الضميــر العربـــي

لم يعد بعد الكلام كــلام

ما هو سر الصورة ؟؟؟

دخلت النهاردة هيئة حكومية فشفت خير الله أما أجعله خير صورة مكبرة للريس وهو يمنحنا ابتسامة أبوية حنونة

تنحت شوية للصورة وجه في بالي خاطر

طبعا المشهد اللي أنا قلت عليه بيتكرر كتير وفي الواقع أي حد بيدخل أي هيئة حكومية ولا قسم بوليس بيشوف نفس المنظر والموضوع بيتكرر في المسلسلات و الأفلام

ودي مش عادة مستحدثة في العهد السعيد اللي احنا عايشين فيه ده .. الحكاية دي من زمان من أيام الرؤساء جمال عبد الناصر والسادات وقبلهم الملك فاروق ووالده فؤاد

ولقيتني بتسائل في سخرية .. كانوا بيعملوا ايه قبل ما يخترعوا التصوير الفوتوغرافي .. كان بيرسموا مئات الصور بايديهم علشان يحطوها في الدواوين الملكية

ولقيتني برضه بقول في عقل بالي هو فيه حكمة أو هدف معين يعني للحكاية دي

وهل ده بيحصل في كل حتة يعني ولا في بلدنا بس لأني بصراحة عمري ما شفت في فيلم ولا مسلسل أمريكاني صورة لجورج بوش أو بيل كلينتون متعلقة في أي حتة

وبيتهيألي برضه إن أي دولة أجنبية مش بتعمل كده وغالبا ده تقليد عربي مصري خالص ولنا كعرب حق احتكاره

وسألت نفسي برضه ايه سر الابتسامة الهادية المطمئنة المرسومة على وجه الريس

هل لأنه حاسس أنه أدّى واجبه كما ينبغي تجاه شعبه

وأنه خلاص مفيش بطالة ولا ارتفاع في الأسعار والدخل يغطي المصروفات وزيادة .. الشقق الفاضية بالكوم وسعرها رخيص واللي عايز يتجوز بيتجوز

المستشفيات بتقدم خدمة عالية المستوى للمواطنين .. الدواء متوفر بأسعار متاحة للجميع ومحدش بيموت لمجرد أنه مش قادر على تمن الدوا

هل ياترى مشاكل 75 مليون -اللي ربنا هيسأله عليهم - اتحلت والشعب سعيد ومبسوط

فبالتالي بقى من حق الريس يشعر بالسعادة والراحة ويبتسم الابتسامة المطمئنة دي

الحيـاة مواســم

-1-

أيام الأمم الأفريقية الأخيرة وبالتحديد يوم ماتش النهائي .. كانت كل المحلات حاطة علم مصر وكل العربيات حاطة علم مصر و الناس ماشية ماسكة أعلام في ايديها وفيه كل خطوتين واحد واقف يبيع أعلام

تاني يوم بعد الفوز مباشرة وأنا ماشية في نفس الطريق اللي كنت ماشية فيه لقيت المحلات شالت الأعلام ماعدا محل واحد ومحدش ماسك في ايده علم وكل الناس اللي كانت بتبيع أعلام أختفوا

-2-

نهار رمضان الناس كلها صايمة طبعا وفي المواصلات تلاقي كل واحد ماسك في ايده مصحف ومنهمك في القراءة

بعد الفطار تلاقي الناس كلها نازلة تجري علشان تلحق التراويح وتروح المسجد تلاقي مفيش مكان توقف الكل بيصلي الفجر حاضر وفي المسجد

خلص رمضان تلاقي الرجل خفت على المسجد والناس بقت تكسل ساعات تقوم للفجر واللي بيقروا قرآن في المواصلات انقرضوا

-3-

في موسم الامتحانات تلاقي كل الطلبة اللي راكبين معاك ماسكين ورق ولا مذكرة وعمالين يقروا ويحاولوا يجمّعوا أي حاجة علشان يحطوها في ورقة الإجابة ودمتم

مع إنهم طول السنة بيقضوها لعب وبعد الامتحانات بيكملوا اللعب


***

حد خد باله أنا أقصد ايه بكلامي

أنا أقصد أننا حولنا حياتنا لمجموعة مواسم

مصر داخلة بطولة يبقى كلنا نشجع ونشتري أعلام وكوفيات على شكل علم مصر ونرسم العلم على وشوشنا

