولقت اللي يقبل فغالبا هيحسسها طول الوقت أنه أنعم عليها أو بمعني أصح هيذلها

بعد ما قريت الرسالة حسيت بالغيظ وعلشان أكون بتكلم بصراحة الفكرة في دماغي من زمان والرسالة دي أثارت حماسي واستفزتني لمناقشتها معاكم هنا

وده هيخليني اطرح بعض الأسئلة

أولها

ايه مفهومك عن الشرف؟؟؟

أو ايه معاييرك اللي بتستخدمها في الحكم على عفة بنت وشرفها ؟؟

من الأخر يعني هل عذرية الفتاة هي المعيار الوحيد للحكم على مدى عفتها وشرفها ؟؟؟

ومن تاني بكرر علشان محدش يفهمني غلط ويحدفني بكيبورد ولا بماوس

أنا مش بحرض على الفجور والانحلال .. أنا بنت مسلمة محجبة محتشمة والحمد لله أهلي ربوني كويسبعرف حدودي في التعامل وقبل كل شيء بخاف ربنا

يعني مش بدعو للرذيلة ولا حاجة

بس بتستفزني أوي حكاية اقتران الشرف بالعذرية فقط ليس إلا

يعني الناس مش بتفكر في الأخلاق وتعملها اعتبار وحساب قد ما بتفكر في العذرية وبتهتم بيها

وممكن الواحدة تكون عرفت دستة وخرجت ودارت معاهم وبعدين تتجوز واحد ما يعرفش حاجة عنها

والراجل يلاقيها صاغ سليم ويبقى فرحان وسعيد ومش دريان باللي كانت بتعمله

طبعا النموذج ده الواحد كان بيشوفه في الجامعة وحتى في المدرسة أيم ثانوي كان فيه كام بنت معروفين على مستوى المدرسة وسمعتهم مش قد كده

ولكم أن تتخيلوا كمية الكلام اللي كان بيتحكي عنهم واللي هأعفي نفسي وأعفيكم من ذكره هنا

هل يا ترى دول ما اتجوزوش مثلا لحد دلوقتي ولا حصل زي ما قلت واتجوزوا

ليه بنركز بس على عذرية الجسد وبننسى عذرية المشاعر وعذرية الأخلاق

مش كل فتاة عذراء تبقى عفيفة شريفة أو العكس

ممكن قوي تكون عذراء بس زي ما قلت أخلاقها زي الزفت وممكن واعذروا جرأتي تكون عذريتها مغشوشة

وممكن بنت زي صاحبة الرسالة واللي على حد قولها لم يمسسها بشر ومع ذلك ستعاني الذل والهوان طول عمرها وعمرها أبدا ما هتحظى بحياة طبيعية وتكوّن أسرة سعيدة

أنا زي ما قلت مش بقصد أننا ما منهتمش بعذرية الجسد ... لا طبعا البنت لازم تحافظ على نفسها والمسألة دي مفروغ منها

أنا بس نفسي نحط حاجات تانية في حكمنا على البنت ونديها نفس الأهمية اللي بنديها للموضوع ده

يا ترى بقى ايه مفهومكم أو معياركم في الحكم على الشرف

الضميــر العربـــي

لم يعد بعد الكلام كــلام