ويصل مؤشر الوطنية لأقصى درجاته وبعدين هوب تخلص الحكاية وينفض المولد وينشغل كل واحد بحاله ويموت الاحساس
وينخفض مؤشر الوطنية لما يقارب الصفر

نفس الحال أيام رمضان

كل الناس بتبقى واخداها الحماسة أوي وعايزين يختموا القرآن أكتر من مرة وتلاقي الناس بتقرا في المواصلات والمساجد وقبل الفطار وعند الفجر كأننا في سباق

وتلاقي حد يقولك بفخر أنا ختمت القرآن 4 مرات مثلا لكن تعالى بقى اتفرج بعد انتهاء الشهر الفضيل هتلاقي محدش في المواصلات ماسك مصحف خالص وعمو اللي ختم في رمضان أربع مرات ده هتلاقيه من ساعتها ما جاش جنب المصحف

وكأننا مثلا في امتحان ولازم كل واحد يعمل كل جهده علشان يلم درجات أو ده وقت أعمال السنة فلازم تبقى ملتزم وماشي تمام

أو كأن استغفر الله ربنا مش بيشوفنا بنعمل ايه غير في رمضان بس

أنا على فكرة مش بستثنى نفسي من الكلام ده .. أنا نفسي بقالي مدة ما مسكتش المصحف وقريت زي ما بيحصل أيام رمضان

بجد دلوقتي لما بصادف حد في المواصلات ماسك مصحف ببقى عايزة أحييه

بالقياس على كل كلامي .. هتلاقي أننا بنعيش حالات معينة في أوقات محددة وكأننا قسمنا كل حياتنا لمواسم

وبقى لكل حاجة موسم حتى الدين دخل في التقسيمة وبقى له موسم

منطق غريب مش كده بس صحيح وبيحصل

كيف تضيف ملف صوتي لمدونتك ؟؟

يا مراحب

العديد من أصدقائي سألوني عن كيفية أضافة ملف صوتي للمدونة

وأنا حاولت أشرح الطريقة لكن للأسف منفعش و للأسف برضه منفعش أحط الكود في التعليق

بنت مصرية عملت شرح كامل و وافي لكيفية إنشاء مدونة وأضافة أشياء مختلفة لها وتغيير قالب المدونة

أنا كنت عطيت لينك الصفحة للأصدقاء لكن واجهوا صعوبة برضه

فهأقوم في البوست ده بوضع الكود وجزء الشرح الخاص به بعد إذن بنت مصرية

يعني كل الكلام الجاي واللي هيتكب بالخط العريض منقول من شرح بنت مصرية

ومش كلامي وغالبا أنا هأمسح البوست بعد انتهاء الغرض منه

لإضافة ملف صوتى فى مدونتك

اكتب الكود التالى فى المكان المناسب من السايدبار ، بس خللى بالك العنصر ذو الخلفية الخضراء عنصر متغير وهو رابط الملف الصوتى على الانترنت الذى سوف تقوم ببثه عبر مدونتك. فى هذا المثال دخلت على صفحة أغانى سعاد حسنى فى موقع سالمية واخترت اغنية "كيكو".. فاكرينها بتاعة كى كى كى كو يا كى كى كى، المهم يعنى ضغطت بزر الماوس الايمن -من غير قطع كلامى، انا اكتر حاجة كنت بكرهها وانا بشتغل فى المجلة كلمة اضغط بزر الماوس الايمن دى.. كانت بتتقال كتير- على كلمة استماع وظهر مربع الخصائص اخدت منه رابط الملف اللى هوه بالظبط خلفيته خضراء هنا فى الكود

مرة أخرى الصورة والشرح مأخوذين من صفحة الشرح التي قامت فيها بنت مصرية بشرح كيفية إنشاء مدونة

رابط الصفحة هو

http://bmadvice.blogspot.com/

وأنا بشكر بنت مصرية لإن شرحها فادني وساعدني كتير

ملحوظة أخيرة

ياريت الناس اللي تدخل ما تكتفيش بالرد هنا وتمشي

علشان البوست اللي تحت ده قعدت ساعة أكتب فيه ومش عايزاه يموت

فنفعونا بأي حاجة الله يكرمكم

تحديث

دي طريقة أخرى لإضافة ملف صوتي للمدونة شرحها لنا الفارس الملثم وسأضيفها هنا - بعد أذنه طبعا - لأنها لو فضلت في شات بوكس بعد فترة هتختفي

الخطوات:

انت بداية تختاري الملف الصوتي اللي يعجبك بس يكون mb3

وتروحي الموقع ده

http://www.boomp3.com/

وترفعي عليه الملف وبعد كده اتحطي بعض البيانات وبعد كده ايوديكي صفحة فيها الاغنية واتلاقي في الخيارات انت عاوزه الاغنية تشتغل تلقائي او لأ وكمان تشتغل مرة واحدة ولا علي طول

وبعد كده ادوسي علي عبارPost this player to your blog عشان تاخدي الكود وتحطية في المدونة

ولمن يريد أضافة أغنية ولم يجدها بصيغة mp3

سأضع رابط لموقع موّالي وده هتلاقي فيه أي أغنية أنت عايزها mp3

www.mawaly.com

تحديث

من خلال الرابط التالي يمكنك تحميل كود جديد لإضافة ملف صوتي للمدونة مرفق بالشرح الخاص به

http://www.4shared.com/file/39235132/b3bab374/_online.html


للأسف فشلت في إضافة الكود على هيئة صورة داخل البوست لأني كل ما أضيفها تظهر في أعلى الصفحة


الكود مقدم من الأخ العزيز الفارس الملثم


الذي انتهز الفرصة لأشكره على اهتمامه وتعاونه

أنت من بتوع الأتوبيس ؟؟

وأنا راكبة المشروع النهاردة دار حوار لطيف بين السواق والراجل اللي راكب جنبه

في البداية أنا مكنتش متابعاهم خالص وكنت سرحانة مع نفسي بس صوت السواق شد انتباهي وخلاني أركز في الحوار

واللي فهمته إن الراجل اللي قاعد جنب السواق قال حاجة معينة على الأمريكان فالسواق هاج وماج وقعد يردد في كلام من نوعية

بلاش كلام في السياسة الله يخليك

أحنا غلابة وعندنا عيال عايزين نربيها

بلاش تتكلم على الأمريكان الله يكرمك أحسن يودونا أسمه ايه ده مونتانمو (جوانتانامو)

وأثناء ترديده للعبارت السابقة كان بيلتفت للوراء ويبص للركاب بتوجس متوقعا أن يكون أحدهم جاسوس للأمريكان فيقول لهم على اللي حصل ويكون مونتانامو هو مصيره

مش عارفة الموقف ده فكرني بعبد المنعم مدبولي في فيلم احنا بتوع الأتوبيس

كان موظف حكومي رب أسرة عنده هاجس طول الوقت أن أعين النظام تراقبه ومستنية بس ينطق بكلة علشان توديه ورا الشمس

علشان كده مكنش بيحاول يشارك في أي نقاش سياسي في المصلحة اللي بيشتغل فيها حتى بيته كان بيهمس بصوت يكاد يكون غير مسموع لإن الحيطان لها ودان

وكان شايف أنه كده بيحمي نفسه وبيحمي عيلته

وده اللي يميز فيلم احنا بتوع الاتوبيس عن غيره من الأعمال اللي بتناقش نفس الموضوع - التعذيب داخل المعتقلات - زي فيلم الكرنك لأنه اختار نموذجين ملهمش في السياسة خالص

واحد زي ماقلت بيخاف يفتح بقه لحد من عيون النظام يسمعه وبيبعد عن الشر ويغني له

وشاب عايش حياته ومالوش دعوة بحاجة والسياسة مش من ضمن قائمة اهتماماته

والصدفة لوحدها هي اللي بتخليهم يدخلوا المعتقل ويكتشفوا الحقيقة

على عكس فيلم الكرنك مثلا اللي هتلاقي فيه الطلبة لهم ميول واتجاهات سياسية واضحة ومعلنة ويمكن يكون فيلم البرئ له نفس اتجاه فيلم احنا بتوع الاتوبيس لانه بيتكلم عن شخص مالوش في السياسة ولا بيفهم فيها برضه

في نهاية فيلم احنا بتوع الاتوبيس اكتشفت الشخصيتان إن موقفهم من المجتمع والسياسة غلط

وإن اللي كان بيخاف يرفع صوته كان المقروض يتكلم

وإن اللي كان مكبر ومش داوش دماغه كان المفروض يسأل ويفهم ويهتم

أنا عن نفسي وبصراحة ممكن أكون مزيج من الشخصيتين الخايف والمكبر

أنت بقى ايه ؟؟؟

الكلام اللي جاي ده كان بيقولوه وجدي العربي في الفيلم

ليا مين غيرك يا بلدي .. ليا مين

ياللي علمتيني ايه معنى الحنين

انتي اللي أرضك طيبة

و الغربة فيكي قريبة

و حنينة على قلبنا

طول السنين

ماشيين يا بلدي في سكتك

حريتك

حريتك هيا الطريق

بالصبر و الرأي الجرئ

بالحب

بالحب يا بلدي ولادك مخلصين

و شرفك يا بلدي لتبقي

حياتك هي عمري

و قدرك هو قدري

حرية على طول الزمان

حب و سلام في أي مكان

و شرفك يا بلدي

سحابة و تعدي

و برضه أنتي بلدي

مهما عملوا يا بلدي فيكي

أحنا ليكي

أحنا بيكي

ده أحنا ياما خدنا منك

فيها ايه لو يوم نديكي

فيها ايه لو يوم نديكي؟

هل يقبل ؟؟

كنت قاعدة زهقانة فقلت اتفرج على التلفزيون .. قعدت اقلب في القنوات فلقيت فيلم طريق الأمل بتاع فاتن حمامة و شكري سرحان شغال فاتفرجت عليه .

المفروض إن فاتن حمامة في الفيلم كان ليها ماضي - على رأي شكري سرحان - طبعا كأي فيلم عربي محترم والدتها كانت مريضة ومكنش في حل قدامها غير كده

المهم نرجع لسبب كتابتي هنا - أكيد مش علشان أقولكم أني شفت الفيلم مثلا -

شكري سرحان اللي قابل فاتن حمامة في بيت مشبوه - بيت دعارة يعني - وعارف كل حاجة عنها طلب ايدها للجواز

طبعا أنا أصابني ذهول وجالي عته منغولي وأنا بتفرج مع أني مش أول مرة أشوف الفيلم

وجه على بالي سؤال

أي راجل شرقي ده اللي هيقبل يتجوز واحدة ليها ماضي؟!

ده ولا في التلاتينات ولا في الأربعنيات ولا الخمسينات ولا في 2008 ولا حتى في 2105

مش بيتهيألي إن فيه راجل شرقي ممكن يرضى بكده أبدا حتى لو كانت البونية يا عيني اضطرتها الظروف تعمل كده

أنا عن نفسي عمري ما هضمت نظرية إن الواحدة تعمل كده علشان أبوها عيان أو أمها بتموت ولازم تنقذهم .. أنا عندي تسرق أو حتى تموت أحسن

ده حتى المثل بيقول تجوع الحرة ولا تأكل بثدييها

المهم نرجع لمرجوعنا

هل يقبل الرجل الشرقي الزواج من إمرأة لها ماضي ؟؟

أنا في رأيي إن ده مش ممكن يحصل

هيجي حد يقولي ما يمكن بيحبها ؟؟

هأرد وأقوله كلا وألف كلا .. صحيح هما بيقولوا الحب يصنع المعجزات لكن بيتهيألي إن المعجزة دي خارج نطاق قدراته

وسيقف عندها الحب عاجز لا حول له و لا قوة

ومهما كان الرجل بيحب المرأة عمره ما هيقدر ينسى الماضي أبدا

خليك من أصحــاب النفس الطويل

بغض النظر عن إن الهدف ده كان سبب فوزنا في ماتش النهائي في غانا وأننا استقبلناه بفرحة بعد ما ضاعت أكتر من فرصة وكانت كل الناس قلقانة ومشدودة

بعيد عن كل ده بص للجون نفسه

بص لزيدان .. واخد بالك حصل ايه

واخد بالك أنه وقع و قام و اتزق و وقع و قام و عافر و شاط الكورة مع إن اللاعيبة عملوه سندوتش على رأي المعلق الظريف

بس كان عنده اصرار رهيب أنه يأخد الكورة ولو لاحظت برضه وقتها كان ابو تريكة مش في الكادر بس دخل فجأة زي السهم وسدد هدف الفوز .

أنا وقفت كتير قدام المشهد ده مش بسبب إن ده هدف الفوز لكن بسبب الروح القتالية العالية والاصرار اللي كان عند زيدان

فكرت إن لو كان واحد فينا عنده الروح دي في حياته ممكن يعمل حاجات كتير لنفسه ولبلده

أنا مصري وايويــا مصري

مش عارفة أقول ايه بصراحة

مكنتش أعرف أني بحب مصر أوي كده ... ومش عارفة هل المفروض أني استنى ماتش كورة يعرفني أني بحب بلدي

أنا عمري ما حبيت الكورة ولا كان لي فيها ولا بفهم فيها حتى .. ايه اللي يخليني اتفرج على ماتش ساعة ونص واتعصب واتشد وازعق واصرخ

ايه اللي يخليني اهتم وابكي من الفرحة والتأثر في أخر الماتش غير اني فعلا بحب بلدي

بحبها أوي مع أني مخنوقة من زحمة المواصلات وارتفاغ الاسعار وضعف المرتبات وغلاسة موظفين الحكومة اللي يطلعوا عينك علشان تخلص مصلحة ولا ورق مهم

بحبها رغم البطالة والتوريث .. بحبها برغم التوك توك والعربيات اللي بتمشي في عكس الاتجاه

وبحب ناسها لانهم في النهاية طيبين وبيحبوها زيي

أنا بحب مصر

*******
تحديث

ألـف مبــــروك لمصر ولكل المصريين

يارب فرحنا كمان وكمان

هل أنت عصبـي ؟؟؟

أختبر نفسك هل أنت عصبي؟

هنا خمسة اسئلة سريعة .... اجب عليها بكل صراحة وعفوية وواقعية بعيدا عن الحالة المثالية ثم بعد ذلك انظر الى النتيجة

1) في الحافلة يقف شخص عريض أمام الباب المخصص للخروج ويبدو أنه غير مستعد لان يتحرك جانبا ليتيح لك ولركاب آخرين النزول في المحطة التالية... وأنت:

أ- تدفعه جانبا لتنزل؟أم
ب- تربت على ذراعه وتنبهه الى ضرورة أن يتحرك من مكانه؟ أم
ج- تنتظر أن يبادر شخص اخر بمواجهته لانك لست الوحيد الذي يريد ان ينزل؟
-------

2) أنت في طابور دفع الحساب بالسوبر ماركت.. ويطلب رجل ان تسمح له بان يسبقك لانه معه مشتروات قليلة.. وأنت:

أ- تقول له أن عليه أن يحترم الصف كما فعلت أنت؟ أم

ب- تتركه يسبقك فقط اذا كنت تقف في الصف منذ مدة قصيرة؟ أم
ج- تعطيه مكانك؟
-------

3) ارتديت اجمل ملابسك لانك ستخرج مع أصدقائك .. وبينما تسير للقائهم تمر سيارة مسرعة بجوارك فتنثر طينا من الشارع على ملابسك.. وأنت:

أ- تسب وتلعن قائد السيارة؟ أم
ب- تندد للمارة من حولك بقادة السيارات الرعناء, قراصنة الشوارع؟ أم
ج- من حسن الحظ انك لم تبتعد كثيرا عن المنزل، فيمكنك أن تعود لتنظف ملابسك؟
--------

4) لاكثر من ساعة يشكو لك أحد أصدقائك من مشاكل خاصة به بطريقة تثير أعصابك.. وأنت:

أ- تنصحه بأن يذهب لوالديه أو أن يذهب الى محلل نفسي؟ أم
ب- تسرح بفكرك عما يقوله وقد أدركك الملل؟ أم
ج- تحاول أن تهدئه وتقترح عليه حلولا لها؟
--------

5) يغضبك جدا شئ أو شخص ما .. وأنت:

أ- تثور وتقلب الدنيا على كل ما ومن حولك؟ أم
ب- لا تتسرع في الكلام أو التصرف كي لا تتورط فيما قد تندم عليه؟ أم
ج- تحاول أن تهدئ أعصابك وأن تتعقل في الموضوع ؟
-----------

لحساب مجموع النقاط... الاجابة أ = 5 نقاط الاجابة ب= 3 نقاط الاجابة ج= نقطة واحدة..

------

من 5 الى 11 نقطة:

أنت متحكم تماما في اعصابك، تتحاشى الخناقات والاصطدامات، يراك الناس هادئا ومسالما لا يمكن أن يضايقك شئ أو تشترك في مشادات في المنزل أو عراك مع أصدقائك و زملائك في العمل او المدرسة. نصيحة: لا يمكن أن تلغي تماما عاطفة غضبك وأن تتحاشى أن تختلف مع الاخرين وتعترض على بعض أفعالهم وأقوالهم ، الغضب طبيعي ومن الخطأ أن تكبت غضبك وعصبيتك بداخلك...

-------

من 12 الى 18 نقطة:

أنت متزن متحكم في نفسك.. تعرف دائما أن تكبت غضبك كي لا تدخل في مواجهات مباشرة.. بدون أن تتنازل عن التعبير عن رأيك.. أنت معروف ببرود أعصابك حتى في الحوارات الحامية.. شكرا على مرونتك ومقدرتك على التفاوض.. أنت تنجح دائما في تحاشي الاصطدام ...مع عدم التساهل في موقفك أو الهرب من الصراعات التي تدخل فيها.. التي تبقى دائما شفوية وبدون تفجرات...

-----------

من 19 الى 25 نقطة:

أنت مندفع جدا.. التحكم في أعصابك شئ لا تعرفه.. أنت تنفجر غاضبا حتى في التوافه بدون أن تنجح في التحكم في نفسك.. اذا عارضك الحظ أم أحد تبدأ بقذف الاشياء التي حولك ويخرج من فمك ما لا يصح أن تنطق به .. وبعد مرور دقائق قليله .. تعود هادئا رزينا كما كنت من قبل وقد غفرت تماما عما فجر غضبك

*

*

مجموع درجاتي 15

يعني تبع الفئة التانية

تاج الصبــاغ

تم تمرير التاج لي بواسطة هبهوب و ابن البلد مصري

1

هل توافق على حزف خانة الديانة من البطاقة الشخصية ؟

لا أوافق

3

هل تعتقد بوجود إضطهاد للمسيحين فى مصر ؟

لا اعتقد إن الأقباط في مصر يعانوا من الاضطهاد

4

من هو الشخص الذى تختارة لرئاسة مصر ؟

أي حد عنده ضمير وبيحب مصر ( ولو أني بيتهيألي إن المنصب نفسه مفسد )

5

أذا قمت بتأسيس حزب سياسى .. من هم الأشخاص الذين ستقوم بضمهم فى الحزب ليشاركوك فى حكم مصر حال فوزك فى الإنتخابات ؟

المصريين الغلابة اللي زي حالاتي لأني أنوي تطبيق نظرية انسف حمامك القديم لأنه بصراحة يستحق النسف

6

هل توافق على مشاركة كل من : الإخوان المسلمين - الأقباط فى الحكم ؟

إذا كان ده في مصلحة بلدي هأقبله

7

فى رأيك الشخصى .. ما هى أفضل مدونة على بلوجر قمت بزيارتها ؟

عدد كبير جدا ومنهم ناس ما يعرفونيش أصلا : حدوتة - ابن البلد مصري - لا إله إلا الله - dramaqueen - حكاوي وتخاريف وأشياء أخرى - TENDERose - خالو أحمد الصباغ - قصاقيص مشاعر - طهقان - طهقانة - عايزة أتجوز وغيرهم ...

8

للذكور فقط : أيهما تفضل كزوجة .. إمراءه عاملة ، أم ربة منزل ؟

لإناث فقط : هل توافقين على الزواج من رجل مطلق ؟

لا اعتقد أني سأوافق

9

اذا تزوجت وأنجبت ولدين وبنتين .. أى الأسماء تحب أن تسمى ؟

أحمد - يوسف - ياسمين - سارة

10

هل تعتقد أن توريث الحكم فى مصر . . سيتم فعلا أم لا ؟

ميه في الميه هيحصل

11

فى رأيك الشخصى : ماهو أفضل إنجاز لحكومة مبارك ؟ وما هو أسوأ عمل قامت به ؟

والله ما عارفة ده سؤال محرج أوي الصراحة

إلي هنا انتهى تاج الصباغ الأسئلة القادمة اضافتها هبهوب وسأجيب عنها أيضا

1

هل كتبت مرة بوست ف البلوج ومسحته؟امتى وكتبت ايه؟؟؟ لو مش عندك بلوج ...هل كتبت حاجه ف ورقه وقطعتها؟؟؟ او ايميل ومبعتوش؟؟؟

كنت هاكتب بوست عن مسلسل صرخة أنثى وحفظته لحد ما ابقى ارجع له تاني

2

لو حسيت بحد بيتظلم قدامك هتعمل ايه؟؟؟؟

لو أقدر اساعده يبقى هاساعده ولو مقدرش اعمل حاجة هاعدي له لإن بجد الظلم وحش

3

لو رايح المريخ وهتاخد حاجات معاك هتاخد ايه؟؟؟ ولو شخص هتاخد مين؟؟؟؟

مش عارفة ممكن أخد ايه .. يعني أكيد هأخد كل الحاجات التي هاحتاجها هناك وبالنسبة للشخص مش هأقدر اختار شخص واحد بس .. أكيد فيه أكتر من شخص وجوده مهم وأساسي في حياتي

4

لو حصل لك ايه ف حياتك هتقول كدا كفايا انا كدا حققت الى بتمناة؟؟؟

أني أكون سعيدة ويكون كل اللي حواليا سعدا

5

ماهو الرقم المفضل لديك؟؟

5 اليوم اللي اتولدت فيه

6

من اكثر الشخصيات المؤثرة عليك ف حياتك شخصية عامه و خاصه؟؟؟

شخصية خاصة : والدي ... شخصية عامة : أحمد خالد توفيق

7

شخص تضحى بحياتك من اجله؟؟؟؟

أنا شخصيا ممكن أعمل أي حاجة علشان الناس اللي بحبها بجد بس مش عارفة إذا كنت أملك شجاعة التضحية بالنفس ولا لاء

8

اجمل اغنيه .و...اجمل نشيد ..و...افضل شيخ ..و..افضل منشد..و..افضل مكان ؟؟؟؟؟

أجمل أغنية : أواخر الشتا (هو في غيرها طبعا بس دي اللي معلقة معايا دلوقتي)

أجمل نشيد : ليس الغريب

أفضل شيخ : محمود المصري - محمد حسان

أفضل منشد : مشاري راشد

أفضل مكان : أسكندرية في الشتا

9

لما تكون سعيد يتعمل ايه ...ولما تكون مخنوق بتعمل ايه او بتروح فين؟؟؟؟

لو سعيدة بخرج واتكلم واهزر واضحك .. لو مخنوقة بحب ابقى لوحدي وغالبا بحب اتمشى لوحدي

10

هل ممكن تتأسف لأنسان ..لو كنت غلطان؟؟؟

ممكن جدا طبعا لو حسيت أني غلطانة

11

امتى مريت بموقف مضحك اوى ومكنتش قادر تمسك نفسك من الضحك؟؟

كل مواقفي مع أصحابي تموت من الضحك

12

لو هتموت بعد ساعة (بعد الشر) ايه اول حاجه هتفتكر انك المفروض تلحق تعملها؟؟

مش عارفة .. من رحمة ربنا فعلا إن ميعاد الموت غير معلوم .. بيتهيألي لو عرفت أني هموت بعد ساعة الخوف هيخليني معملش حاجة

لمن تمرر هذا التاج ؟

امرر هذا التاج على كل من dramaqueen - بيسو - حدوتة - دكتور حماس - ضمير حي - راسبوتين .